Oseas 2 - Biblia Maya de Yucatán con DC 1992

¹ Bíin a wa'ale'ex túun ti' a j xibil láake'ex: Te'exe' u caajale'ex Ku, ti' a x ch'upul láake'ex xane', bíin a wa'ale'ex: X ch'a'a óotzilta'ane'ex.

U kex óolal u caajil Israel

² Yuumtzile' cu ya'alic: ¡Taque'ex u pool a maama'ex, taque'ex u pool, tumen leti'e' ma' in watan bejela'e', teen xane' ma' u yíichameni'! ¡Ca u p'at u ye'esicubáa bey x cáacbache'! ¡Ca u lukes ti' u yiimo'ob u weeyo'ob!

³ Wa ma' tu beetique' bíin in p'at chacnule'en u wíinclil: bíin in p'at chacnulil je'el bix le kiin ca j síije', bíin in suutkes bey jun p'éel x tocoye', láaj tiquin lu'umil, yaan in beetic u quíimil yéetel ukajil.

⁴ Ma' bíin in ch'a'a óotzilil ti' u paalali', tumen u paalal x cáacbachil.

⁵ U maamae' x cáacbachchaji; tu sataj u sublaquil, le ca tu ya'alaj: Bin in ca'aj in caxant in weeyo'ob, máaxo'ob dzáic in wo'och waaj yéetel in wo'och ja', cu dzáico'ob xan ti' teen u tzo'otzel j taman yéetel in lino, in aceite yéetel in wukulo'ob.

⁶ Le t o'olale' bíin in kal yéetel ki'ixo'ob u beel bíin in sup' u bakpach, u ti'al ma' u nuptáantic u t'o'ol bejilo'ob.

⁷ Bíin xi'ic u t'u'ulpacht u weeyo'ob ba'ale' ma' bíin u chucpachto'obi'; bíin u caxanto'ob, ba'ale' ma' bíin u nuptáanto'obi'. Bíin u ya'al túun: Bin in ca'aj suut tu yicnal in yáax íicham, tumen yéetel leti'e' cu bin teen utzil ca'achi.

⁸ Ba'ale' leti'e' ma' tu kaj óoltaj wa teen dzáic ca'ach ti' le trigoo, le vinoo yéetel le aceiteo'; teen máax ya'abcuntic ca'ach le plata yéetel le oro iquil u beetic u kuob.

⁹ Le t o'olale' bíin suunaquen in ch'a'a in trigo yéetel in vino tu kiinil in joch, bíin xan in mol u tzo'otzel j taman yéetel in lino, ba'axo'ob tin dzaj ca'ach ti' u ti'al u pixicubáa.

¹⁰ Tu táan u yich u weeyo'obe' bin in ca'aj in paj u subtal. ¡Mix máac bíin páatac u toquic tin kab!

¹¹ Bíin in dzáa xuul ti' u qui'imac óolal, ti' u cha'ano'ob yéetel ti' u túumben ujo'ob, ti' u kiinilo'ob u je'elel yéetel tuláacal u kiinbesajilo'ob.

¹² Bíin in kascunt u pakal uvaob yéetel u higueraob, tu yo'olal cu ya'alic ca'ach: Lela' leti' le bo'olal tu dzajo'ob ti' teen in weeyo'ob. Bíin in suutkes jun p'éel pocche', bíin jaanta'ac xan tumen u ba'alche'ilo'ob káax.

¹³ Bin in ca'aj in jadz tu yo'olal le kiin tu máansaj táan u kubic poom ti' beetbil kuob, le táan ca'ach u jadzutzquinticubáa yéetel x dzipito'ob bey xan yéetel jookenjooko'ob u ti'al u bin tu paach u weeyo'ob, táan u tu'ubsiquen. Teen Yuumtzil, teen a'alic.

Kue' u yaabiltmaj Israel u caajal

¹⁴ Tene' bin in ca'aj in we'es in yaacunaj ti': bin in ca'aj bis jun páayil, bíin in wa'al ba'alo'ob jadzutz ti'.

¹⁵ Cu dzo'ocole' quin sutic u x péet pach pakal uvaob, bíin in sutkes u táax lu'umil Acore' bey u jool najil alab óolal u ti'al leti'e'. Te'elo' ti' bíin u éejemteni' je'el bix tu x lo'obayanile' je'el bix le kiinac ca jóok Egiptoe'.

¹⁶ Bíin túun u t'anen beya': In wíicham, ma' bíin u ya'al ti' teen beya': In ku Baal. Teen Yuumtzil, teen a'alic.

¹⁷ Bíin in lukes tu chi' u kaaba' le ku Baalo', mix bikin bíin suunac ch'a'a chi'itbil.

¹⁸ Ti' le kiino'obo' bíin in beet u ti'al u yutzil Israel jun p'éel nup t'aan yéetel u ba'alche'ilo'ob káax, bey xan yéetel le ch'íich'o'obo' bey xan yéetel le caano'obo'; bíin in cache bíin xan in lukes ti' le lu'uma' le p'úunche'o', le x táadz máascabo' yéetel le ba'atelo', u ti'al ca je'elec x ma' sajaquil in caajal.

¹⁹ Israel tene' bíin dzo'ococ in beel ta wéetel u ti'al ca in watantech, u ti'al ja'abo'ob mina'an u xuul, jach jun p'éelech watan in ti'al, je'el bix u najmale', tumen in yaabilmajech yéetel tuláacal in pucsi'ikal.

²⁰ Tene' bíin in beetech jun túul in watan in ti'al, bíin chúucpajac in wóol ti' teech, teech túune' bíin a kamen bey a Yuumtzile'.

²¹ Teen Yuumtzil, teen a'alic: Ti' le kiino'obo' tene' bíin in beet utz ti' le ca'ano', le ca'ano' bíin u beet utz ti' le lu'umo';

²² le lu'umo' bíin u beet utz ti' le trigoo ti' le vinoo yéetel ti' le aceiteo', leti'obe' bíin u beeto'ob utz ti' Jezreel.

²³ Bíin in cajcunt in caajal te j lu'umo' chéen in ti'alinte; bíin in ch'a'a óotzilil ti' Lo-ruhama, ti' Lo-ami' xane' bíin in wa'al: Teche' in caajalech, leti'e' bíin u ya'al ti' teen: ¡Teche' in Junab Kuech!