Números 8 - Biblia Maya de Yucatán con DC 1992

U tzol t'aanil bix u naj u t'a'abal u sáasilo'ob quili'ich kulnaj

¹ Yuumtzile' tu t'anaj Moisés ca tu ya'alaj ti':

² A'al ti' Aarón, le quéen u tzol le sáaso'obo' u beet u juul actáan ti' le t'uchub sáaso'.

³ Aarone' tu dzo'ocbesaj je'el bix tu tzolbe'en t'antaj Yuumtzil ti' Moiseso', ca tu tzolaj le sáaso'ob u ti'al ca juulnaco'ob actáan ti' le x t'uchub sáaso'.

⁴ Le x t'uchub sáaso' beeta'an ca'ach yéetel oro, póola'an yéetel x bajab líikbal tu chuun tac tu ca'analil u nicte'ilo'ob. Moisés tu beetaj le x t'uchub sáaso' je'el bix e'esa'ab ti' tumen Yuumtzile'.

Bix úuchic u jun páaycunta'al le j levitaobo'

⁵ Yuumtzile' tu t'anaj Moisés ca tu ya'alaj ti':

⁶ Jun páaycunt le j levitaob ichil u chuca'an israelitaobo' ca a beet u yutzil áanta'alo'ob.

⁷ U tzolanteil u ti'al le utzil áanta'alo' bíin a beet beya', teech yaan a widzico'ob yéetel u ja'il utztal, cu dzo'ocole' leti'obe' cu dziquico'ob tuláacal u tzo'otzel u wíinclilo'ob yéetel u najmal u p'o'icuba'ob, bey xan u p'o'ic u nooko'ob; beyo' cu yutztalo'ob.

⁸ Cu dzo'ocole' cu ch'aico'ob jun túul wacax yéetel jun p'íit ma'alob juch'bil janalbe'en neeko'ob xa'akbesa'an yéetel aceite u ti'al u beetico'ob u ti'ibil óolal jejeláas janalbe'en neeko'ob, yéetel u láak jun túul wacax u ti'al quíimsbil tu yo'olal keban.

⁹ Teche' bíin a beet u náadzal le j levitaob tu noj Paselil Much'talo' bey xan bíin a much'quint tuláacal le israelitaobo'.

¹⁰ Tu séeblaquil bíin a táanbes le j levitaob tin táano', le j israelitaobo' cu máan u dza'ob u kabo'ob tu yóokol u poolo'ob.

¹¹ Aarone' cu beetic tin táan u tzolanteil u keexil le j levitaob bey yéetel le j israelitaob u ti'al ca p'áatco'ob in aj meeyjulo'ob.

¹² Cu dzo'ocole' le j levitaob cu dzáic u kabo'ob tu yóokol u pool le wacaxo'obo', jun túul le wacaxo' cu ku'ubul quíimsbil tu yo'olal keban, u láak jun túule' cu láaj tóoca'al u ti'al u yutztal le j levitaobo'.

¹³ Cu dzo'ocole' ca wa'acuntico'ob tu táan Aarón yéetel tu táan u paalal ca a beet u tzolanteil u ti'al ca u jun páaycuntico'ob ti' teen;

¹⁴ beyo' ca jun páaycuntic le j levitaob ichil u chuca'an le j israelitaob tu yo'olal in ti'alintico'ob.

¹⁵ Cu dzo'ocole' leti'obe' cu bino'ob j meyaj tu noj Paselil Much'tal. Unaj a láaj beetic utzil yanilo'ob u ti'al a táanbeso'ob bey jun p'éel ti'ibil óolal chéen in ti'ale',

¹⁶ tumen ichil tuláacal le j israelitabo' tene' dzo'oc in kamico'ob bey u keexil u yáax paalal le j israelitaobo',

¹⁷ tumen in ti'al tuláacal u yáax paal le j israelitaobo' yéetel tuláacal u yáax mejnil u yalak ba'alche'ob cu síijil. Le ca tin beetaj u quíimil u yáax paal le j egipciobo' tin jun páaycuntaj in ti'alint u yáax paalal le j israelitaobo'.

¹⁸ Ba'ale' tin kamaj le j levitaob bey u keexilo'obe'.

¹⁹ Tene' tin yéeyaj le levitaob ichil le u chuucáan israelitaobo', ca tin kubajo'ob ti' Aarón yéetel ti' u paalal, tu kaaba' le j israelitaobo' u ti'al meeyjul tu noj Paselil much'tal ca u kamo'ob sa'atsaj si'ipil ti' Yuumtzil u ti'al le israelitaobo', beyo' mix ba'al bíin úuchuc ti'ob.

²⁰ Moisés, Aarón yéetel tuláacal u caajil israele' tu dzo'ocbesajo'ob ba'ax tu tzolbe'en t'antaj Yuumtzil ti' Moisés tu yo'olal le levitaobo'.

²¹ Le j levitaobo' tu yutzquintuba'ob, tu p'o'ajo'ob u nooko'ob, Aarone' tu táanbesajo'ob bey ti'ibil óolal chéen u ti'al Yuumtzil, iquil beeta'abic u tzolanteil u yutztal yanilo'ob.

²² Cu dzo'ocol tuláacal lela' le j levitaobo' j bino'ob u beeto'ob u meeyjul u noj Paselil Much'tal, yáanal u tzolbe'en t'aan Aarón yéetel u paalal. Je'el bix tu tzolbe'en t'antaj Yuumtzil ti' Moisese' bey tu beetaj yéetel le j levitaobo'.

Yuumtzil cu ya'alic jay p'éel ja'ab unaj u meyaj le j levitaobo'

²³ Yuumtzile' tu t'anaj Moisese' ca'a tu ya'alaj ti':

²⁴ Le j levitaobo' unaj u chu'unbesic u meyajo'ob tu noj Paselil Much'tal le quéen yanac veinticinco ja'ab ti'obe',

²⁵ yéetel unaj u jáawal u meyajo'ob tu cincuenta ja'abo'ob.

²⁶ Le máanaja'an cincuenta ja'abo'ob ti'e' je'el u páajtal yáantic u láako'ob tu noj Paselil Much'tale', ba'ale' ma' u ti'al ca meyajnac je'el bix u meyaj ca'ache'. Bey unaj u t'oxic le meyaj ti' le j levitaobo'.