Números 7 - Biblia Maya de Yucatán con DC 1992

Ti'ibil óolal u ti'al u jun páaycunta'al quiili'ich naj.

¹ Le kiin tu dzo'ocbesilac Moisés le quili'ich najo', tu jun páaycuntaj yéetel aceite, pa'ate' yéetel tuláacal u nu'uculo'ob le quili'ich najo' bey xan le nu'uculo'ob cu meyajo'ob tu muultunil kultajo'.

² Cu dzo'ocole' u nojchililo'ob u ch'i'ibalo'obe' áantajnajo'ob u ti'al u xo'ocol le j israelitaobo',

³ j bino'ob u táanbeso'ob ti' Yuumtzil bey ti'ibil óolale' seis pixbil bolano'ob, yéetel doce wacax, u káat u ya'ale' jun p'éel bolan u ti'al ca'a túul u nojchilo'ob, yéetel jun túul wacax, tuláacal lela' tu táanbesajo'ob tu táan le quili'ich najo'.

⁴ Yuumtzil túune' tu ya'alaj ti' Moisés:

⁵ Kam le bolano'ob yéetel le wacaxo'obo', ca a dzáa ti' le j levitaob u ti'al u meeyjul u noj Paselil Much'tal, bíin u beet tu jujun túulil je'el bix u najmale'.

⁶ Moisese' tu kamaj le bolano'ob yéetel le wacaxo'obo' ca tu t'oxaj ti' le j levitaobo'.

⁷ Ti' u ch'i'ibal Gersone' tu dzáa ca p'éel bolan yéetel can túul wacaxo'ob, le kabéet u ti'al u meeyjulo'obe'.

⁸ Ti' u ch'i'ibal Merarie' tu dzaj tu kab Itamar, u paal noj kiin Aarón can p'éel bolano'ob yéetel ocho wacax le kabéet u ti'al u meeyjulo'obe'.

⁹ Ba'ale' ti' u ch'i'ibal Coate' ma' tu dzáa bolan mix wacaxi', tumen le quili'ich ba'alo'ob bíin u biso'obe' unaj u bisico'ob cúuch queléembaltbil'.

¹⁰ Le ca'aj jun páaycunta'ab u multuunil le kultajo', u nuuquilo'ob u ch'i'ibalo'obe' tu bisajo'ob u ti'ibil óolalo'ob ca tu dzajo'ob tu táan u multuunil kultaj.

¹¹ Yuumtzil túune' tu ya'alaj ti' Moisés: u ti'al jun páaycunajil sáamsamal jujun túul ti' u nojchil múuch' cajtalil otochnáal bíin u bis u ti'ibil óolal u ti'al u jun páaycunta'al u multuunil kultajo'.

¹² Yáax kiine' tu bisaj u ti'ibil óolal Naasón, u paal Aminadab, ti' u ch'i'ibalo'ob Judá.

¹³ U ti'ibil óolale' jun p'éel cáat beeta'an yéetel plata u aalile' mil cuatrocientos yéetel treinta gramos bey xan jun p'éel lac setecientos setenta gramos u aalil je'el bix u noj p'iisil le kulnajo', tuláacal chuup yéetel u ma'alobil juch'bil janalbe'en neeko'ob xa'akbesa'an yéetel aceite u ti'al ti'ibil óolal;

¹⁴ tu bisaj xan chuup yéetel poom jun p'éel x jo'opob beeta'an yéetel oro, u aalile' diez gramos,

¹⁵ jun túul chan wacax, jun túul j taman, yéetel jun túul j taman yaan un ja'ab ti' u ti'al u kubic láaj tóocbil,

¹⁶ jun túul j yuuc u ti'al quíimsbil tu yo'olal keban

¹⁷ u dzooque', u ti'al quíimsbil ba'alche' u ti'al ca'a bisajbáil, ca'a túul wacax, cinco j taman, cinco j yuuco'ob yéetel cinco j taman yaan un ja'ab ti'ob. Lela' u ti'ibil óolal Naasón, u paal Aminadab.

¹⁸ U ca'a p'éel kiine' tu bisaj u ti'ibil óolal Natanael, u paal Zuar, u nojchil u ch'i'ibalo'ob Isacar,

^19-23 tu bisaj ti'ibil óolal je'el bix le tu bisaj Naasone'.

²⁴ Tu óox p'éel kiine' tu bisaj u ti'ibil óolal Eliab, u paal Helón, u nojchil u ch'i'ibalo'ob Zabulón,

^25-29 tu bisaj u ti'ibil óolal láili' je'el bix le yáaxo'obo'.

³⁰ Tu can p'éel kiine' tu bisaj u ti'ibil óolal Elisur, u paal Sedeur, u nojchil u ch'i'ibalo'ob Rubene',

^31-35 u ti'ibil óolale' láili' je'el bix le yáaxo'obo'.

³⁶ Tu cinco kiine' tu bisaj u ti'ibil óolal Selumiel, u paal Zurisadai, u nojchil u ch'i'ibalo'ob Simeón,

^37-41 u ti'ibil óolale' láili' je'el bix le yáaxo'obo'.

⁴² U seis kiine' tu bisaj u ti'ibil óolal Eliasaf, u paal Reuel, u nojchil u ch'i'ibalo'ob Gade',

^43-47 u ti'ibil óolale' láili' je'el bix le yáaxo'obo'.

⁴⁸ U siete kiine' tu bisaj u ti'ibil óolal Elisama, u paal Amiud, u nojchil u ch'i'ibalo'ob Efraín,

^49-53 u ti'ibil óolale' láili' je'el bix le yáaxo'obo'.

⁵⁴ Tu ocho kiine' tu bisaj u ti'ibil óolal Gamaliel, u paal Pedasur, u nojchil u ch'i'ibalo'ob Manasés,

^55-59 u ti'ibil óolale' láili' je'el bix le yáaxo'obo'.

⁶⁰ Tu nueve kiine' tu bisaj u ti'ibil óolale' Abidán, u paal Gedeoni, u nojchil u ch'i'ibalo'ob Benjamín,

^61-65 u ti'ibil óolale' láili' je'el bix le yáax taalo'obo'.

⁶⁶ Tu diez kiine' tu bisaj u ti'ibil óolal Ahiezer, u paal Amisadai, u nojchil u ch'i'ibalo'ob Dan,

^67-71 u ti'ibil óolale' láili' je'el bix le yáax taalo'obo'.

⁷² Tu once kiino'obe' tu bisaj u ti'ibil óolal Pagiel, u paal Ocrán, u nojchil u ch'i'ibalo'ob Aser,

^73-77 u ti'ibil óolale' láili' je'el bix le yáax taalo'obo'.

⁷⁸ Tu doce kiinilo'obe' tu bisaj u ti'ibil óolal Ahira, u paal Enán, u nojchil u ch'i'ibalo'ob Neftalí,

^79-83 u ti'ibil óolale' láili' je'el bix le yáax taalo'obo'.

⁸⁴ Bey túuno' le ca'aj jun páaycunta'ab le u multuunil kultajo', u nojchilo'ob u ch'i'ibalo'ob Israele' tu kubajo'ob doce jejeláas cáato'ob beeta'ano'ob yéetel plata, doce noj laco'ob láili' beeta'an yéetel plata bey xan doce x jo'opobo'ob beeta'an yéetel oro.

⁸⁵ Tu jujun p'éelil le cáato'obo' u aalile' mil cuatrocientos yéetel treinta gramos, bey xan jujun p'éel noj laco'obo' u aalile', setecientos setenta gramos. Tuláacal le plata yaan ti' le cáato'ob yéetel ti' le noj laco'ob, u aalile' veintiséis mil yéetel cuatrocientos gramos, je'el bix u noj p'iisil le quili'ich najo'.

⁸⁶ Yaan xan doce x jo'opobo'ob beeta'an yéetel oro chuup yéetel poom, ciento diez gramos aalil u jujun p'éelil je'el bix u noj p'iisil le quili'ich najo'. U oroil tuláacal le x jo'opobobo' mil trescientos yéetel veinte gramos u aalil.

⁸⁷ Le ba'alche'ob u ti'al láaj tóocbile', doce mejen wacaxo'ob, doce j tamano'ob, doce j taman yaan un ja'abil ti'ob, yéetel u ti'ibil óolalo'ob jejeláas janalbe'en neeko'ob, bey xan doce j yuuco'ob quíimsbil tu yo'olal keban.

⁸⁸ U ba'alche'ilo'ob u ti'al quíimsbil ca'a bisajbáil tu pa'ate'ile' veinticuatro mejen wacax, sesenta j tamano'ob, setenta j yuuco'ob yéetel sesenta j tamano'ob yaan jun ja'ab ti'ob. Lelo'oba' leti' le ti'ibil óolal úuchic u ku'ubul le u multuunil kultaj, le ca'a dzo'oc u jun páaycunta'alo'.

⁸⁹ Le ca'aj ooc Moisés tu noj Paselil Much'tal u ti'al t'aan yéetel Yuumtzil, tu yu'ubaj ti' cu t'aan Yuumtzil yóokol u maac u ba'as che'il nup t'aan, chúumuc ti' le aj cuxa'ano'ob yaan u xiiko'obo'.