Números 5 - Biblia Maya de Yucatán con DC 1992

Yuumtzile' cu ya'alic ca jóokesac tu paach caaj le máaxo'ob ma' utz yanilo'obo'

¹ Yuumtzile' tu t'anaj Moisese' ca tu ya'alaj ti':

² A'al ti' le j israelitaob ca u jóokeso'ob tu paach caaj le máaxo'ob koja'ano'ob ti' jáaway, wa ti' le cu máansico'ob ki'ik wa quex p'áat ma' utz yanilo'ob úuchic u cóojolo'ob ti' jun túul quimen.

³ Jóokeso'ob tu paach caaj quex j xiibo'ob wa quex co'olelo'ob. Beyo' ma' bíin u kascunto'ob le péetcaaj tu'ux cajnáalen ichilo'obo'.

⁴ Le j israelitaobo' tu dzo'ocbesajo'ob le tzolbe'en t'aan tu dzaj Yuumtzil ti' Moiseso', ca tu láaj jóokesajo'ob tu paach caaj le máaco'obo'.

A'almajt'aano'ob tu yo'olal loobilo'ob yéetel u beeta'al kas.

⁵ Yuumtzile' tu t'anaj Moisés ca tu ya'alaj ti':

⁶ A'al ti' le israelitaob lela': Wa jun túul j xiib wa jun túul co'olel cu j ma' u'uyaj t'antic Yuumtzil iquil u loobiltic u láak máaque', cu kebantal

⁷ leti'e' unaj u jajcuntic kebanchajic. Cu dzo'ocole' bíin u dzáa ti' le máax tu loobilto' jun p'éel bo'ol je'el bix buca'aj u tojol le loob tu beetajo', yaan u dzáic u tiip'il jun jaatz ti' cinco jaatzul.

⁸ Wa le máax tu loobiltaj cu quíimil, mina'an u láaktzil u ti'al kamic le bo'olo', cu p'áatal u ti'al Yuumtzil, bíin ku'ubuc ti' le aj kiin pa'ate' yéetel le j taman bíin u táanbes u ti'al u kamic u sa'atsaj si'ipil le máaco'.

⁹ Tuláacal bo'ol yéetel ti'ibil óolal cu jun páaycunta'al tumen le j israelitaob u ti'al Yuumtzile' cu bisa'al ti' le aj kiino', u ti'al le aj kiino'.

¹⁰ Tuláacal ba'ax cu jun páaycunta'al ti' Yuumtzile', cu bisa'al ti' le aj kiino'; u ti'al le aj kiino'

A'almajt'aano'ob u ti'al máaco'ob cu tucultico'ob tan u ke'exlo'ob tumen u yatano'ob

¹¹ Yuumtzile' tu t'anaj Moisés ca tu ya'alaj ti':

¹² A'al ti' le j israelitaobo': je'el u kuchul u kiinil u yáanta'al jun túul co'olel ca u kex u yíichame'

¹³ ca yanac ba'al u yil yéetel u láak j xiib ma' tu kuchul ojéeltbil tumen yíicham cu dzo'ocole' quex cu p'áatal ma' utz yanil yo'olal ba'ax cu beetique', mina'an máax jajcuntic tumen mix jun téen chu'ucuc táan u nup keban.

¹⁴ Tu yo'olal lelo' le íichamo' yaan kiin cu yaj óoltic táan u ke'exel tumen u yatan. Ba'ale' yaan kiin xane' cu yaj óol jun túul íicham quex tumen ma' táan u tu'usul tumen u yatan.

¹⁵ Ti' le ba'alo'ob beyo', le íichamo' bíin u bis u yatan tu táan aj kiin, bey xan bíin u táanbes tu yo'olal leti' ca'a wuudz u juuch'il cebada. Ba'ale' ma' bíin u yal aceite mix u tos poom tu yóokol le juuch'o', tumen ti'ibil óolal u ti'al u chíicbesa'al jun p'éel nup keban.

¹⁶ Le aj kiino' cu beetic u náadzal le co'olelo' cu táanbesic tu táan Yuumtzil.

¹⁷ Cu dzo'ocole' cu ch'a'ic jun p'íit quili'ich ja' ti' jun p'éel nu'ucul kat u ca'aje', cu xa'aktic yéetel jun p'íit u ma'ay u lu'umil le quili'ich najo'.

¹⁸ Cu beetic u wa'atal le co'olel tu táan Yuumtzilo' cu jíilt wach'ic u tzo'otzel u pool, cu dzáic tu kab le ti'ibil o'olal iquil u yaj óolta'al táan u kexic u yíichamo' u ti'al u chíicbesa'al jun p'éel keban; ca'aliquil le aj kiino' ti' yaan tu kab le ja' cu taasic loolob t'aano'.

¹⁹ Leti' túune' cu beetic u jalach t'antic le co'olelo', cu ya'alic ti': Wa ma' a nupabaj yéetel u láak j xiib, mix a tus a wíichame', mix a beet u p'áatal kaas yanilech yéetel u láak j xiibe', ma' yúuchul teech mix ba'al le quéen a wuk le ja' cu taasic loolob t'aana'.

²⁰ Ba'ale' wa dzo'oc a kexic a wíicham, wa dzo'oc u yantal ba'ax a wila' yéetel u láak j xiib u ti'al u kastal a wanile',

²¹ Yuumtzil ca u sutech u chíiculalil loolob t'aan tu táan le caajo', bey xan ca u beet u chu'upul a nak yéetel u yéemel a wal.

²² Le jaadza' bíin taalac ti' teech le quéen a wuk u ja'il le loolob t'aana' le co'olelo' cu núuquic: ca úuchuc beyo'.

²³ Le aj kiin túuno' cu dzíibtic le loolob t'aana', cu dzo'ocole' cu tupic yéetel le káakaj ja'o'.

²⁴ Cu dzo'ocole' cu beetic u yu'ukul le ja' tumen le co'olelo', tu yo'olal u yantal káajil ichil u jobnel,

²⁵ cu kamic xan tu kab leti' le ti'ibil óolal tu taasaj tu yo'olal táan u tucla'al táan u kexic u yíicham u ti'al u táanbesic ti' Yuumtzil; cu dzo'ocole' cu t'alcuntic le ti'ibil óolal tu yóokol u multuunil le kultajo',

²⁶ tu séeblaquil bíin u ch'a'a jun lap' kab u ti'ibil óolil jejeláas neeko'ob u ti'al u tóoc tu yóokol u multuunil kultaj u ti'al u ti'ibil óolil ka'ajsajil. Cu dzo'ocol u beeta'al tumen le aj kiin u yu'ukul tumen le x co'olel le káakaj ja'o',

²⁷ wa leti' táan u tusic yíichame', le ja' cu taasic loolob t'aana' bíin u beet u yantal káajil ichil leti', cu beetic túun u chu'upul u nak bey xan u yéemel u paal, cu dzo'ocole' le co'olelo' cu p'áatal u chíiculal loolob t'aan ichil u caajal.

²⁸ Ba'ale' wa ma' sipa'an le co'olelo' ma' bíin úuchuc mix ba'al ti' bey xan je'el u páajtal u yantal u paale'.

²⁹ Lela' leti' u ya'almaj t'aanil jun túul co'olel cu kexic u yíicham, leti' xane' cu yaj óoltic táan u tu'usul tumen u yatan.

³⁰ Bey xan quex chéen ca u yaj óolt le íicham táan u ke'exel tumen u yatan. Le íichamo' unaj u bisic u yatan tu táan Yuumtzil, le aj kiin xano' bíin u beet ba'ax cu ya'alic le a'almaj t'aano'.

³¹ Le íichamo' ma' bíin a'ala'ac yaan u si'ipili', ba'ale' wa yaan u si'ipil le co'olelo', leti'e' bíin u mukyajt u jaadzil.