Números 4 - Biblia Maya de Yucatán con DC 1992

U jejeláas meyaj le j levitaobo'

¹ Yuumtzile' tu t'anaj Moisés yéetel Aarón ca tu ya'alaj ti'ob:

² Xoque'ex jay túul u yotochnáalo'ob u cajtalil le j levitaob tu tzoolol u ch'i'ibalo'ob Coat,

³ le máaxo'ob yaan treinta tac cincuenta u ja'abilo'obe', nu'ucano'ob u ti'al meyaj tu noj Paselil Much'tal.

⁴ U meyaj u ch'i'ibalo'ob Coate', sen quili'ich, je'el le ba'ax bíin u beeto'oba':

⁵ Le quéen kuchuc u kiinil u líikil u binbal le caajo', Aarón yéetel u paalale' bíin u lukso'ob le káasab yaan tu jool le sen quili'ich cúuchilo', yéetele' cu to'ico'ob u ba'asche'il le nup t'aano'.

⁶ Bíin u dza'ob tu yóokole' jun p'éel pixib beeta'an yéetel ma'alob kéewelo'ob, cu dzo'ocole' cu jayico'ob jun tacáalili' jun p'éel chacpuke'en nook, cu dza'abal u katáabilo'ob u ti'al u cúuch queléembalta'al.

⁷ Yaan xan u ja'ayal jun p'éel chacpuke'en nook yóokol u táasche'il táanbesajil cu dzo'ocole' cu tzo'olol yóokol u jáaycab laquilo'ob, u jo'opobilo'ob, u chúujilo'ob, yéetel u pichelilo'ob u ti'ibil óolal u ti'al u kab uva, bey xan le waaj cu táanbesa'al mantadzo'.

⁸ Tu yóokol tuláacal lelo', bíin ja'ayac jun p'éel chac nook, cu dzo'ocole' cu pi'ixil yéetel le pixib beeta'an yéetel ma'alob kéewelo'obo', cu dza'abal u katáabilo'ob u ti'al u cúuch queléembalta'al.

⁹ Cu dzo'ocole' cu ch'a'abal jun p'éel chacpuke'en nook u ti'al u pi'ixil le x t'uchub sáaso', le sáaso'obo', le x nat'abo'obo', le x jayacsa'al lac yéetel tuláacal u nu'ucul u dza'abal aceite.

¹⁰ Tuláacal le ba'alo'obo', bíin to'oboc yéetel jun p'éel pixib beeta'an yéetel ma'alob kéewelo'ob, cu dza'abal u katáabilo'ob u ti'al u cúuch queléembalta'al.

¹¹ Bey xan bíin ja'ayac jun p'éel chacpuke'en nook yóokol le multuunil kultaj oro u ca'aj, cu to'obol yéetel jun p'éel pixib beeta'an yéetel ma'alob kéewelo'obe' cu dza'abal u katáabilo'ob u ti'al u cúuch queléembalta'al.

¹² Cu dzo'ocole' cu mo'olol le nu'uculo'ob cu meyaj te j quili'ich najo', cu dza'abal ti' jun p'éel chacpuke'en nook, cu to'obol yéetel jun p'éel pixib beeta'an yéetel ma'alob kéewelo'ob, cu bisa'al xan cúuch queléembaltbil ti' u katáabilo'ob.

¹³ Unaj u láaj cho'obol u ch'ach'alquil yéetel u púusta'al u ta'anil le u multuunil kultajo', cu dzo'ocole' cu to'obol yéetel jun p'éel chacjome'en nook.

¹⁴ Tu yóokol bíin dza'abac tuláacal le ba'ax cu kabéetchajal u ti'al u quili'ich meeyjulo'ob tu multuunil kultajo': u nu'uculo'ob t'aba'an chúuc u x lu'utzubilo'ob, u x jo'opobilo'ob, u nucuch laquilo'ob; yéetel tuláacal u nu'uculo'ob le multuunil kultajo'. Ti' tuláacal lelo' bíin dza'abac jun p'éel u pixilbil ma'alob kéewelo'ob, bey xan u katáabilo'ob u ti'al u cúuch queléembalta'al.

¹⁵ Le quéen dzo'ococ u láaj to'obol tumen Aarón yéetel u paalal tuláacal le quili'ich nu'uculo'ob, quéen dzo'ococ túun u máakanta'alo'ob u ti'al bisbile' je'el u páajtal u taal u paalal Coat u ti'al u cúuch queléembalto'ob le ba'alo'obo'. Ba'ale' ma' unaj u machico'ob mix ba'al quili'ich yéetel u kabo'ob, tu yo'olal ma' u quíimilo'ob. Tuláacal u nu'uculo'ob u noj Paselil Much'tal unaj u cúuch queléembalta'al tumen u paalal Coat.

¹⁶ Eleazar, u paal aj kiin Aarone', leti' bíin ilic u aceiteil sáaso'ob, qui'iboc poom, bey jejeláas janalbe'en neeko'ob u ti'al táanbesa'al mantadz ti'ibil óolalo'ob ti' teen, je'el bix le u aceiteil jun páaycunajo'. Yaan xan u canantic le quili'ich naj yéetel tuláacal ba'ax yaan ichilo' bey xan u quili'ich ba'alilo'ob.

¹⁷ Yuumtzile' tu t'anaj Moisés yéetel Aarón ca tu ya'alaj ti'ob:

¹⁸ Ma' bíin a cha'ex u sa'atal u cajtalil u yotochnáanlo'ob Coat ichil le j levitaobo'.

¹⁹ U ti'al ma' u núumsaj yajtico'ob quíimil tu yo'olal u machco'ob quili'ich ba'alo'ob, unaj a beetique'ex beya'; Aarón yéetel u paalal bíin u ya'al ti' u jujun túulil ba'ax bíin u beet yéetel ba'ax bíin u bisej.

²⁰ Beyo' mina'an ba'ax o'olal u yoclo'ob mix jun súutuc u yilo'ob quili'ich ba'alo'obi', ma' xan ca quíimco'obi'.

²¹ Yuumtzile' tu t'anaj Moisés ca tu ya'alaj ti':

²² Xoc xan tu tzoolol jay túul u yotochnáalo'ob u cajtalilo'ob Gersón

²³ le je'enque'ex yaan treinta tac cincuenta u ja'abilo'ob, nu'ucano'ob u ti'al meyaj tu noj Paselil Much'talo'.

²⁴ U meyajo'ob u ch'i'ibal Gersone', leti' lelo'oba':

²⁵ Unaj u cúuch queléembaltico'ob u káasabilo'ob le quili'ich naj, u noj Paselil Much'talo', le pixib beeta'an yéetel ma'alob kéewelo'ob cu ja'ayal yóokol le káasab cu bin tu jool le u noj Paselil Much'talo',

²⁶ u káasabilo'ob le x péetpaacho', u káasabil u jool le x péetpaach bakpachtmail le quili'ich naj yéetel u multuunil le kultajo', u suumilo'ob yéetel tuláacal le ba'axo'ob kabéet u ti'al u meyajilo'obe'.

²⁷ Aarón yéetel u paalal bíin u ye'eso'ob ti' u paalal Gersone' le meyaj bíin u beeto'ob, yéetel ba'axo'ob bíin u cúuch queléembalto'ob, te'ex bíin a wa'ale'ex ti'ob ba'ax cun u beeto'ob.

²⁸ Lela' leti' le meyaj bíin u beeto'ob u cajnáalilo'ob u yotochnáalilo'ob yéetel ch'i'ibalo'ob Gersón tu noj Paselil Much'tal yáanal u tzolbe'en t'aan Itamar u paal aj kiin Aarón.

²⁹ Xoc xan tu tzoolil jay túul ch'i'ilancab, u cajnáalil u yotochnáalo'ob yéetel láaktzilo'ob Merari.

³⁰ Láaj dzíibt u kaaba' le yaan treinta tac cincuenta u ja'abilo'ob, nu'ucano'ob u ti'al meyaj tu noj Paselil Much'talo'.

^31-32 Le meyaj bíin u beeto'ob tu noj Paselil Much'talo' leti' lela': bíin u cúuch queléembalto'ob u bujbil che'ilo'ob le quili'ich najo', u katáabilo'ob, u yocomilo'ob, u nu'ucul yedztalo'ob u x bajab che'ilo'ob yéetel u suumilo'ob, bey xan tuláacal le kabéet u ti'al u meyajilo'obo'. Teech bíin a wa'al ti' tu jujun túulil ba'ax unaj u cúuch queléembaltico'ob.

³³ Lela' leti' u meyajilo'ob tu noj Paselil Much'tal bíin u beet u ch'i'ibalo'ob Merari yáanal u tzolbe'en t'aan Itamar u paal aj kiin Aarón.

³⁴ Moisés, Aarón yéetel u nuuquilo'ob le caajo', tu xocajo'ob tu tzoolol jay túul u cajnáalilo'ob u yotochnáalilo'ob u ch'i'ibal Coat

³⁵ je'enque'ex yaan treinta tac cincuenta u ja'abilo'ob nu'ucano'ob u ti'al j meyaj tu noj Paselil Much'tal,

³⁶ ca j dzíibta'ab u kaaba'ob dos mil setecientos yéetel cincuenta máaco'ob tu pa'ate'il.

³⁷ Lelo' leti' le buca'aj tu chucaj u ch'i'ibal Coat, cu páajtal u meyajo'ob ca'ach tu noj Paselil Much'tal je'el bix le dzíib kaaba'ob tu beetaj Moisés, yéetel Aarón, jach je'el bix a'ala'abic ti' Moisés tumen Yuumtzile'.

³⁸ U paalal Jersón, tu tzoolol u cajnáalilo'ob u yotochnáalo'ob,

³⁹ je'enque'ex yaan treinta tac cincuenta u ja'abilo'ob nu'ucano'ob u ti'al meyaj tu noj Paselil Much'tale',

⁴⁰ dos mil seiscientos yéetel treinta.

⁴¹ Lelo' leti' tu pa'ate'il ca'ach u ch'i'ibal Jersón cu páajtal u meyajo'ob tu noj Paselil Much'tal je'el bix le dzíibil kaaba' tu beetaj Moisés yéetel Aarón yáanal u tzolbe'en t'aan Yuumtzil.

⁴² U paalal Merari' tu tzoolol u ch'i'ibalo'ob u yotochnáalo'ob,

⁴³ je'enque'ex yaan treinta tac cincuenta u ja'abilo'ob nu'ucano'ob u ti'al u meeyjul u noj Paselil Much'talo',

⁴⁴ tres mil yéetel doscientos.

⁴⁵ Lelo' leti' tu pa'ate'il ca'ach u paalalo'ob Merari' cu páajtal u meyajo'ob tu noj Paselil Much'tal, je'el bix le dzíib tu beetaj Moisés yéetel Aarón jach tu ya'alajilac Yuumtzil ti' Moiseso'.

⁴⁶ Tuláacal le j levitaob j xo'oc tumen Moisés, Aarón yéetel u nuuquilo'ob Israel tu tzoolol u cajnáalilo'ob yotochnáalo'ob,

⁴⁷ je'enque'ex yaan ca'ach treinta tac cincuenta u ja'abilo'ob nu'ucano'ob u ti'al u meeyjul u noj Paselil Much'tale',

⁴⁸ ocho mil quinientos ochenta.

⁴⁹ Lela' leti' le dzíibil kaaba'ob beeta'ab je'el bix tu ya'alajilac Yuumtzil ti' Moisés, bey xan j a'ala'ab ti' jujun túulil ba'ax bíin u beet yéetel ba'ax bíin u cúuch queléembalt je'el bix a'ala'abic tumen Yuumtzil ti' Moisese'.