Números 2 - Biblia Maya de Yucatán con DC 1992

U tzoolol bix much'lajico'ob can jaatz israelitaobo'

¹ Yuumtzile' tu t'anaj Moisés yéetel Aarón ca tu ya'alaj ti'ob:

² Le j israelitaobo' unaj u much'talo'ob ma' jach náach tu bakpach u noj Paselil Much'tal, jujun túul yáanal u lacam, yéetel u chíiculal u láaktzilo'ob.

³ Tu lakine' bíin je'elec le jaatzul cu xíimbal yáanal u lacam Judá. U jaatzul u ch'i'ibalo'ob Judae' u nojchile' Naasón u paal Aminadad,

⁴ tuláacale' sesenta yéetel cuatro mil seiscientos j xiibo'ob.

⁵ Tu tzéele' bíin je'elec u jaatzul u ch'i'ibalo'ob Isacar, u nojchile' Natanael, u paal Zuar,

⁶ tu pa'ate'ile', cincuenta yéetel cuatro mil cuatrocientos j xiibo'ob.

⁷ Bíin xan much'lac tu tzéel u jaatzul u ch'i'ibalo'ob Zabulón, u nojchile' Eliab, u paal Helón,

⁸ tu pa'ate'ile' cincuenta yéetel siete mil cuatrocientos j xiibo'ob.

⁹ U j xiibilo'ob Judae' chúucpaj óox múuch' le bíin xíimbalnaco'ob tu táan le j israelitaob, ciento ochenta yéetel seis mil cuatrocientos j xiibo'ob.

¹⁰ Tu noojole' bíin je'elec u jaatzul cu xíimbalo'ob yáanal u lacam Rubén. U nojoch u ch'i'ibalo'ob Rubene' Elisur, u paal Sedeur,

¹¹ tu pa'ate'ile' cuarenta yéetel seis mil quinientos j xiibo'ob.

¹² Tu tzéele' bíin je'elec u jaatzul u ch'i'ibalo'ob Simeón, u nojchile' Selumiel, u paal Surisadai,

¹³ tu pa'ate'ile' cincuenta yéetel nueve mil trescientos j xiibo'ob.

¹⁴ Bíin xan je'elec yéetelo'ob u ch'i'ibalo'ob Gad, u nojoche' Eliasaf, u paal Reuel,

¹⁵ tuláacale' cuarenta yéetel cinco mil seiscientos cincuenta j xiibo'ob.

¹⁶ Beyo' u caajilo'ob Rubene' bíin chúucpajac óox múuch', tu pa'ate'ile' ciento cincuenta y un mil cuatrocientos j xiibo'ob yaan u xíimbalo'ob tu paach le yáaxo'.

¹⁷ Le j levitaobo' bíin xíimbalnaco'ob chúumuc ti' le can múuch' j xiibo'ob u ti'al u bisico'ob u noj Paselil Much'tal. Le can p'éel cajtalilo'ob bíin xíimbalnaco'ob yáanal u lacam tu paach u láak caaj tu tzoolol je'el bix much'lico'ob ca'ache'.

¹⁸ Chikine' yaan u je'elel u múuch'ul le j xiibo'ob cu xíimbalo'ob yáanal u lacam Efraín. U nojoche' Elisama, u paal Amiud,

¹⁹ tu pa'ate'ile' cuarenta mil quinientos j xiibo'ob.

²⁰ Tu tzéele' bíin je'elec u jaatzul u ch'i'ibalo'ob Manasés, u nojchile' Gamaliel u paal Pedasur,

²¹ tu pa'ate'ile' treinta yéetel dos mil doscientos j xiibo'ob.

²² Yaan xan u dza'abal tu tzéele' u jaatz u múuch' cajtalil yotochnáalo'ob Benjamín, u nojchile' Abidán, u paal Gedeoni,

²³ tu pa'ate'ile' treinta yéetel cinco mil cuatrocientos j xiibo'ob.

²⁴ Beyo' u cajtalil Efraine' cu chuquic óox múuch', tu pa'ate'ile' ciento ocho mil cien j xiibo'ob, yaan u xíimbalo'ob tu óox tzoolol.

²⁵ Tu noojole' bíin je'elec u jaatzul le j xiibo'ob cu xíimbalo'ob yáanal u lacam Dan, u nojchile' Ahieser, u paal Amisadai,

²⁶ tu pa'ate'ile' sesenta yéetel dos mil setecientos j xiibo'ob.

²⁷ Tu tzéele' bíin je'elec u jaatzul u ch'i'ibalo'ob Aser, u nojchile' Pagiel, u paal Ocrán,

²⁸ tu pa'ate'ile' cuarenta un mil quinientos j xiibo'ob.

²⁹ Tu tzéelo'ob xane' bíin je'elec u jaatzul u ch'i'ibalo'ob Neftalí, u nojoche' Ahira, u paal Enán,

³⁰ tu pa'ate'ile' cincuenta yéetel tres mil cuatrocientos j xiibo'ob.

³¹ Beyo' u caajil Dane' cu chúucpajal óox múuch' j xiibo'ob, le o'ox múuch'o', tu pa'ate'ile' ciento cincuenta yéetel siete mil seiscientos j xiibo'ob bíin u nu'up'o'ob u tzoolol tu paach u lacamo'ob.

³² Tu pa'ate'il u ch'i'ilancab le j israelitaob cu dzo'ocol u xo'ocol tu pa'ate'ile' tu dzaj seiscientos tres mil quinientos j xiibo'ob.

³³ Ba'ale' je'el bix tu tzol t'antaj Yuumtzil ti' Moisese', le levitaobo' ma' xo'oco'ob ichil le buca'aj xo'oco'.

³⁴ Le j israelitaobo' tu beetajo'ob tuláacal je'el bix Yuumtzil tu nu'uctilac ti' Moisese': tu jujun túulile' much'laj yáanal u lacam, yaan u xíimbalo'ob tu tzéel u cajtalil u yotochnáalo'ob yéetel u láaktzilo'ob.