Números 13 - Biblia Maya de Yucatán con DC 1992

Moisese' cu túuxtic máaco'ob u ti'al xakal ilic u lu'umil Canaán

¹ Yuumtzile' t'aanaj yéetel Moisés ca tu ya'alaj ti':

² Túuxt jun jaatz máaco'ob u ti'al xakal ilic u lu'umil Canaán, teen bíin in dzáa ti' le israelitaobo'. Ti' le yaan páajtalil ti'e' ch'a'a' jujun túul ti' u ch'i'ibalo'obe'.

³ Jach je'el bix tu ya'alajilac Yuumtzile', Moisese' tu túuxtaj ca xi'ico'ob líikbalo'ob tu x tocoy lu'umil Parán. Tuláacalo'obe' máaco'ob yaan ca'ach páajtalil ti'ob ichil le j israelitaobo'.

⁴ Leti' le máaxo'ob túuchi'ita'abo'ob ca'achi: ti' u ch'i'ibalo'ob Rubene', Samúa, u paal Zacur,

⁵ ti' u ch'i'ibalo'ob Simeone'; Safat, u paal Hori;

⁶ ti' u ch'i'ibalo'ob Judae', Caleb, u paal Jefone;

⁷ ti' u ch'i'ibalo'ob Isacare', Igal, u paal José;

⁸ ti' u ch'i'ibalo'ob Efraine', Oseas, u paal Nun;

⁹ ti' u Múuch' cajtalil u yotocháalo'ob Benjamine'; Paalti, u paal Rafú;

¹⁰ ti' u ch'i'ibalo'ob Zabulone'; Gadiel, u paal Sodi;

¹¹ ti' u ch'i'ibalo'ob Josee' (u káat ya'ale' u ch'i'ibalo'ob Manasés) Gadi, u paal Sisi;

¹² ti' u ch'i'ibalo'ob Dane', Amiel, u paal Gemali;

¹³ ti' u ch'i'ibalo'ob Asere', Setur, u paal Micael;

¹⁴ ti' u ch'i'ibalo'ob Neftalie', Nahbi, u paal Vapsi;

¹⁵ ti' u ch'i'ibalo'ob Gade', Geuel, u paal Maqui.

¹⁶ Lela' u kaaba'ob le máaco'ob túuxta'ab tumen Moisés u xakal ilic le lu'umo'. Oseas, u paal Nune', tu kexaj u kaaba' ca tu dzaj u kaaba'int Josué.

¹⁷ Moisés túune' tu túuxtaj u xakal ilo'ob u lu'umil Canaán, ca tu ya'alaj ti'ob: xeene'ex tu bejil Néguev, na'aquene'ex tu ca'anal pu'uquilo'ob.

¹⁸ Ile'ex bix le lu'umo', wa le máaco'ob caja'ano'ob te'elo' mu'uka'ano'ob wa ma', wa jun p'íito'ob wa ya'abo'ob.

¹⁹ Ile'ex wa u noj caajo'obe' beeta'an chéen yéetel chuybil nooko'ob, wa tuulum caajo'ob, wa le lu'um tu'ux caja'ano'obo' ma'alob, wa ma',

²⁰ Cu dzáic yich wa ma', wa yaan che'obi' wa mina'an. Ma' a ch'aique'ex sajaquil; taase'ex dze'edzec u yich le lu'umo'. Lela' j úuche' tu kiinil táan u t'o'ocol u yáax yich uva.

²¹ Le máaco'obo' j bino'ob u xakal ilo'ob le lu'umo' ca j chu'unpajo'ob tu j noojol u x tocoy lu'umil zin, tac Rehob, tu xamanil ti' u jool caajil Hamat.

²² J ooco'ob tu tojil Néguev ca j cóojo'ob tac Hebrón. Caja'ano'ob ca'ach te'elo' Ahimán, Sesai yéetel Talmai, u ch'i'ibalo'ob Anac. Hebrone', beeta'ab siete ja'ab táanil ti' Zoán le yaan Egiptoo'.

²³ Kucho'ob tac tu t'o'ol ja'il Escol, ca tu ch'acajo'ob jun p'éel u kab uva yaan ca'ach jun ch'úuy u yich, ca tu bisajo'ob cúuch queléemtbil tu bisilac ca'a túulo'ob yéetel jun p'éel che'. Bey xan tu molajo'ob granadaob yéetel higos.

²⁴ Ti' le ja' cu yáalcabo'ob tu dzajo'ob u kaabae' Escol. ti'olal le chúuch uva j ch'a'ac te'elo' tumen le j israelitaobo'.

²⁵ Cu dzo'ocol u máan cuarenta kiino'ob dzo'oc u xakal ilico'ob le lu'umo', j suunajo'ob

²⁶ Cades, tu x tocoy lu'umil Parán. Te'elo' ti' ca'ach yano'ob Moisés, Aarón yéetel tuláacal le j israelitaobo'. Ca tu tzicbaltajo'ob le ba'axo'ob kuch u yojéelto'ob yéetel ca tu ye'esajo'ob u yich le lu'umo'.

²⁷ Ca tu ya'alajo'ob ti' Moisés: j bino'on te j lu'um tu'ux ta túuxtajo'ono'. Tu jaajile' jun p'éel lu'um tu'ux cu yáalcab leche yéetel caab, bey ja'e' lela' leti' le ich cu dzáic le lu'umo'.

²⁸ Ba'ale' u cajnáalilo'obe' sen nuuctaco'ob, u noj caajilo'obe' nojocho'ob yéetel bakpach pakta'ano'ob. Bey xan j ilaj u yéet ki'ikel j wa'apáach' Anac.

²⁹ Tu lu'umilo'ob Négueve' ti' caja'ano'ob ca'ach le Amalecitaobo', lu'umil le pu'uco'obo' ti' caja'ano'ob le j hititaob, le jebuseob yéetel amorreob, tu tzéel ka'anab tu jáal Jordane' ti' caja'an le j cananeobo'.

³⁰ Caleb túune' tu beetaj u maquic u chi' le caaj ti'an ca'ach tu táan Moiseso' ca tu ya'alaj: ¡binelca'aje'ex túun c ch'a'ex le lu'umo'! ¡to'one' je'el u páajtal ch'aique'!

³¹ Ba'ale' le máaxo'ob j bino'ob yéetele' tu núucajo'ob: ¡Ma', ma' tu páajtal c ba'atel yéetel le máaco'obo'! leti'obe' asab mu'uka'ano'ob ti' to'one'ex,

³² ca jo'op' u ya'alico'ob ti' le israelitaobo' le lu'um tu'ux bino'ono' jach kaas. Cu ya'alico'ob: le lu'um j bino'on c xakalt ilo' cu quíimsico'ob u cajnáalilo'ob, yéetele' tuláacal le máaco'ob t ilaj te'elo' sen nuuctaco'ob.

³³ T ilaj xan le j wa'apáach' wíinic u láaktzilo'ob Anac, tu tzéelo'obe' beyo'on sáake', bey tu yilajico'on xan leti'ob.