Jonás 4 - Biblia Maya de Yucatán con DC 1992

Cu kuuxil Jonás

¹ J lúub kaas ti' Jonás ba'ax tu beetaj Ku, ca j seen j p'u'uji.

² Bey túuno' j payalchi'inaj ti' Yuumtzil, ca tu ya'alaj: Ile, Yuumtzil, jach je'el bix tin wa'alaj cu bin j úuchul le ti'anen ca'ach tin lu'ume'. Le t o'olale' tin wóoltaj púudzul tu séebanil tac Tarsis, tumen tene' in wojel teche' jun túulech Ku ca yaacunaj yéetel ca ch'a'ic óotzilil, ma' ta séeb p'u'ujul, tumen jach nojoch a yaacunaj quex ca dzáic u péectzilil jun p'éel jaadze', cu dzo'ocole' cu sutkajal a wóol.

³ Le t o'olale' Yuumtzil quin káat óoltic ti' teech ca lukes in cuxtal. Asab ma'alob ca quíimiquen ma' ca xi'ic u bin in cuxtali'.

⁴ Ba'ale' Yuumtzile' tu núucaj ti': ¿Ca tucultic wa ma'alob ca kuuxilnaquech beyo'?

⁵ Jonase' jóoke' ca j je'el tu lakin le caajo'; te'elo' tu beetaj jun p'éel máacan ca j culaj tu bo'oy, u ti'al u pa'atic u yilic ba'ax cu bin j úuchul ti' le caajo'.

⁶ Ku Yuumtzil túune' tu beetaj u jóokol jun cúul x ko'och tu yóokol Jonás, u bo'oy túune' cu pixic ca'ach u pool u ti'al ca u yu'ububáa ma'alob yanil. Jonase' jach qui'imacchaj u yóol tu yo'olal le x ko'ocho'.

⁷ Ba'ale', le ca j sáaschaj tu láak kiine' Kue' tu beetaj ca néet'a'ac tumen jun túul x nookol le x ko'ocho', ca j tiji'.

⁸ Le ca jóok kiine' Kue' tu beetaj u yustaj jun p'éel u choco yiikal j lakin, tu yo'olal le u juul le kiin táan u lúubul tu jo'ol Jonás ca'ache', ca tu yu'ubaj táan u lúubul u muuk, ca tu dzíiboltaj u quíimil. Asab ma'alob ca quíimiquen ma' ca xi'ix u bin in cuxtali' cu ya'alic ca'achi.

⁹ Ba'ale' ca j núucaj ti' tumen Ku: ¿Ma'alob wa ca kuuxilnaquech chéen tumen dzo'oc u tijil le x ko'ocho'? Jonase' tu núucaj: ¡Ma'alob istac in tuucul beyo'! ¡Jach p'uja'anen quin wu'uyiquinbáa!

¹⁰ Yuumtzil túune' tu ya'alaj ti': Ma' teech pak le x ko'ocho', mix teech beet xan u ch'íijili'; ti' jun p'éel áakabe' jóoki', ti' u láak áakabe' j quíimi. Ba'ale' teche' ca ch'a'ic óotzil ti'.

¹¹ Ba'ale' tene' yaan ba'ax o'olal u najmal in seen ch'aic óotzilil ti' Nínive, le noj caaj tu'ux yaan maanal ciento veinte mil mejen paalal mix ba'al u yojelo'ob, yéetel ya'abcach ba'alche'ob.