Jonás 3 - Biblia Maya de Yucatán con DC 1992

U cajnáalilo'ob Ninivee' cu kexpajal u tuuculo'ob

¹ Yuumtzile', tu t'anaj Jonás tu ca'a téne' ca tu ya'alaj ti':

² Xeen tu noj caajil Nínive ca a tze'ect le ba'ax bíin in wa'al ti' techa'.

^3-4 Jonase' jóok u binbal tu caajil Nínive, je'el bix a'ala'abic ti' tumen Yuumtzile'. Nínivee' jun p'éel noj caaj, jach nojoch ca'achi, u ti'al ca páatac u xíimbata'al tuláacale' kabéet ca'ach óox p'éel kiin. Jonase' j ooc te j caajo' ca j xíimbalnaj túulis jun p'éel kiin, táan u ka'amcach a'alic: ¡Ichil cuarenta kiino'obe' bíin xu'ulsa'ac Nínive!

⁵ U cajnáalilo'ob le noj caajo', nuxibo'ob yéetel mejen paalale', tu yocsaj u yóolto'ob ti' Ku, tu ka'aytajo'ob su'ukin ca tu búuquintajo'ob to'otoch nooko'ob u chíiculal ki'inamil.

⁶ Le ca j kuch le péectzilil ti' u ajawil Nínivee', leti' xane' j líik tu jalach káanche' ca tu lukesaj u búuquilo'ob ajaw, ca tu búuquintaj to'otoch nooko'ob ca j culaj lu'um.

⁷ Cu dzo'ocole' ajaw yéetel u aj meyjulo'obe' tu dzajo'ob u yojéelt tuláacal le caajo', le a'almaj t'aana': Mix máac u najmal u jaantic mixba'al. Mix xan u najmal u dza'abal janal mix ja' ti' wacaxo'ob mix ti' u múuch'ulo'ob j tamano'obo'.

⁸ Ba'ale' tuláacale'exe' búucbesaba'ex yéetel to'otoch nooko'ob u chíiculal ki'inamil, yéetel payalchi'inene'ex xan ti' Ku yéetel tuláacal a wóole'ex. Tu jujun túule' u p'at u kaakas cuxtal bey xan le meyaj loob suuc a beetique'ex tac bejela'o';

⁹ ma' xaan ca u kex u tuucul Kui', ca jáawac u p'uja'anil, beyo' ma' bíin quíimico'oni'.

¹⁰ Kue' tu yilaj ba'ax cu beetico'ob u cajnáalilo'ob Nínive yéetel bix tu p'áatilaco'ob u kaakas cuxtalo'ob, ca tu tucultaj ma' tu bin u beet le kaas tu ya'alaj ca'acho'.