Génesis 2 - Biblia Maya de Yucatán con DC 1992

¹ Le ca'an, le lu'um yéetel tuláacal ba'axo'ob yaan yóokolo'obe', dzo'ocbesa'an p'áatico'ob

² Cu dzo'ocol u beeta'al tuláacal ba'al tumen Kue', j kuch le uc p'éel kiino' ca tu je'elsaj u meyaj.

³ Ca tu qui'iqui' t'antaj le uc kiino', ca tu ya'alaj: Quili'ich kiin tumen ti' le kiin tu je'elsaj u meeyjul úuchic u beetic le yóokolcaabo'.

⁴ Lela' leti' u tzicbalil úuchic u beeta'al ca'an bey xan lu'um. Le ca tu beetaj Ku ca'an yéetel lu'um.

Ba'ax o'olal j dzaab Adan te j Edeno', yéetel bix beeta'abic x Eva u yatan

⁵ Mina'an ca'ach pakaltbil che'ob, mix tóop'oc ca'ach xíiwo'obi', tumen Ku Yuumtzile' ma'ili' u beet u káaxal ja' tu yóokol le lu'umo', mix máac xan yaan u ti'al meyajtic.

⁶ Quex beyo' cu tuul ja' ti' le lu'umo', leti' ca'ach jóoyabtic tuláacal le cúuchilo'.

⁷ Ku Yuumtzil túune' tu pataj wíinic yéetel lu'um, tu yustaj u ni' ca tu dzaj cuxtal ti'. Bey chúunic u cuxtal wíinico'.

⁸ Cu dzo'ocole' Ku Yuumtzile' tu nu'ucbesaj jun p'éel u cúuchil paakal tu lakin Eden, ca tu dzaj te'elo' le wíinic tu patajo'.

⁹ Tu beetaj xan u ch'íijil tuláacal u jejeláasil jadzutz che'ob cu dzáico'ob ich ma'alob u ti'al jaantbil. Te tu chúumuc u cúuchil paakalo' tu dzaj xan jun cúul u che'il cuxtal yéetel jun cúul u che'il u kaj óolalil utz bey xan u kaj óolalil kaas.

¹⁰ Te j Edeno' cu síijil ca'ach jun p'éel yooc áalcab ja', cu jóoyabtic le u cúuchil paakalo', te'elo' cu jatzicubáa can xa'ayil.

¹¹ Le yáax jun xa'aye' cu kaaba'intic Pisón, lela' leti' sut pachtic u lu'umil Havila, tu'ux yaan oro.

¹² U oroil le lu'umo' sen ma'alob, te'elo' yaan xan qui'iboc yiitz che'eobi' yéetel le jadzutz tuunich cu kaaba'intic ónice.

¹³ Le u ca'a xa'ay yooc áalcab ja'o' cu kaaba'intic Gihón, leti'e' cu sut pachtic tuláacal u lu'umil Cus.

¹⁴ Le u yóox xa'ay yooc áalcab ja'o' cu kaaba'intic tigris, lela' cu máan tu j lakin Asiria. Le u can xa'ay yooc áalcab ja'o' cu kaaba'intic Éufrates.

¹⁵ Ku Yuumtzile' tu dzaj le máac tu cúuchil paakal cu kaaba'intic Eden u ti'al u meyajt yéetel u ti'al u canante

¹⁶ tu ya'alaj ti' beya': Cu páajtal a jaantic u yich tuláacal u che'ilo'ob le cúuchila',

¹⁷ chéen ma' a jaantic u yich u che'il u kaj óolalil utz yéetel kaas. Tumen u kiinil bíin a jaante' manaltzail a quíimil.

¹⁸ Cu dzo'ocole' Ku Yuumtzile' tu ya'alaj: Ma' utz ca yanac chéen tu juun wíiniqui'. Bin in ca'aj in beet máax nu'uca'an u ti'al áantic.

^19-20 Ku Yuumtzile' tu beetaj yéetel lu'um tuláacal ba'alche' bey tuláacal ch'íich', ca tu bisaj ti' le wíinic u ti'al u dzáa u kaaba'ob. Le máaco' tu dzaj u kaaba' tuláacal alaktbil ba'alche'ob, ch'íich'o'ob bey ti' tuláacal u ba'alche'ilo'ob káax; le kaaba' tu dzaj ti'obo', le j p'áat ti'ob. Tu jaajile' mix jun túul nu'uca'anchaj u ti'al áantic wíiniqui'.

²¹ Ku Yuumtzile' tu beetaj túun u t'úubul ichil jun p'éel qui'iqui' wenel le máaco'; ca'aliquil táan u wenele' tu jóokesaj jun p'éel ti' u ch'ala'atelo'ob, cu dzo'ocole' tu nup'aj tu ca'a téen u bakel.

²² Ti' le u ch'ala'atelo' Ku Yuumtzile' tu beetaj jun túul co'olel, ca tu taasaj ti' le wíinico',

²³ leti'e', le ca tu yilaje' tu ya'alaj: ¡X lela' jach tu jaajile' u bakel in bakel, u baaquel xan in baaquelo'ob! x lela' yaan u t'a'anal x u muukint xiib tumen ti' j xiib jóokesa'abi.

²⁴ Let o'olale' j xiibe' yaan u p'atic u taata bey xan u maama, u ti'al u nupicubáa ti' u yatan, beyo' cu p'áatalo'ob jun túulilo'ob.

²⁵ Le j xiib bey xan le x ch'uupo' chacnuul yanilo'ob ca'achi, ba'ale' mix jun túul cu ch'a'ic subtal quex bey yanilo'obo'.