Éxodo 2 - Biblia Maya de Yucatán con DC 1992

Bix síijic Moisés

¹ Jun túul j xiib ti' u ch'i'ibalo'ob Levie', j dzo'oc u beel yéetel jun túul co'olel láili' ti' le ch'i'ibalo'obo',

² x yo'omchaje' ca j síij jun túul u yaal. Le ca tu yilaj qui'ichquelem le chan paalo', tu ta'acaj óox p'éel winalo'ob;

³ ba'ale' tu yo'olal ma' tu páajtal u ta'aquic u láak kiino'obe', tu ch'a'a jun p'éel xaac beeta'an yéetel jalale', ca tu tzutzaj tuláacal u yáamo'ob yéetel asfalto bey xan yéetel iitz, u ti'al ma' u yocol ja'i'; cu dzo'ocole' tu dzáa le chan paal ichil le xaaco' ca tu p'ataj ichil le jalalo'ob yaan tu jáal u yáalcab ja'il le Niloo';

⁴ tu ya'alaj xan ti' jun túul u quiic le chan paalo' ca p'áatac ma' sen náach ti' le cúuchilo', ca u yil ba'ax cun j úuchul yéetel le chan paalo'.

⁵ Cu dzo'ocole', u x ch'upul paal le faraono' j éem u ti'al ichquil te j áalcab ja'o', ca'aliquile' u x palitzilo'obe' táan u xíimbalcunscuba'ob tu jáal le ja'o', leti'e' tu yilaj le xaac ichil le jalalo'obo', ca túun tu túuxtaj jun túul ti' u x palitzilo'ob ca u taas ti'.

⁶ Le ca tu je'aj le xaaco' tu yilaj ti' yaan jun túul chan paal táan u yóokol ichil, u x ch'upul paal le faraono' tu ch'a'a óotzilil ti'e' ca tu ya'alaj: Lela' jun túul chan j hebreoil paal

⁷ U quiic le chan paalo' tu ya'alaj ti' u x ch'upul paal le faraono': ¿Ma'alob wa ca tuclic, ca in t'aan jun túul x dzáa chu'uch x hebreail u ti'al ca u tzéent le chan paala'?

⁸ Ca tu núucaj u x ch'upul paal faraón: Xeen a ch'a'e'. Le x ch'úupaal túuno' j bin u ch'a'a u maama le chan paalo';

⁹ ca túun j a'ala'ab ti' tumen u x ch'upul paal le faraono': Ch'a'a le chan paal u ti'al a tzéenta', tene' je'el in bo'otic a meyaje'. Le chan paalo' j bisa'ab tumen u maamae' ca j tzéenta'abi.

¹⁰ Cu nojochtale' ca tu kubaj ti' u x ch'upul paal le faraono', leti'e' tu ch'a'a u paalinte' ca tu dzáa Moisés u kaaba'int, tumen tu ya'alaj: Teen jóokes ich ja'

Moisese' j púudz ti' u noj caajil Egipto

¹¹ Le ca j táanquelemchaj Moisese', jun p'éel kiine' j jóok u xíimbalt u láaktzilo'ob u yéet ki'ikele', ca tu yilaj sen chichich meyaj cu beetico'ob. Tu téec ilaje' jun túul j egipcioe' táan u ko'okolic jun túul j hebreoil u yéet ki'ikel.

¹² Paacatnaj túun tu bak paach, le ca tu yilaj mix máac yaan te'elo', ca tu quíimsaj le j egipcio' ca tu mucaj ichil le sa'am lu'umo'.

¹³ Cu sáastal tu láak kiine' j jóok tu ca'a téene' ca tu yilaj ca'a túul hebreob táan u ba'atelo'ob. Ca túun tu káat chi'itaj ti' le máax loobiltic u láako': ¿Ba'ax teen ca jadzic jun túul máac láili' a wéet ki'ikele'?

¹⁴ Le j hebreo' tu núucaj ti': ¿Máax dzáech a beet a nojochil yéetel aj ilaj ba'atel ichilo'on? ¿Táan a tuucultic a quíimsiquen je'el bix ta quíimsajil le j egipcioe'? Moisese' le ca tu yu'ubaj lela', j sajacchaje' tumen tu na'ataj dzo'oc u yojéelta'al quíimic le j egipcio'.

¹⁵ Bey úuchico', le faraono' le ca tu yojéeltaj dzo'oc u quíimsa'al jun túul j egipcio tumen Moisese', tu túuxtaj caxantbil u ti'al u quíimse; ba'ale', Moisese' j púudze' ca j bin cajtal tu lu'umil Madián. Te'elo' j culaj naadz ti' jun p'éel ch'e'en.

¹⁶ Reuél u aj kiinil Madiane', yaan ca'ach siete u x ch'upul paalal. Ti' le kiinaco' leti'obe' j bino'ob u jóokeso'ob ja' te j ch'e'eno' u ti'al u chupico'ob u nu'uculo'ob u yukico'ob ja' le ba'alche'obo' yéetel u ti'al u dza'ob ja' u yuk u j tamano'ob u taataob,

¹⁷ ba'ale' j taal dze'edzec aj canan j tamano'obe' ca tu yáalcabansajo'ob le x ch'úupalal te'elo'. Moisés túune' j líik u toc le x ch'úupalalo'obo' ca tu dzáa ja' u yuk le j tamano'obo'.

¹⁸ Le ca j suunajo'ob le x ch'úupalal tu'ux yaan u taataobe', leti'e' tu káat chi'itaj x ti'ob: ¿Bix túun úuchic a séeb suute'ex bejela'e'?

¹⁹ Leti'obe' tu núucaajo'ob: Jun túul j egipcioe' tu tocajo'on ti' wa jay túul aj canan j tamano'ob, cu dzo'ocole' tu jóoksaj ja'e' ca tu dzáa u yuk le j tamano'obo'.

²⁰ Reuél túune' tu ya'alaj ti'ob: ¿Tu'ux yaan le máaco'? ¿Ba'ax teen ta p'ataje'ex tu juunal? ¡Xeene'ex a t'ane'ex ca taalac janal!

²¹ Bey túuno' Moisese' tu yóoltaj j p'áatal cajtal tu yotoch Reuél. Cu dzo'ocole' Reuele' tu dzáa u x ch'upul paal cu kaaba'intic Séfora ti' Moisés u ti'al u yatante.

²² Leti'e' yanji jun túul u yaal dza'ab u kaaba'int Gersón tumen Moisés, tumen tu ya'alaj: J táanxel lu'umilen ti' tu láak lu'um.

²³ Le ca j máan kiine', u ajawil Egiptoe' j quíimi. Ba'ale' le j israelitaobo' táan u mukyajtico'ob yéetel táan u yaj óoltico'ob palitzilta'anilo'ob. Ku túune' tu yu'ubaj u yóokol t'aano'ob,

²⁴ ca tu táan óoltajo'ob, ca j ka'aj ti' le nup t'aan u beetmaj yéetel Abraham, Isaac yéetel Jacob.

²⁵ Ila'abo'ob tumen Ku tu yojéeltaj xan bix yanilo'ob.