Ester 7 - Biblia Maya de Yucatán con DC 1992

Amane' cu xot kíinta'al u ti'al j quíimil

¹ Ajaw yéetel Amane' j bino'ob ti' le noj janalo',

² bey xan ti' le u ca'a p'éel kiina', ca'aliquil táan le janale' ajawe' tu ya'alaj ti' Ester: ¡Káat Je'el ba'alac ca woltique' je'el in dzáic ti' teche', tac wa ca káat u táan chúumuc in ajawil!

³ Estere' tu núucaj ti': Wa a tzicbe'enil u yaabiltmajen wa xan ma'alob a wilique', chéen ba'ax quin dzíiboltique' yéetel le quin káatic ti' a tzicbe'enil ca u sa'ats in cuxtal yéetel u cuxtal in caajal;

⁴ tumen u jaajile' in caajal je'el bix xan tene' dzo'oc c co'onol u ti'al ca láaj xu'ulsa'aco'on. Wa ca co'onocon bey palitzile' ma' tin wa'alic mix ba'al, tumen le aj p'eeco' ma' táan u beetic nojoch loob ti' ba'ax u ti'al a tzicbe'enil.

⁵ Asuero túune' tu káatchi'itaj: ¿Máaxi', tu'ux yaan le máax tu tuclaj u beetic jun p'éel ba'al beyo'?

⁶ ¡Le aj p'eec yéetel c éet ba'atele', leti' le j kasa'an máac j Amano'! Tu núucaj Ester. Le ca tu yu'ubaj Amán le t'aana' j p'áat totojqui tu táan ajaw yéetel tu táan x ajaw tu yo'olal u sajaquil.

⁷ Asueroe' j p'u'uje ca j líiki, ca tu xúumpataj le cúuchil tu'ux cu yúuchul le janalo', ca jóok tu táancabil u nicte'ilo'ob jalach naj. Ba'ale' Amane' tu na'ataj dzo'oc u tucla'al u quíimsa'al tumen ajaw, ca j p'áat te j cúuchilo' u ti'al u káat óolt ti' x ajaw Ester ca sa'atsac u cuxtal.

^8-9 Le ca j suunaj ajaw tac tu cúuchil u paakal nicte'obe', ca j ooc te j cúuchilo' ca tu yilaj Amán xolocbal tu tzéel u nu'ucul tu'ux chilicbal Ester, ca tu ya'alaj: ¿A káat xan a beet óolaj ti' x ajaw tin táan, ichil in wotoch? Tu séeblaquil ca j dzo'oc u t'aan ajawe', dze'edzec náacomo'ob máaxo'ob canantique' tu pixajo'ob u yich Amán. Jun túul ichilo'ob cu kaab'aintic Harbona tu ya'alaj: Tu yotoch Amane' máakanta'an jun p'éel u nu'ucul jich' caal veintidos métro'ob u ca'analil, leti'e' tu túuxtaj beetbil u ti'al Mardoqueo, le j xiib tu dzaj ma'alob péectzil ti' a tzicbe'enil. Ajawe' tu ya'alaj ch'uyquinta'ac túun te'elo'.

¹⁰ Bey túuno' Amane' ch'uyquinta'ab te tu nu'ucul jich' caal tu máakantaj u ti'al ca'ach u ji'ich'il u caal Mardoqueo. Yéetel lelo' jóom u yóol ajaw ti' u p'u'ujlil.