Daniel 7 - Biblia Maya de Yucatán con DC 1992

U náayil can túul nucuch ba'aba'alo'ob

¹ Jun p'éel áakabe', tu yáax ja'abil u ajawil Belsasar Babiloniae', yanji ti' Daniel jun p'éel wayak yéetel náayo'ob. P'elac aajique', ca tu dzíibtaj le noj ba'alo'ob tu wayaktaj ca'acho'. Je'el le ba'ax tu dzíibtaja':

² Tene' tin wilaj ichil in wayake' le can p'éel iiko'obo' táan u péecsico'ob u ja'ilo'ob le nojoch ka'anabo'.

³ Ca j téec jóok ichil le ka'anabo' can túul nucuch ba'aba'alo'ob, jejeláas tu baatzilo'ob.

⁴ Le yáax jun túulo' chica'an ti' jun túul león, ba'ale' yaan u xiiko'ob bey u xiik cóote'. Ca'aliquil táan in wilique', jo'oc u xiiko'ob, líiksa'ab lu'um ca j beeta'ab u wa'atal chéen tu yóokol u paachil yooco'ob, ca j toj wa'ala'ajo'ob bey jun túul wíinique', u dzo'omele' suunaj bey u dzo'omel jun túul wíinique'.

⁵ Le ca'a túulo' chica'an ti' jun túul oso, jun tzéele' asab ca'anal ti' u láak jun tzéel, yaan ca'ach óox p'éel u ch'ala'atelo'ob ichil u coj; ca tin wu'uyaj u ya'ala'al ti': ¡Xeen a jaant tuláacal le bak cu páajtale'!

⁶ Le u yóox túulo' chica'an ti' jun túul j chacmo'ol, ba'ale' yaan ca'ach can p'éel xiiko'ob tu paach; bey xan tin wilaj yaan ca'ach ti' can p'éel u poolo'ob táan ca'ach xan u ku'ubul páajtalil ti'.

⁷ Le u can túul ba'aba'alo' tin wilaj ichil in náayo'obe' táaj kaas, jakbe'entzil, táaj yaan u muuk. Nuuctac ca'ach u cojo'ob, fierro u ca'ajo'ob; tuláacal cu lukic yéetel cu x'e'exe'et'ic ca'achi, cu xanabcha'atic ca'ach u yalab. Le ba'aba'al ca'acha' jela'an ti' tuláacal nucuch ba'aba'al in wilmaj ichil in wayako', tu poole' yaan ca'ach diez u baaco'ob.

⁸ Ca'aliquil táan ca'ach in pactic le baaco'obo', tin wilaj ichilo'obe' táan ca'ach u jóokol jun p'éel baac asab chichan ti' u láako'obo', ca túun co'oc óox p'éel u baaco'ob u ti'al ca p'a'atac cúuchil ti' le jóok tu dzoocbalaco', leti'e' chan baaca' yaan ca'ach u yicho'ob bey u yicho'ob jun túul máaque', yaan ca'ach jun p'éel u chi' cu t'aan ca'ach yéetel nonoj báil.

U xot kiin Ku

⁹ Bin u bin in paacat, tac ca tin wilaj u dza'abal wa jay p'éel jalach káanche'ob, jun túul nuxib j culaji'. U búuc bey ye'eb ca'ache', u poole' bey ca'ach u sac tzo'otzel j taman p'o'ane'. Le jalach káanche' yéetel u peten che'ilo'obe' káak léedzbal u ca'ajo'ob,

¹⁰ jun p'éel u yáalcab káak u ca'aj cu jóokol ca'ach tu táan. Mil ca'a tac mil meyajtic, yéetel millono'ob ca'a tac millono'ob wa'alacbalo'ob tu táan. Le múuch' aj p'is óolo'obo' tu chu'unbesajo'ob u meyajo'ob, ca j chóola'ab le dzíibil ju'uno'obo'.

¹¹ Tene' táan ca'ach in paacat naayal in wóol, tu yo'olal u nonoj báil iquil u t'aan le chan baaco'; ca'aliquil táan ca'ach in paacate' quíimsa'ab le ba'aba'alo' ca j xe'exe'eta'abi', cu dzo'ocole' ca j pu'ul ichil káak u ti'al ca elec.

¹² Bey xan ti' le u chuucáan ba'aba'alo'obo' lukesa'ab u páajtalilo'ob, ba'ale' j cha'ab u bin u cuxtalo'ob tac quéen kuchuc u kiinil u xu'ulsa'alo'ob.

¹³ Tene' bin u ca'aj in wilic le náayo'ob ti' le áakabo'. Chéen ca j téec paacatnajene': Tin wilaj táan u taal ichil le múuyalo'obo' jun túul máac chica'an ti' u paal j xiib, leti'e' j bin tu'ux yaan ca'ach le j Nuxibo'; ca j beeta'ab u náadzal tu yicnal.

¹⁴ Ca j dza'ab u páajtalil, u nojbe'enil yéetel u ajawil, u cajnáalilo'ob tuláacal le lu'uma' yéetel u t'aano'obe' cu meyajtico'ob ca'achi. U páajtalile' ma' tun kexpajal, u ajawile' mix bikin bíin xu'ulsa'ac.

¹⁵ Teen Daniel, tin wu'uyaj táan in ch'a'ic sajaquil; tu yo'olal le ba'ax dzo'oc ca'ach in wilico' tin sen tucultaj,

¹⁶ náadzen ti' jun túul le wa'alacbalo'obo', ca tíin wa'alaj ti' ca u tzol ti' teen tuláacal le ba'alo'. Leti'e' tu éejemtaj, ca tu ya'alaj ti' teen:

¹⁷ Le can túul nucuch ba'aba'alo'obo' can túul ajawo'ob máaxo'ob bíin u t'onquinto'ob yóokolcaab.

¹⁸ Ba'ale' cu dzo'ocole' le ajawilo' bíin ku'ubuc ti' u caajal u Kuil ca'an, bíin u ti'alt ti' ja'abo'ob mina'an u xuul.

¹⁹ Tene' in káat in wojéelt ca'ach tu yo'olal le u can túul ba'aba'alo', le jach jela'an ti' le u láako'obo', tumen u chica'anile' táaj kaas: u cojo'obe' bey ca'ach hierroe' u yíich'aco'obe' bey broncee'; tuláacal ba'al cu lukik yéetel cu xe'exe'et'ic, u yalabe' cu pe'epe'echa'atic.

²⁰ Bey xan in káat in wojéelt tu yo'olal u diez baaco'ob, yéetel tu yo'olal le chan baac yaan u yicho'ob yéetel u chi' cu ya'alic ba'alo'ob yéetel nonoj báil, ta cu kuchul u yila'al bey asab nojoch ti' le u láak baaco'obo', yéetel óox p'éel baaco'ob dzo'oc ca'ach u lúubulo'ob u ti'al ca u p'ato'ob cúuchil ti'.

²¹ Ca túun tin wilaje' le baaca' táan u ba'atel yéetel u caajal Ku, ca xan tu pa'aj u muuk,

²² tac ca j kuch le nuxibo' ca tu beetaj ba'ax toj ti' u caajal u Kuil ca'an, tumen dzo'oc ca'ach u kuchul u kiinil u ti'al ca cha'abac tumen u caajal Ku le ajawilo'.

²³ Ca tu ya'alaj: Le u can túul ba'aba'alo', can p'éel ajawil bíin anac yóokolcaab, jela'an ti' tuláacal le u chuucáano'obo. Bíin u luk tuláacal le lu'umo', bíin u pe'epe'eccha'at, bíin xan u xe'exe'et'e'.

²⁴ Le diez baaco'obo' diez ajawo'ob bíin ajawnaco'ob te ajawilo'. Cu dzo'ocol leti'obe' bíin u na'acac u láak ti' le jalach káanche'o', jach jela'an ti' le yáaxo'obo', leti'e' bíin u pitkes tu káanche'ob óox túul ti' le ajawo'obo'.

²⁵ Bíin u poch' le u Kuil ca'ano' jujun p'íitil bíin u xu'uls u caajal; bíin u dzáajubáa u kex u ya'almaj t'aan Ku yéetel u ch'en le quili'ich kiinbesajo'obo', u caajal Kue' bíin ti'anac yáanal u páajtalile' ichil óox ca'a tac táancoch ja'abo'ob.

²⁶ Ba'ale' u múuch'ul aj p'is óolo'obe' bíin u beeto'ob jun p'éel p'is óol, bíin u jáanpayta'ac le páajtalilo', bíin p'a'atac láaj xu'ulsa'an.

²⁷ U ajawil, u páajtalil yéetel u nojbe'enil yéetel tuláacal u ajawilo'ob le lu'uma', bíin dza'abaco'ob ti' u Kuil ca'an. U ajawile' bíin p'áatac u ti'al ja'abo'ob mina'an u xuul, tuláacal u caajilo'ob le lu'uma' bíin u meyajto'ob bíin xan u dzo'ocbeso'ob u t'aan.

²⁸ Lela' leti' u xuul le tzicbala'. Teen Daniel, j p'áaten jach t'uubulen j tuucul ca j sacpile'enchajen; ba'ale' ma' tin wa'alaj mix ba'al ti' mix máac le ba'ax tin wayaktajo'.