Daniel 5 - Biblia Maya de Yucatán con DC 1992

Jun p'éel kab cu dzíib ti' pak

¹ Belsasar u ajawil Babiloniae', tu t'anaj u ti'al jun p'éel noj janal mil u túul u nucuch máaquilo'ob le múuch' caajo'obo'; ca'aliquil táan u yúuchul le janalo', ajaw yéetel le máaxo'ob tu t'anajo' tu yukajo'ob ya'ab vino'.

^2-3 Ichil u chocochaja'anil tu yo'olal le vinoo', ajaw Belsasare' tu túuxtaj taasbil u nu'uculo'ob ukul yéetel nucuch laco'ob beeta'ano'ob yéetel oro bey xan yéetel plata le jóoksa'abo'ob tu kulnajil Jerusalén tumen Nabucodonosor u taata, le u nu'ucul ukul yéetel le laco'ob tu ch'a'aj ti' le kulnaj yaan ca'ach Jerusalene'. Le u nu'uculo'ob ukul yéetel le laco'obo' j taasa'abo'obe' ca j ukulnajo'ob ti'ob; ajaw, u yatano'ob, u x keechob yéetel tuláacal u chuca'an máaco'ob yano'ob ti' le noj janalo'.

⁴ Tuláacalo'ob táan ca'ach u yukico'ob vino, táan ca'ach xan u qui'iqui' t'antico'ob u kuob, beeta'ano'ob yéetel oro, plata, bronce, fierro, che' bey xan yéetel tuunich.

⁵ Ti' le súutuco' j chíicpaj ti' u sáasil le x ch'uyub sáasilo'obo' jun p'éel u kab wíinic, ca jo'op' u dzíib yéetel u yaal u kab tu yóokol u sac pakil le noj najo'. Le ca tu yilaj ajaw le kab cu dzíibo',

⁶ sacpile'enchaji', tu yo'olal le sajaquilil ooc ti'o', jo'op' u quiquilanquil u wíinclil.

⁷ Cu dzo'ocole' ca jo'op' u yawat yéetel u t'anic le j chuchuc na'ato'ob, aj na'ato'ob yéetel máaxo'ob cu xoquico'ob eeko'ob j Babilonialo'ob, ca tu ya'alaj ti'ob: Le máax bíin xoquic le ba'ax dzíibta'ano', yéetel ca u tzol ti' teen ba'ax u káat u ya'ale', bíin búucbesa'ac yéetel co'ocoj chachac nooko'ob, yaan u bisic tu caal jun p'éel jokenjook oro u ca'aj, yaan xan u cutal tu yóox cúuchil in ajawil.

⁸ Tuláacal le j na'ato'ob yano'ob tu meeyjul ajawe' j ooco'ob te j noj najo', ba'ale' mix máac páatchaj u na'atic ba'ax u káat u ya'al le dzíibo', mix u tzolico'ob ti' ajaw.

⁹ Ca túun j ooc sen ya'ab sajaquil ti' ajaw Belsasare', ca j p'áat u táan yiche' láaj sacpile'en. Le nucuch máaco'ob u méektáane' ma' tu yojéeltajo'ob ba'ax je'el u páajtal u beetico'obe',

¹⁰ ba'ale' x maama ajawe', le ca tu yu'ubaj u yawat ajaw u paale', yéetel u yawato'ob le nucuch máaco'ob t'ana'ano'ob ca'acho', j ooc te tu'ux cu yúuchul le nojoch janalo' ca tu ya'alaj: ¡Ca cuxlac a Tzicbe'enil mantadz! Ma' a tucultic mix a sacpile'enchajal,

¹¹ tumen ta ajawile' yaan jun túul máac, yaan u pixan quili'ich Ku ti'. U taata a Tzicbe'enil le ca tu beetaj u ajawile', le máaco' tu ye'esaj yaan ti' leti'e' jun p'éel sáasil tuucul, na'at yéetel ojéelajil je'el bix le yaan ti'ob le kuobo'. Le t o'olale' ajaw Nabucodonosor, u taata a Tzicbe'enile', tu dzaj ti' le máaco' u beet u nojchil tuláacal le aj meeno'ob, le j chuchuc na'ato'ob yéetel le máaxo'ob cu xoquico'ob eeko'ob, caja'ano'ob ti' le múuch' caajo'oba',

¹² bey tumen Daniel, le máax dzaab kaaba'int Beltsasar tumen ajawe', yaan ca'ach ti' jun p'éel pixan mina'an u láaj queetile', bey xan kaj óolal yéetel na'at u ti'al u ch'a'a nu'uctic ba'ax u káat ya'al le mucul t'aano'obo' yéetel bix je'el u páajtal u béeytal wíinic yéetel le ba'alo'ob talamtaco'obo'. T'a'anac Daniel tumen a Tzicbe'enil, leti' túune' cu bin u dzáa a wojéelt ba'ax u káat u ya'al le ba'ax dzíibta'an te j pako'.

¹³ Ca j bisa'ab Daniel tu táan ajaw, ajaw túune' tu káat chi'itaj ti': ¿Teech wa Daniel, jun túul ti' le j judíob j mo'ol taasbilo'ob tumen in taata ajaw Nabucodonosore'?

¹⁴ Dzo'oc u ya'ala'al ti' tene' u pixan Kue' ti' yaan ti' teche', yaan bin ti' teech jun p'éel sáasil tuucul, jach yaan a wojéelaj bey xan a na'at.

¹⁵ Wa beyo' jach ma'alob, u asab aj na'at wíiniquilo'ob le múuch' caajo'oba' dzo'oc u yantalo'ob waye' u ti'al u xoco'ob le t'aano'obo', yéetel u ti'al u tzolico'ob ti' teen ba'ax u káat u ya'ale', ba'ale' ma' páatchaj u na'atico'obi'.

¹⁶ Ba'ale' dzo'oc in wu'uyic u ya'ala'ale' teech bine' je'el u páajtal a ca'anbesic ba'ax ma' ojéela'ane' yéetel cu páajtal u béeytal yéetel ba'alo'ob talamtac. Wa teech cu páajtal a xoquic le t'aano'oba', yéetel ca wa'alic ti' teen ba'ax u káat u ya'ale', quin beetic a búucbesa'al yéetel co'ocoj chac nooko'ob, ca dza'abac jun p'éel jokenjook oro ta caal yéetel ca culaquech tu yóox p'éel cúuchil u méektáanil in ajawil.

¹⁷ Daniel túune' tu núucaj: P'áatac a Tzicbe'enil yéetel u siibalo'ob, yéetel dzáa ti' u láak máac u tziiquil u yantal ta jalach najil. Je'el bixaque' tene' yaan in tzolic ti' a Tzicbe'enil ba'ax u káat u ya'al le t'aano'ob dzíibta'ano'ob ti' le pako'.

¹⁸ Le u Kuil ca'ano' tu dzaj a ajawil, tac xan nojochil, nojbe'enil yéetel tziiquil ti' Nabucodonosor u taata a Tzicbe'enil.

¹⁹ Tu yo'olal le páajtal tu dzaj ti'o', u wíiniquilo'ob tuláacal le caajo'ob, múuch' caajo'ob yéetel u jejeláas t'aano'obe' cu tziquico'ob yéetel cu quiquilanquilo'ob tu táan. Leti' ca'ache' cu quíimsic wa cu p'atic cuxa'an le máax u káate'; dze'edzeque' cu noj ba'alcuntic u láako'obe' cu pajic u subtalo'ob.

²⁰ Ba'ale' le ca'aj chu'up yéetel u nonojbáile, le ca tu beetaj ba'alo'ob yéetel ca'anal ichile', lukesa'ab u páajtalil bey xan u nojbe'enil le yaan ti', táan ca'ach u beetic u ajawile'.

²¹ J tze'el ichil le máaco'obo' ca j su'ut bey jun túul ba'alche'; cajlaj yéetel káaxil burro'ob, tu jaantaj xíiw je'el bix wacaxo'ob, le p'uulja'o' tu ch'ulaj u wíinclil, tac ca tu kaj óoltaj chéen ti' u Kuil ca'an yaan u páajtalil yóokol tuláacal u ajawilo'ob wíinico'ob, leti' xan cu dzáic u méektáan ti' le máax u káate'.

²² Bejela'e' a Tzicbe'enil Belsasar, u paal le wíinic, yéetel u yojel le ba'ax úucho', mix xan cuxlaj ichil cabal óolali'.

²³ Ba'ale' a Tzicbe'enile' dzo'oc u mixba'alcuntic u Kuil ca'an iquil tu túuxtaj taasbil te j mayacche'a' u nu'ucul ukul yéetel u nucuch laquilo'ob kulnaj, pa'ate' yéetel le máaxo'ob ta t'anajo'obo', ta wukaje'ex vino ichilo'ob ca ta dzaj qui'iqui' t'aano'ob ti' kuob beeta'ano'ob yéetel oroo', plata, bronce, fierro, che' yéetel tuunich; kuob ma' tu paacato'ob mix tu yu'ubajo'ob mix u yojelo'ob mix ba'ali'. Ba'ale' ma' ta qui'iqui' t'antaj Ku, le máax tu kab yaan u cuxtal a Tzicbe'enil yéetel ti' máax cu taal tuláacal ba'ax bíin u beete'.

²⁴ Le t o'olale' tu túuxtaj le kab u ti'al u dzíibt le t'aano'oba',

²⁵ MENE, MENE, TEKEL, yéetel PARSIN,

²⁶ lelo'oba' u káat u ya'alo'obe': MENE: Kue' dzo'oc u p'isic u kiinilo'ob u ajawil a Tzicbe'enil, yéetel dzo'oc u dzáic u chíiculal u xuul;

²⁷ TEKEL: u ajawil a Tzicbe'enile' dzo'oc u p'i'isil ti' x ch'uyub p'i'ise', jach jun p'it u aalil;

²⁸ PARSIN: u ajawil a Tzicbe'enile' dzo'oc u bu'ujul, bíin ku'ubuc xan ti' medo'ob yéetel ti' persaob.

²⁹ Ajaw Belsasare' tu séeblaquil tu ya'alaj ca búucbesa'ac Daniel yéetel co'ocoj chac nooko'ob ca dza'abac tu caale' jun p'éel jokenjook oro u ca'aj, ca tu dzáa xan u yojéelt ti' tuláacal, líikbal ti' le súutuco' Daniele' yaan u cutal ti' u yóox p'éel cúuchil u méektáant u ajawil.

³⁰ Jach ti' le áakabo' quíimsa'ab Belsasar, u ajawil le j caldeobo',

³¹ Darío le j mediaile' tu ch'a'aj le ajawilo'. Yaan ca'ach ti' Daríoe' sesenta yéetel ca'a p'éel ja'abo'ob.