Daniel 2 - Biblia Maya de Yucatán con DC 1992

Ba'ax tu wayaktaj ajaw Nabucodonosor

¹ Ti' u kiinilo'ob u ca'a p'éel ja'abil u ajawil Nabucodonosore', yanchaj wa jay p'éel wayako'ob ti', tu yo'olal u sen tucultique' ma' tu páajtal mix u wenel.

² Ca túun tu túuxtaj t'anbil aj meeno'ob, aj chuchuc na'ato'ob, pulya'ajo'ob yéetel aj ojéelajo'ob, u ti'al ca u tzolo'ob ba'ax u káat u ya'al le wayako'obo'. Leti'obe' j kucho'obe' ca j bino'ob tu táan ajaw,

³ ajawe' tu ya'alaj ti'ob: Yanchaj ti' teen jun p'éel náay, ch'iiquilen in tucult ba'ax cu taasic.

⁴ Le aj na'ato'obo' tu ya'alajo'ob ti' ajaw: ¡Ca cuxlac a tzicbe'enil u ti'al ja'abo'ob mina'an u xuul! U tzicbalt a tzicbe'enil ti' le aj meeyjulo'oba' le ba'ax tu wayaktajo', to'on túune' c tzolic ti' teech ba'ax u káat u ya'ale'.

⁵ Ajawe' tu núucaj: jun p'éelili' ba'ax quin bin in wa'al ti' te'ex: Wa ma' ta wa'alique'ex ti' teen ba'ax le tin wayaktajo' yéetel xan ba'ax u káat ya'ale', bíin xe'exe'et'a'aque'ex, a wotoche'exe' bíin su'utuco'ob chéen jun tucub jeenel pako'ob.

⁶ Ba'ale' wa ca wa'alique'ex ti' teen ba'ax tin wayaktaj yéetel ba'ax u káat u ya'ale', bíin in dzáa ti' te'ex siibalo'ob, utzilo'ob yéetel nucuch tziico'ob. Bey túuno', a'ale'ex ti' teen ba'ax tin wayaktaj yéetel tzole'ex ti' teen ba'ax u káat u ya'ale'.

⁷ Le aj na'ato'obo' tu ca'a a'alajo'ob: Tzicbalt ti' to'on a tzicbe'enil le ba'ax ta wayaktajo', to'on xane' c tzolic ti' teech ba'ax u káat u ya'ale'.

⁸ Ajawe' tu núucaj Jach in wojel: te'exe' chéen a káate'ex ca máanac kiin, tumen dzo'oc a wu'uyique'ex ba'ax bíin in beete.

⁹ Le t o'olale', wa ma' ta wa'alique'ex ba'ax le tin wayaktajo', tuláacale'ex ca bin a mukyajte'ex jun p'éelili' xot kiin, tumen dzo'oc a múuch' tucultique'ex jun p'éelili' ba'al u ti'al a núuquique'ex chéen tuuso'ob yéetel ba'alo'ob ma' jaajtaco'obi', ca'aliquil u kexpajal bix yanil le ba'alo'oba'. A'ale'ex túun le wayako', je'el in wojéeltic jaaj le ba'ax ca bin a wa'ale'exo'.

¹⁰ Ca tu núucaj le aj na'ato'obo': Mina'an mix máac yóokolcaab cu páajtal u ya'alic ti' a tzicbe'enile' le ba'ax a káat a wojéelto'. U láak ba'ale', mix jun túul ajaw quex sen nojoch u páajtalil yéetel u mu'uka'anile' u káatmaj ti' jun túul j men wa ti' jun túul aj na'at jun p'éel ba'al beyo'.

¹¹ Le ba'ax cu káatic a Tzicbe'enile' sen talam, mina'an mix máac je'el u páajtal u ya'alique', ja'ali' le kuobo'; ¡ba'ale' leti'obe' ma' cajacbalo'ob ichil wíinico'obi'!

¹² Le ca tu yu'ubaj ajaw le t'aana' sen p'u'uji' ca tu ya'alaj ca quíimsa'ac tuláacal u aj na'atilo'ob Babilonia.

¹³ Le ca'aj dzo'oc u ka'ayta'al le péectzila', caxta'ab xan Daniel yéetel u yéet najilo'ob, u ti'al ca quíimsa'aco'ob xan.

Daniele' cu ya'alic ba'ax u káat u ya'al u wayac ajaw

¹⁴ Daniel túune' j mucul t'aanaj yéetel Arioc, u nojchil le aj canano'obo', máax nu'uctic ca'ach u quíimsa'al le aj na'ato'obo'.

¹⁵ Ca tu káat chi'itaj ti': ¿Ba'ax o'olal jach séeba'an u dzo'ocbesa'al u t'aan ajaw? Arioque' ca tu tzolaj ti' Daniel ba'ax o'olal.

¹⁶ Daniele' ca j bin u yil ajaw ca tu káat óoltaj ti'e' ca dza'abac wa jay p'éel kiino'ob, u ti'al ca páatac u tzolic ti' ajaw ba'ax le tu wayaktajo' yéetel ba'ax u káat u ya'ale.

¹⁷ Cu dzo'ocole' ca j bin tu yotoche' ca tu dzaj u yojéelt tuláacal ti' Ananías, Misael, yéetel Azarías, u yéet najilo'ob,

¹⁸ u ti'al ca u káato'ob áantaj ti' u Kuil ca'an tu yo'olal le mucul ba'ala', u ti'al ma' u quíimsa'alo'ob pa'ate' yéetel le u chuca'an u aj na'atilo'ob Babilonia.

¹⁹ Ti' le áakabo' le mucul ba'alo' chíicbesa'ab ti' Daniel ichil jun p'éel náay, le o'olale' Daniele' tu qui'iqui' t'antaj u Kuil ca'an

²⁰ yéetel le t'aano'oba': Qui'iqui' t'anta'ac u ti'al ja'abo'ob mina'an u xuul u kaaba' Ku, tumen u ti'al le ojéelajilo' bey xan le páajtalilo'.

²¹ Leti' kexic le kiino'ob bey xan le ja'abilo'obo'; cu lukesic yéetel cu dzáic ajawo'ob, cu dzáic ojéelaj ti' aj ojéelajo'ob yéetel na'at ti' aj meatzo'obo'.

²² Leti'e' cu dzáic ojéeltbil le talam ba'alo'ob, yéetel mucla'ano'obo'; u kaj óol ba'ax yaan ichil éekjoch'e'enil, tumen le sáasilo' ti' yaan tu yéetele'.

²³ Ti' teech u Ku in taataob quin dzáic nib óolal yéetel quin qui'iqui' t'antiquech, tumen ta dzaj ti' teen ojéelajil yéetel muuk; bejela'e' dzo'oc a beetic in wojéeltic le ba'ax t káataj ti' techo': dzo'oc a beetic c kaj óoltic le ba'ax cu sen tucultic ca'ach ajaw.

²⁴ Cu dzo'ocol lela', Daniele' j bin u yil Arioc, ti' le máax a'ala'ab tumen ajaw ca u quíims u aj na'atilo'ob Babilonia, ca tu ya'alaj ti': Ma' a quíimsic le aj na'ato'obo'. Bisen tu táan ajaw, teen quin in tzol ti' tuláacal ba'ax tu wayaktajo'.

²⁵ Tu séeblaquil Arioque' tu bisaj Daniel tu táan ajaw Nabucodonosor, ca tu ya'alaj ti' ajaw: Ichil le judíob taasa'ano'obo' dzo'oc in nuptáantic jun túul máac cu bin u tzol ti' a Tzicbe'enil le ba'ax u káat u ya'al le wayako'.

²⁶ Ajaw túune' tu ya'alaj ti' Daniel, le máax cu kaaba'intic ca'ach Beltsasar; ¿Teche' je'el wa u páajtal a wa'alic ti' teen le ba'ax tin wayaktajo' yéetel ba'ax u káat u ya'ale'?

²⁷ Daniele' tu núucaj: Mina'an mix jun túul aj ojéelaj, mix aj na'at, mix meen, mix jun túul aj xoc eek, ca páatac u tzolic Ti' a Tzicbe'enil le ba'ax muculta'an a káat a wojéelto'.

²⁸ Ba'ale' yaan jun túul Ku j ca'an cu dzáic ojéetbil ba'axo'ob mucla'anta'aco'ob, leti'e' dzo'oc u beetic u yojéeltic a Tzicbe'enil le ba'ax bíin úuchuc ti' le kiino'ob bíin talaco'obo'. Bíin in caaj in tzol ti' a Tzicbe'enil le wayak yéetel le náayo'ob yanji' ca'aliquil táan a wenelo':

²⁹ A Tzicbe'enile', ca'aliquil ti' chilicbalech tu táasche'il u wenele', ca jo'op' a tucultic ba'ax cu bin j úuchul ti' le kiino'ob bíin talaco', le máax dzáic ojéeltbil le ba'axo'ob mucla'ano'obo' dzo'oc u dzáic a wojéelte'.

³⁰ Ti' teen xane' dzo'oc u dza'abal in wojéelt le ba'ax muculta'ano', ba'ale' ma' tumen wa asab aj ojéelajen ti' tuláacal wíinico'obi', ba'ale' u ti'al ca in tzol ti' a Tzicbe'enil le ba'ax u káat u ya'al le wayako', yéetel u ti'al ca u kaj óolt a Tzicbe'enil le ba'axo'ob tu tucultajo'.

³¹ Ichil u wayak a Tzicbe'enile' ta wilaj u líiksa'al ta táan jun p'éel ba'al bey u yoochel jun túul máac sen nojoch yéetel táan u léenbale', sajbe'en u yila'al.

³² U poole' láaj ma'alob oro u ca'aj; u tzeem yéetel u kabo'obe' plata u ca'ajo'ob; u nak yéetel u muuk yooco'obe' bronce' u ca'ajo'ob;

³³ u p'úul yooco'obe' hierro' u ca'ajo'ob; jun jaatz u yooco'obe' fierro, u láake' kat u ca'ajo'ob.

³⁴ Ca'aliquil táan u pactic a Tzicbe'enile', ti' jun p'éel pu'uque' j pitkaj jun p'éel tuunich ma' kabéetchaj u léench'inta'al tumen mix máaqui', ca j taal u kolubáa tu yooco'ob le oochelo' ca tu xiixcuntaj.

³⁵ Ti' jun súutuquile', le hierroo' le kato', le bronceo' le platao' yéetel le oroo' suunajo'ob tuláacal láaj ma'aychajo'ob, je'el bix u ma'ay trigo cu yila'al ti' yáax kiin le quéen p'u'uchuco' cu bisa'al tumen iik ma' tu p'atic mix u biilimil. Ba'ale' le tuunich tu kolajubáa ti' le oochelo' suunaj jun p'éel nojoch pu'uquil ca tu chupaj tuláacal le lu'umo'.

³⁶ Leti' le wayaka'. Bejela'e' bin in ca'aj in tzol ti' a Tzicbe'enil le ba'ax u káat u ya'ale'.

³⁷ A Tzicbe'enile' u asab nojochil ti' tuláacal le ajawo'obo', tumen u Kuil ca'ane' tu dzaj ti' teech le ajawila', le páajtalilo', le muukilo', le tziiquilo',

³⁸ yéetel u páajtalil tu yóokol tuláacal le cúuchilo'ob cajcunta'an tumen wíinico'ob, ba'alche'ob yéetel ch'íich'o'ob; leti'e' tu dzaj tuláacal tu yáanal u páajtalil a Tzicbe'enil, le pool oro u ca'ajo', lelo' teech.

³⁹ Cu dzo'ocol u máan u ajawil a Tzicbe'enile' bíin yanac u láak ajawil asab chichan ti' le a ti'alo', cu dzo'ocole' cu yantal u yóox p'éel ajawil bronce u ca'aj, lela' bíin u t'onquint tuláacal le lu'uma'.

⁴⁰ Cu dzo'ocole' bíin talac u can p'éel ajawil mu'uka'an je'el bix hierroe'; je'el bix le fierro cu xe'exe'et'ic tuláacal ba'al yéetel cu xu'ulsajo', bey xan le ajawilo' bíin u xiixcunt, bíin xan u xu'uls tuláacal le u láak ajawilo'obo'.

⁴¹ A Tzicbe'enile' tu yilaj xane' jun jaatz u yooco'ob yéetel u yaal u yooco'obe' beeta'an yéetel kat, le u láak jun jaatzo' fierro beeta'anil; lela' u káat u ya'ale' jun p'éel ajawil bíin ja'atzac, quex yaan dze'edzec u muuk bey hierroe', tumen a Tzicbe'enile' tu yilaje' le hierroo' xa'aka'an yéetel kat.

⁴² U yaalo'ob u yooco'obe' jun jaatze' fierro u ca'aj, u láak jun jaatze' kat beeta'anil, lela' u káat u ya'ale' le ajawilo' jun jaatze' mu'uka'an u láak jun jaatze' luba'an u muuk tu pa'ate'il.

⁴³ Je'el bix úuchic u yilic a Tzicbe'enil xa'aka'an le fierro yéetel le kato', bey xan u méektáano'ob le ajawila' yaan u nupicuba'ob yéetel u t'aanil dzo'ocol beel; ba'ale' ma' bíin páatac u jun p'éeltalo'ob tu baatzilo'obi', je'el bix ma' tu páajtal u jun p'éelili'ital le hierroo' yéetel le kato'.

⁴⁴ Tu kiinilo'ob u méektáano'ob le ajawo'obo', u Ku ca'ane' bíin u líikes jun p'éel ajawil mix bikin bíin xu'ulsa'aqui', bíin p'áatac u ti'al mina'an u xuul, mix bíin t'onquinta'ac tumen mix jun p'éel múuch' caaj, ba'ale' yaan u xu'ulsic jun puli' tuláacal le u láak ajawilo'obo'.

⁴⁵ Le u káat u ya'al le tuunich tu yilaj a Tzicbe'enil u lúubul ti' le pu'uco', quex tumen mix máac léench'inte; le tuunich suunaj ma'ay lu'umil, le hierroo', le kato' le platao' yéetel le oroo'. Le nojoch Ku dzo'oc u ye'esic ti' a Tzicbe'enil ba'ax bíin úuchuc ti' le kiino'ob bíin talaco'obo'. Le wayako' jach u jaajil, le ba'ax u káat u ya'alo' yaan u béeytal.

⁴⁶ Ajaw Nabucodonosor túune' xolaj tu táan Daniel ca j noclaj lu'um, ca tu beetaj u ku'ubul quíimsbil ba'alche' yéetel poom.

⁴⁷ Cu dzo'ocole' tu ya'alaj ti' Daniel: Jach tu jaajile' a Kuexe' asab nojoch ti' tuláacal kuob; le ti'e' u Yuumtzil ajawo'ob yéetel cu ye'esic le ba'alo'ob talamtaco'ob; teech túune' dzo'oc u páajtal a wilic le ba'ax muculta'ano'.

⁴⁸ Cu dzo'ocole' ajawe' tu dzaj Daniel ti' jun p'éel nojoch cúuchil ca tu dzaj xan co'ocoj siibalo'ob ti'; tu yóokol lelo' tu dzaj u méektáant u táabal lu'umil Babilonia yéetel xan u noj aj ojéelaj tuláacal u aj na'atilo'ob le lu'umo'.

⁴⁹ Tu yo'olal tu káatjilac Daniele', ajawe' tu dzaj ti'ob Sadrac, ti' Mesac yéetel ti' Abed-nego nucuch meyajo'ob ti' ba'alilo'ob u táabal lu'umil Babilonia. Daniele' j p'áat tu jalach naj ajaw.