RYUREITUHPAZY 6 - Mara Bible RV (BSI)

Midia mo ta Izarei sawzy ama tlybai

¹ Izarei sawzy cha Abeipa mohmô ta moleina hmo tao heih ei ta. Chavâta Abeipa ta âmo cha Midia mo ku liata kô sari paysa ta.

² Midia cha Izarei hlâta a thatlô via ta, Midia vâna chata Izarei sawzy cha tlâh liata khaohtlôzy, lôpuzy nata thokhyzy a tao ei ta.

³ Izarei ta chi a chei daihti maihta, Midia mo, Amale mo nata nochhi sawzy a vy ei ta, Izarei sawzy cha a dyuh tyh ei ta.

⁴ Ama kiapâh liata riehmo paryh ei ta, ama kôveizy cha Kâza taihta ama paraopa khai ha tyh. Izarei liata niedo rai pahlôh leipa ei ta, mietaku, viahchao nata alâ zy taihta ama lapa khai ha tyh.

⁵ Ama sahroh nata poh ozy chhaota vaw thyu tyh ei ta, khawsu tlu ta hluhpa ta vaw thyu ei ta, a chyhsa maluh nata ama râraoseihpazy cha rei tiah awpa chhao châ veih ei. A vy ei ta, râh cha roryhrapa ta ama so tyh.

⁶ Midia vâta Izarei cha riethei sipasa ngaitapa ta y ta. Chatawhcha Izarei sawzy ta Abeipa pado ei ta.

⁷ Izarei sawzy ta Midia mo vâta Abeipa ama pado nahta,

⁸ Abeipa ta Izarei sawzy hnohta hrohsopa vaw tuah ta. Hrohsopa chata ama hnohta, “Abeipa Izarei Khazohpa ta hetana heta a tah: Izi râh tawhta châ chhi papua ei na ta, seichâna o tawhta ei châ chhi papua ei.

⁹ Izi mo ku tawhta nata nâmo châ tlybaipa zydua ku tawhta cha pachha ei na ta, nama hmiakô tawhta âmo cha papua na ta, ama râh ei cha pie ei.

¹⁰ Nama hnohta, ‘Kei he Abeipa nama Khazohpa ei châ. Ama râh nama pahrâpa liata Amawri mo khazohzy nama chi awpa châ vei,’ cha tah ei na ta. Châhrasala ei ao nathlie veih ei chi,” tah ta.

Kidia Awna

¹¹ Chatawhcha Abeipa vâlyuhchâpa a vy ta, Ôpharâ khih liata ôkâ tho ry liata a tyuh ta. Cha ôkâ tho cha Abieze chi Zôasâ eih a châ. A sawchapawpa Kidia cha Midia mo ta ama hmô lei nawpa ta, kre saohna khaoh liata arulâta sâh tly ta.

¹² Abeipa vâlyuhchâpa a hnohta a vaw luah ta, a hnohta, “Nâ, chyhsa thatlôpa nata riahphapa y, Abeipa na hnohta a y,” tah ta.

¹³ Kidia ta a hnohta, “Hy ei zibeipa, Abeipa eima hnohta a y tlôh khiahta cha, khazia ma he hawhpa hmo zydua he eima chô liata a vaw tlô tly? Miah pathlatuhpazy ta miah ama chho tyhpa, a hmo noâh taopa zydua kha khataih liata ma a y khai ha tly? ‘Abeipa ta Izi râh tawhta miah â kaw chhi,’ tahpa ta miah chho ei ta, tahmâ cha Abeipa ta miah pathlua ha ta, Midia ku liata miah a hlâ ha he zaw,” tah ta.

¹⁴ Abeipa ta a hnohta, “Na thatlôna ta sie la, Izarei he Midia ku tawhta pachha mah y. Kei tlai ta ei cha tuah hih” tah ta.

¹⁵ Kidia ta a hnohta, “Hy ei zibeipa, kheihta ma Izarei cha ei pachha thei aw? Moh tua, ei pho he Manase chi liata thatlô lei chaipa pho châ ta, keima tlai chhao he ei chhôhkha liata a nawh chaipa ei châ hih,” tah ta.

¹⁶ Abeipa ta a hnohta, “Na hnohta y aw na ta, Midia mo cha chyhsa pakha thiepa hawhta na thie khai aw ei,” tah ta.

¹⁷ Kidia ta a hnohta, “Tahmâ he na modypa ei châ khiahta cha, bie nâ chhotuhpa he nâma tlai na châ hmeiseih tahpa ngiana na pie teh.

¹⁸ Hmohlâpa vaw cheipa ta nâ lâ a vy aw na ta, na hmiakô liata ei soh hlâlei cha, ngiachhiepa ta he su tawhta a pasie khah y,” tah ta. Ano ta, “Nâ vy hlâlei ei vaw y thlâh ha aw,” tah ta.

¹⁹ Chatawhcha Kidia cha a o lâ vawh ta, mietaw pasyuh ta, viahdie kachu hmo kha ta thinô pahlao leipa viahchhâ tao ta. A sa cha hrâbyh liata khô ta, tihâh cha beih liata soh ta, ôkâ tho ry liata Abeipa vâlyuhchâpa lâ cha cheih ta, hlâ ta.

²⁰ Khazohpa vâlyuhchâpa ta a hnohta, “Sa nata viahchhâ thinô pahlao leipa kha la la, lôpanô chô liana heta soh la, a chô liata sa tihâh kha patlai thlu teh,” tah ta. Cha hawhna chata tao ta.

²¹ Abeipa vâlyuhchâpa ta a chôchahrei chabapa pawhmao ta sa nata viahchhâ cha kei saoh ta, lôpanô tawhta mei vaw pua ta, sa nata viahchhâ thinô pahlao leipa cha a kâ khai haw. Chatawhcha Abeipa vâlyuhchâpa ta Kidia cha siesai ha ta.

²² Kidia ta Abeipa vâlyuhchâpa a châ tahpa pahno ha ta. Kidia ta, “Cha rimâ cha, Hy Abeipa Zehôvâh! Hmiachhypa ta Abeipa vâlyuhchâpa ei hmô ha he zaw,” tah ta.

²³ Abeipa ta a hnohta, “Na hnohta thlalôhna y mawh sy. Chi khah y, thi aw va chi,” tah ta.

²⁴ Kidia ta cha su liata Abeipa châta maisâh tao ta, Zehôvâh Salom tahpa ta a moh a bi. Cha maisâh cha Abieze mo râh Ôpharâ khih liata tanoh taihta â duah thlâh haw.

Kidia ta Bâlâ maisâh a parao

²⁵ Cha zâ liata Abeipa ta Kidia hnohta, “Na paw viahchao tôhpa la la, viahchao tôh hropa kô saripa chhao la la, na paw paduapa Bâlâ maisâh kha pacho la, a kiapâh liata Aseri tôh chhao thlu la,

²⁶ he thokhy chô liana heta Abeipa na Khazohpa châta alô ta a pha kawpa ta paryhpa maisâh tao mah y. Chatawhcha viahchao tôhpa pô nona kha la la, Aseri tôh na thlupa tho hmâpa ta raopa hlâna ta hlâ mah y,” tah ta.

²⁷ Chatanachata Kidia cha a chakaotuhpazy hry tawhta pahrawh a chhi ta, Abeipa ta a chhopa hawhta tao ta.

²⁸ Khihpi chyhsazy mydi ta ama thyu nahta, Bâlâ maisâh cha cho ha ta, a kiapâh liata Aseri tôh chhao thlupa châ ta, maisâh paryhpa liata viahchao tôhpa pô nona hlâpa a châpa hmô ei ta.

²⁹ “Ahy ma he hmo he a tao?” tahpa ta a hiahri ei ta. A phapa ta ama patluah khai nahta, “Zôasâ sawchapaw Kidia ta he hmo he a tao,” tah ei ta.

³⁰ Chatawhcha khihpi chyhsazy ta Zôasâ hnohta, “Na sawchapawpa kha a vaw chhi teh, Bâlâ maisâh parao ta, a kiapâh liata Aseri tôh a thlupa vâta a thi awpa a châ,” tah ei ta.

³¹ Zôasâ ta ano a maochhietuhpa zydua hnohta, “Bâlâ cha namâ châhkhei tlai aw ma? Ano cha nama pachha aw ma? Ahy rai ano a châhkheipa maih my khihdei hlâta thiepa ama châ aw. A maisâh parao hapa châ ta, chavâta khazoh a châ khiahta cha, anosasyh ta a â duakhei mawh sy,” tah ta.

³² Cha noh tawhta Kidia cha “Zerubâlâ” tahpa ta awpa a châ. Cha cha, “Bâlâ ta Kidia cha a dyuh mawh sy,” tahna châ ta, Bâlâ maisâh a paraopa vâta, cha hawhta reipa a châ.

³³ Chatawhcha Midia mo zydua, Amale mo nata nochhi chyhsazy a hmaohpakhy ei ta, Zawdâh chakapa ta, Zezari Saikao liata a rie ei ta.

³⁴ Abeipa thlahpa cha Kidia chô liata vaw tlô ta. Chiahmie tô ta, Abieze pathlazy cha ano zi awpa ta awpapua ta.

³⁵ Manase chi zydua hnohta chyhsazy tuah hra ta. Âmo chhao ano pazi awpa ta awpapuapa ama châ. Asera chi, Zebulawna chi nata Nâthalai chizy lâta chhao chyhsazy tuah ta, âmo chhao ta a vaw pahlyh hra ei ta.

³⁶ Kidia ta Khazohpa hnohta, “Na reipa hawhta, ei ku ta Izarei na pachha awpa khiahta cha,

³⁷ sawhri liata mietaku hmi soh aw na ta, mietaku hmi lia dei ta diati y sala, alei zydua deikua a hi khai khiahta cha, na reipa hawhta ei ku ta Izarei na pachha aw tahpa ei pahno aw,” tah ta.

³⁸ Cha hawhna tlai chata vaw châ ta. A mylâ mydi kari ta thyu ta, mietaku hmi cha saoh ta, biebuh bie khaina taihta mietaku hmi liata diati cha vaw y ta.

³⁹ Kidia ta Khazohpa hnohta, “Ei chô liata na hiehâh leipa la, eikhata bie bâh na pareisa heih mah y. Mietaku hmi ta pasia awpa eikhata na pasaih via mah y. Tahmâ cha mietaku hmi hi sala, alei zydua liata diati y mawh sy,” tah ta.

⁴⁰ Cha hawhna tlai chata Khazohpa ta cha zâ liata tao ta. Mietaku hmi deita hi ta, alei chô zydua liata diati tla ta.