RYUREITUHPAZY 5 - Mara Bible RV (BSI)

Debawrâ nata Bâraka hla

¹ Cha noh liata Debawrâ nata Abinôâ sawchapawpa Bâraka ta, hetana heta hla ama sa:

² “Chhituhpazy ta Izarei liata chhihtha ei ta, Phopi âmo kho ta amâ vaw hlâ lymâ; Abeipa cha reithai teh u!

³ “Hy nâmo, abeizy, Nathlie u la; Hy nâmo, ryureihtuhpazy, Nama nah pachôh teh u; Abeipa lâ hla sa aw na ta, Abeipa Izarei Khazohpa lâ reithaina ei hlâ aw.

⁴ “Hy Abeipa, Seirâ tawhta pua chi ta, Edômâ râh tawhta na sie nona kha, Alei a chalyupa ta avâ za tla ta, Meihdozy ta ti a za pathla.

⁵ Tlâhpizy Abeipa hmiakô liata a chalyu ei ta, Sinai tlâh chhao Abeipa Izarei Khazohpa hmiakô liata â chalyu.

⁶ “Anathâ sawchapawpa Sâkâ hro chhôh ta, Zaeli hro chhôh ta cha, Lâlaizy hnypa châ ta, Khitlyhpazy lâdy amâ chhih tyh.

⁷ Izarei liata khitawzy y khao veih ei, Kei ei vaw thyu hlâ kha cha lei khai ha ei ta; Kei Debawrâ heta nô hawhta Izarei liata ei vaw thyu hlâ kha cha, Ama lei khai haw.

⁸ Khazoh thiehpazy amâ la nahta, Thokhy chhikaozy liata adyuhna a vaw y tyh. Vyhphao tlyma, asei tlyma, Izarei thy palih hry liata hmô awpa a y ma?

⁹ “Izarei ryureituhpazy lâta ei palôh sie ta, Zawpi hry tawhta âmo kho ta a vaw hlâpazy lâna tlai cha ei palôh a sie. Abeipa cha reithai teh u!

¹⁰ “Nâmo, alâ râhpa a kiahpazy saih u, Cha biezy cha phuah u la; Nâmo, pohphaw liata a tyuhpazy saih u, Cha biezy cha phuah u la; Nâmo, lâpi a chhihpazy saih u, Cha biezy cha phuah teh u.

¹¹ Libaw katuhpazy pyu hlâta paro viapa ta, Ti yna suzy liata Abeipa hmotao siapa cha phuah aw ei ta, Izarei liata a khihsawzy hmotao siapa kyh ama phuah aw. Chatanachata Abeipa phopi cha, Khihpi thokhy chhikaozy lâ amâ pahri aw.

¹² “Hy Debawrâ, a hra la, a hra teh! A hra la, a hra la, hla sa teh! Hy Bâraka, Abinôâ sawchapawpa, Thyu la, na patupazy sei ta a chhi teh!

¹³ “Laibâhpazy ta thatlôpazy siehnao ei ta, Abeipa phopi ta pasaiphazy ama pahnie.

¹⁴ “Amale liata thari a thlapa Epharai mo a zu ei ta, Hy Benzami, na chiheihzy ta ama cha pazi; Mâkhi tawhta ryureituhpazy a zu ei ta, Zebulawna tawhta pheisaih hyutuhpa chôchahrei a chabapazy amâ zu.

¹⁵ Iskâra chhituhpazy Debawrâ chhaota a vy ei ta, Iskâra cha Bâraka châta ngâ a chhih ta, A hnohta Saikao lâ ama sie. “Rubena phozy hry liata, A pachâpasiana thata a y.

¹⁶ Khazia mietaku sadôzy liata nâ tyuh thlâh haw? Mietaku zaw awna ramo pyu thei awpa ta ma? Rubena phozy hry liata, A pachâpasiana thata a y.

¹⁷ Kilia cha Zawdâh haosâ lâ y ta, Khazia Dânâ cha balyh liata a y thlâh haw? Asera cha tilaipi kiah liata a tyuh ta, A lihchakôpazy liata a pahrâ.

¹⁸ Zebulawna cha thina taihta a hrona a sokhâhpa phopi châ ta, Nâthalai chhao adyuhna su sâhpazy liata thina taihta â dyuh hra.

¹⁹ “Abeizy a vy ei ta, a dyuh ei ta, Kâna beizy ta Mekidô tizy kiah Tânâ liata amâ vaw dyuh; Hraona sôh lapa rai hnei veih ei.

²⁰ Avâ tawhta awhsizy ta a zâ dyuh ei ta, Ama su tawhta Siserâ ama zâ dyuh.

²¹ Kisaw tily ta âmo cha phaoh ta, Chavah hlôpa, Kisaw tily ta a phaoh ha ei. Hy ei thlahpa, sie la, Thatlôpa ta sie lymâ mah y.

²² “Arâzy ta ama chakieh ta alei tu ei ta, Arâ chahrapazy a zaw ei ta amâ pathluah.

²³ “Merô cha chhiesapa teh u,” Abeipa vâlyuhchâpa ta a tah; Abeipa bao awpa ta a vy leipa ei ta, Thatlôpazy adyuhna liata Abeipa bao awpa ta amâ vy leipa vâta, A khihsawzy cha thata chhiesapa teh u.

²⁴ “Chanôzy hry liata Zaeli cha thlaochhi chai sala, Keni chyhsa Hebe lapinô cha, Poh o lia a pahrâpa chanôzy hry liata thlaochhi chai mawh sy!

²⁵ Siserâ ta ti hiah ta, sâhpiti tlao pie ta; Beimachâ nyu ta sâhpiti kuapa a pie.

²⁶ A ku râkha lâta poh o khaipâna pazapa ta, A chachâh lâta raihriatuhpa syulô chaba ta, Siserâ cha khai ta, A luh pakei ta, A siali liata a khaipahlie haw.

²⁷ A phei thaby liata a bôhpa ta pao ta, Cha liata â zawh thlâh haw; A phei thaby liata a bôh ta, Â bôhna su liata pao ta, Cha liata a thi haw.

²⁸ “Siserâ nô cha opy tawhta saipa ta, Samokaw tawhta chaphôhtu ta, ‘Khazia Siserâ talailih a vaw tlô to vei tly? Khazia a talailih pheizy a nainôsô tly i?’ tah ta.

²⁹ Abeizuah so chaipazy ta a chhy ei ta, Hmeiseihta la, anosasyh ta tlao â chhypa a châ:

³⁰ ‘Hraona sôh hmô ei ta, Amâ rai ngâpa a châ aw, Mopakha ta laihsa pakha pano chyu ta amâ rai ngâpa a châ aw; Siserâ châta hraona poh rôh nypa, Hraona poh rôh nypa kikypa, Rao liata a ao awpa hraona poh rôh nypa kikypa cha, Siserâ châta zo no a châ aw,’” tah ta.

³¹ “Cha hawhna chata, Hy Abeipa, Na chariahpa zydua leidia khai ei sala, Na viasazy deikua cha, Noh hawhta khaih ei sala, Thatlôpa ta thyu mawh ei sy!” Chatanachata râh cha kô sypalih chhôh thlalôhpa ta y ta.