RYUREITUHPAZY 16 - Mara Bible RV (BSI)

Sâsawna nata Delilâ

¹ Sâsawna cha Kâza lâ sie ta, cha liata âzuahnô hmô ta, a hnohta a ngia ta.

² Kâza mo hnohta, “Sâsawna he lâ â vy,” tahpa chho ei ta. Cha su cha dôh ei ta, khihpi thokhy chhikao liata azo zâ khihdei a byh ei ta. Azo zâ khihdei a chalih ei ta, “My khih pavâna taih hâ aw pi ta, eima thie aw,” tah ei ta.

³ Châhrasala Sâsawna cha zâcho taih a zia ta, zâcho ta thyu ta, khihpi thokhy chhikaozy nata a tôh mianozy patu ta, a chakana chhaota a zydua ta phia ta, a ngiatlâh ta a pu ta, Hebraw dady tlâh laki lâ siekhei ha ta.

⁴ A noh hro ta Sôre saikao liata chanô pakha, a moh Delilâ ama tahpa cha khoh ta.

⁵ Philistinâ beimachâzy cha chanô lâ khy ei ta, a hnohta, “Reipasao la, a thatlô ngaitana he khâpa liata ma a y, kheihta tao sih la ma ano he patu thei aw pi ta, chahrypa ta eima panawh thei aw, tahpa pahno a chhuah mah y. Eima zydua ta tâkâ tlaw 1,100 chyu eima cha pie aw,” tah ei ta.

⁶ Chatanachata Delilâ ta Sâsawna hnohta, “Na thatlôna rônahpa he khâpa liata ma a y, kheihta ma chahry theipa ta y aw chi ta, pasasapa ta na y thei aw, tahpa ngiachhiepa ta na chho teh,” tah ta.

⁷ Sâsawna ta a hnohta, “Libaw ri thiehpa hrohpa ri sari pabaohpa ta eina chahry khiah ei ta cha, ei tha vaw chhâ aw ta, chyhsa tyhpa hawhta ei vaw châ ha aw,” tah ta.

⁸ Chatanachata Philistinâ beimachâzy ta libaw ri thiehpa hrohpa ri sari Delilâ lâ kaw cheih ei ta, chazy chata Sâsawna cha chahry ta.

⁹ Delilâ ta Sâsawna a byh awpa ta, o chhôh via lâta chhôhpadâhpa liata chyhsazy cha paysa ta. Chatawhcha Sâsawna hnohta, “Sâsawna, Philistinâ mo ta ama cha vaw siehnao” tah ta. Sâsawna ta libaw rizy cha, mei ta lari a kâ pachhôpa hawhta, naota ta chhie ha ta. A thatlôna bieru cha pahnopa châ pyly vei.

¹⁰ Delilâ ta Sâsawna hnohta, “Pachâ tua, na dôvei chi ta, haipa biezy eina chho chi. Kheihta chahry thei awpa ma na châ, ngiachhiepa ta na chho teh,” tah ta.

¹¹ Sâsawna ta a hnohta, “Chaori thiehpa, hmâ mâh leipa ta eina chahry khiah ei ta cha, ei tha vaw chhâ aw ta, chyhsa tyhpa hawhta ei vaw châ ha aw,” tah ta.

¹² Chatawhcha Delilâ ta chaori thiehpazy la ta, chazy chata Sâsawna cha chahry ta, a hnohta, “Sâsawna, Philistinâ mo ta ama cha vaw siehnao” tah ta. Abyhtuhpa chyhsazy cha o chhôh via lâta chhôhpadâhpa liata y ei ta. Châhrasala a ku chahryna chaorizy cha lari hawhta chhie ha heih ta.

¹³ Delilâ ta Sâsawna hnohta, “Tahmâ taihta na dôvei chi ta, haipa biezy eina chho ngâ thlâh ha chi. Kheihta chahry thei awpa ma na châ, na chho teh,” tah ta. Sâsawna ta a hnohta, “Ei luh sâ phiehpa phao saripazy he thai liata sa pâ la, thaiphia ta na chhuh pa-i ha khiahta cha, ei tha vaw chhâ aw ta, chyhsa tyhpa hawhta ei vaw châ ha aw,” tah ta.

¹⁴ Chatanachata Sâsawna cha â mô chhôh ta, Delilâ ta a sâ phiehpa phao sari cha la ta, thai liata sa pâ ta, thaiphia ta â i ngaitapa ta chhuh pa-i ta, a hnohta, “Sâsawna, Philistinâ mo ta ama cha vaw siehnao” tah ta. Â môpa cha a kaw thei ta, thaipheih nata thai nata a hrai pâna dua ta a daophi pathlah khai ha ta.

¹⁵ Delilâ ta a hnohta, “Kheihta ma, ‘Kyh ei cha pachâ’, na tah thei tly, na palôh keima liata a y leipa pi tlai ta? Ei thôh dua eina dôvei ha chi, na thatlôna rônahpa khâpa liata tlai ma a y tahpa na chho to va chi,” tah ta.

¹⁶ Delilâ ta noh chareih dycharao ta, â haw ngâ thlâh hapa vâta, Sâsawna cha thina taihta a hro nôpo ta.

¹⁷ Chatanachata a palôh zydua cha chho khai ha ta, a hnohta, “Ei nô chhi liata ei y no tawhta, Khazohpa châta Nâzarai ei châ hapa vâta, ei luh liata sâ ngyuna rai hmâpa châ beih vei. Ei sâ he ngyupa a châ khiahta cha, ei thatlôna heta na puasai aw ta, ei tha vaw chhâ aw ta, chyhsa tyhpa hawhta ei vaw châ ha aw,” tah ta.

¹⁸ Sâsawna ta a palôh zydua a chho khai haw tahpa Delilâ ta a pahno nahta, Philistinâ beimachâzy lâ chyhsa tuah ta, âmo cha za paawsa ta, ama hnohta, “A khy heih tua teh u, a palôh zydua eina chho khai ha bâ,” tah ta. Philistinâ beimachâzy cha ano lâ khy ei ta, tâkâ chhao kaw phao pâ ei ta.

¹⁹ Delilâ ta Sâsawna cha a byh chô liata pamôsa ta, chyhsa pakha aw ta, a luh sâ phiehpa phao saripazy cha pangyusa ta. A rie vaw thei pathao ta, chatanachata Sâsawna cha a thatlôna ta puasai ha ta.

²⁰ Delilâ ta a hnohta, “Sâsawna, Philistinâ mo ta ama cha vaw siehnao!” tah ta. Â môpa cha a kaw hra ta, “Noh hrozy hawhna khata pua aw na ta, ei tlieh papua thlâh heih awh,” tahpa ta pachâ ta. Abeipa ta a siesai hapa pahno vei.

²¹ Philistinâ mo ta patu ei ta, a mozy thaoh ei ta, Kâza lâ zukhei ei ta, dawh keihraizy dai ei ta. Patâhna o liata sâh daih tyh ta.

²² Chatawhcha a luh sâ ama ngyu hapa kha kaw thao pathao heih ta.

Sâsawna thina

²³ Philistinâ beimachâzy cha ama khazoh Dakao lâ atheihna rônahpa hlâ awpa nata alyna tao awpa ta a pahmaohpakhy ei ta, “Eima khazoh ta eima chariahpa Sâsawna eima ku liata miah a pie haw,” tah ei ta.

²⁴ Zawpizy ta Sâsawna cha ama hmô nahta, ama khazoh cha reithai ei ta, “Eima khazoh ta eima chariahpa, eima râh a paraotuhpa, chyhsa hluhpi miah a thietuhpa cha, eima ku liata miah a pie haw,” tah ei ta.

²⁵ Ama palôh a thapha ngaita nota, “Sâsawna kha aw u la, miah vaw palypauasa tua se,” tah ei ta. Chatanachata Sâsawna cha patâhna o tawhta aw papua ei ta, âmo cha palypauasa ta. Otôh nata otôh likawh liata paduasa ei ta,

²⁶ Sâsawna ta satliapa, a ku ta ano a patupa hnohta, “O dyuhna tôhzy na pahriasa tua, ei hnieh khoh kaw,” tah ta.

²⁷ O chhôh cha chapaw nata chanô zy ta bie thlâh ha ei ta. Philistinâ beimachâ zydua cha liata y khai ei ta, Sâsawna ta palypauasana a taopa vâphuh tawhta a mohpa chhao chapaw nata chanô 3,000 rachhôh ama y.

²⁸ Sâsawna cha Abeipa pado ta, a hnohta, “Hy Beichaipa Khazohpa y, ngiachhiepa ta nâ thei la, Hy Khazohpa, ngiachhiepa ta ei khata he ei tha rie na patlô heih mah y, Philistinâ mo chô liata ei mo kârano phuh ei la thei nawpa ta,” tah ta.

²⁹ Chatawhcha Sâsawna ta o apahniehna asu tôh miano cha hria ta, a ku chachâh lâta miakha patu ta, a ku chavei lâta miakha patu ta.

³⁰ Sâsawna ta, “Philistinâ mo nata thi khoh lah vâ pi,” tah ta. Chatanachata a thatlôna zydua ta otôhzy cha chati ta, beimachâzy nata a chhôh liata a ypa zydua cha o ta a vi khai ha ei. A thina liata a thie pâpa athipazy cha, a hro nota a thiepazy hlâta ama hluh via syulyu.

³¹ A unawhzy nata a paw chhôhkha zydua a zu ei ta, a ri cha la ei ta, khykhei ei ta, Zôrâh nata Estaw likawh liata a paw Manôah pabuna su liata ama pabu. Sâsawna he Izarei chô liata kô kih chhôh ryu a reih.