RYUREITUHPAZY 12 - Mara Bible RV (BSI)

Zephathâ nata Epharai achakhiana

¹ Epharai mo ta ama pheisaih awpakhy ei ta, Zaphô lâ sie ei ta, Zephathâ hnohta, “Khazia ma Amawna mo a dyuh awpa ta sie chi ta, na hnohta sie awpa ta miah na hrua vei? Na o dua ta mei ta eima cha rao pâ ha aw,” tah ei ta.

² Zephathâ ta ama hnohta, “Kei nata ei phopi he Amawna mo nata thata a chariah pi ta, cha aw ei na ta, châhrasala ama ku tawhta na pachha veih ei chi.

³ Na pachha khoh veih ei chi tahpa ei pahno nahta, ei ku liata ei hrona sopa ta Amawna mo a dyuh awpa ta sie na ta, Abeipa ta âmo cha ei ku liata eina piepa ei a châ. Khazia ma tanoh he nâ dyuh awpa ta eina vaw siehnao thlâh ha ei chi?” tah ta.

⁴ Chatawhcha Zephathâ ta Kilia chyhsa zydua awpakhy ta, Epharai cha a dyuh ta. Epharai mo ta Kilia mo cha, “Nâmo Kilia mo, Epharai chi a paipatlapa sahlao, Epharai nata Manase tho liata a ypa rohnâhpazy tlai ei chi ta,” ama vaw tah tyhpa vâta, Kilia mo ta Epharai mo cha amâ dyuhpa a châ.

⁵ Kilia mo ta Epharai mo lâ siena Zawdâh chakana suzy cha khâchâ vaih ha ei ta. Epharai chyhsa a vaw râpa ta, “Haosâ lâ na chakasa teh,” a tah tita, Kilia mo ta a hnohta, “Epharai chyhsa na châ ma?” tah ei ta. Ano ta, “Châ va na,” a tah khiahta cha,

⁶ “Cha khiah Shibôle tah tua,” tah ei ta, “Sibôle” tlao tah ta, â dopa ta parosa thai leipa ta. Chavâta patu ei ta, Zawdâh chakana liana cha ama thie lymâ. Cha daihti liata Epharai mo cha 42,000 tlai ama thi.

⁷ Zephathâ cha Izarei chô liata kô charu ryureih ta. Chatawhcha Kilia chyhsa Zephathâ cha thi ta, Kilia râh ano khihpi liata ama pabu.

Ibâza, Elôni nata Abadaw

⁸ Zephathâ khai tawhta Bethlehe khihpa Ibâza ta Izarei chô liata ryureih ta.

⁹ Sawchapaw sythôh nata saw­chanô sythôh hnei ta, a sawchanô sythôhzy cha khôtho lâ dyhpachâ ta, a sawchapawzy châta khôtho lâ tawhta sawchanô sythôh a vaw ngiakhei ta. Izarei chô liata kô sari ryureih ta.

¹⁰ Ibâza cha thi ta, Bethlehe liata ama pabu.

¹¹ Ibâza khai tawhta Zebulawna chyhsa Elôni ta Izarei chô liata ryureih ta, Izarei chô liata kô hrawh ryu a reih.

¹² Chatawhcha Zebulawna chyhsa Elôni cha thi ta, Zebulawna râh liata Aizalô khih liata ama pabu.

¹³ Elôni khai tawhta Pirathô chyhsa Hile sawchapawpa Abadaw ta Izarei chô liata ryureih ta.

¹⁴ Ano cha alâ sysari a kiahpa sawchapaw sypalih nata samoh sythôh a hnei. Izarei chô liata kô charie ryureih ta.

¹⁵ Chatawhcha Pirathô chyhsa Hile sawchapawpa Abadaw cha thi ta, Amale mo tlâh râh liata a ypa Epharai râh Pirathô khih liata ama pabu.