RYUREITUHPAZY 10 - Mara Bible RV (BSI)

Tôlâ nata Zairâ

¹ Abimele a thi tawhta, Izarei pachha awpa ta Iskâra chyhsa Dôdô sawchapawpa Puah saw­chapawpa Tôlâ vaw pua ta. Ano cha Epharai tlâh râh Sâmi khih liata a pahrâpa a châ.

² Kô kih nata kô thôh Izarei chô liata ryureih ta, thi ta, Sâmi khih liata ama pabu.

³ Ano a thi tawhta Kilia chyhsa Zairâ vaw pua ta. Kô kih nata kô no Izarei chô liata ryureih ta.

⁴ Zairâ cha alâ sythôh a kiah tyhpa sawchapaw­ sythôh a hnei. Khihpi sythôh hnei ei ta, chazy cha tanoh taihta Hâvô Zairâ tahpa ta awpa a châ.

⁵ Zairâ cha thi ta, Kamônâ khihpi liata ama pabu.

Zephathâ

⁶ Izarei sawzy cha Abeipa mohmô ta moleina hmo tao heih ei ta. Bâlâzy nata Astarôzy, Aramia khazohzy, Sidaw khazohzy, Môabâ khazohzy, Amawna mo khazohzy nata Philistinâ mo khazohzy chakao ei ta. Abeipa a heihsai ei ta, ano cha chakao khao leipa ei ta.

⁷ Chavâta Abeipa cha Izarei chô liata a hiehâh ngaita ta, Philistinâ mo ku lâta nata Amawna mo ku lâta Izarei sawzy cha zuah ha ta.

⁸ Cha kô liata Amawna mo ta Izarei sawzy cha thata tlybaipa ta taochhie ei ta. Zawdâh haosâ Kilia liata Amawri mo râh liata a ypa Izarei saw zydua cha kô hrawh hleicharie chhôh tlai tlybai ei ta.

⁹ Amawna mo cha Zudâh mo, Benzami mo nata Epharai pathlazy a dyuh awpa ta Zawdâh chaka ei ta, chavâta lzarei cha nôpo ngaitapa ta y ta.

¹⁰ Izarei sawzy ta Abeipa pado ei ta, a hnohta, “Na chô liata eima vaw molei haw, eima Kha­zohpa a paphasaipa ta, Bâlâzy tlao eima vaw chakao haw,” tah ei ta.

¹¹ Abeipa ta Izarei sawzy hnohta, “Izi mo, Amawri mo, Amawna mo nata Philistinâ mozy tawhta cha pachha ha veih ei na ma?

¹² Sidaw mo tawhta chhao cha pachha ei na ta, Amale mo nata Maoni mozy ta cha tlybai ei ta, na pado ei chi ta, ama ku tawhta cha pachha ha veih ei na ma?

¹³ Chatanachôta nâ paphasai ei chi ta, khazoh hropazy tlao nama chakao. Chavâta cha pachha khao aw veih ei na.

¹⁴ Vawh u la, namâ tlyhpa khazohzy cha va pado teh u. Âmo chata nama nôpona daihtizy liata cha pachha mawh ei sy,” tah ta.

¹⁵ Izarei sawzy ta Abeipa hnohta, “Eima vaw molei ha tlai na. Pha na tahzie hawhta eima chô liata tao mah y. Khâpa rai châ sala, tanoh deikua cha rie miah pachha mah y,” tah ei ta.

¹⁶ Chatanachata ama hry liata râh hropa khazohzy thypa ta, Abeipa cha chakao ei ta. Izarei nôpona cha Abeipa ta taokhei ngaita ta.

¹⁷ Amawna mo cha a awpakhy ei ta, Kilia liata riehmo paryh ei ta. Izarei sawzy chhao a awpakhy hra ei ta, Mizpâ liata riehmo paryh ei ta.

¹⁸ Zawpi nata Kilia khih nôpawpazy cha reihpahmaoh ei ta, “Amawna mo adyuhna lâ ahy ma a sie tua chai aw? Ano cha Kilia râh liata a pahrâpa zydua chô liata hyutuhpa a châ aw,” tah ei ta.