RYUREITUHPAZY 1 - Mara Bible RV (BSI)

Zudâh nata Simeôna ta Adônibeze ama patu

¹ Zawsua a thi tawhta Izarei sawzy ta, “Kâna mo siehnao awpa ta ahy eima châta sie tua chai aw ta, âmo cha a kaw dyuh aw?” tahpa ta Abeipa hiahri ei ta.

² Abeipa ta, “Zudâh sie mawh sy. Râh cha a ku liata ei pie haw,” tah ta.

³ Zudâh pathlazy ta ama unawhpa Simeôna pathlazy hnohta, “Eima ryuto râh lâ eima hnohta kaw sie u la, hmaohkha ta Kâna mo a kaw dyuh ei suh u. Keimo chhao nama ryuto râh lâ nama hnohta eima sie hra aw,” tah ei ta. Chatanachata Simeôna pathlazy cha Zudâh pathlazy hnohta adyuhna lâ sie ei ta.

⁴ Zudâh pathlazy cha khy ei ta, Abeipa ta ama ku liata Kâna mo nata Perizi mo pie ta. Beze khih liata chyhsa 10,000 thie ei ta.

⁵ Beze khih liata Adônibeze hmô ei ta, a dyuh ei ta, Kâna mo nata Perizi mo cha thata thie ei ta.

⁶ Adônibeze deikua a râ ha ta. A chadai ei ta, patu ei ta, a kupizy nata a pheipizy tai ei ta.

⁷ Adônibeze ta, “Ama kupi nata pheipi ei taipa bei sysarizy ta ei tlâhkhai ry liata azôpa a huah tyh ei ta, ei taopa hawh tlai ta Khazohpa ta viari eina thô he zaw,” tah ta. Zerusale lâ a chhi ei ta, cha liata thi ha ta.

Zudâh ta Zerusale nata Hebraw a pahnie

⁸ Zudâh pathlazy ta Zerusale a dyuh ei ta, la ei ta, zaozi ta chhawhsao ei ta, khihpi cha mei ta rao ei ta.

⁹ Cha khai tawhta, Zudâh pathlazy cha tlâh râh nata Neke nata bypi liata a ypa Kâna mozy a dyuh awpa ta zu ei ta.

¹⁰ Zudâh ta Hebraw khih liata a pahrâpa Kâna mo siehnao ta, Sesai, Ahimâ nata Tâmai zy thie ta. Cha hlâta Hebraw khih cha Kiriathâbâ tahpa a châ.

Ôthane ta Debi khih a pahnie

¹¹ Cha tawhna chata Zudâh pathlazy cha Debi khih liata a pahrâpazy siehnao ei ta. Cha hlâta Debi khih moh cha Kiriasephâ tahpa a châ.

¹² Kâlebâ ta, “Ahy rai Kiriasephâ a dyuh ta a pahniepa cha ei sawchanô Akasâ lapinô ta ei pahneisa aw,” tah ta.

¹³ Kâlebâ nawhta Kenâza sawchapawpa Ôthane ta Kiriasephâ cha pahnie ta, chatanachata Kâlebâ ta a sawchanô Akasâ cha lapinô ta pahneisa ta.

¹⁴ Akasâ cha Ôthane lapinô a châ nahta, a paw hnohta râh hia awpa ta Ôthane cha pasyu ta. Akasâ cha alâ tawhta vaw chô ta, Kâlebâ ta a hnohta, “Khâpa na khoh?” tah ta.

¹⁵ Akasâ ta, “Byhnâ na pie mah y. Neke râh eina pie ha hnohkua chi cha, tihnawhzy chhao eina pie pâ awpa chi ta ei châ haw,” tah ta. Chatanachata Kâlebâ ta Akasâ cha machha lâta tihnawh nata mathi lâta tihnawhzy pie ta.

Zudâh nata Benzami râh lapazy

¹⁶ Mawsi puhpa Keni pathlazy cha Zudâh pathlazy chhaota thiahrâ khihpi tawhta pua ei ta, Aradâ kiapâh ta a ypa Neke liata Zudâh râhchawhpa lâ khy ei ta, cha liata a ypa phopi hry liata pahrâ ei ta.

¹⁷ Zudâh pathlazy cha ama unawhpa Simeôna pathlazy nata pua ei ta, Zephâ khih liata a ypa Kâna mo thie ei ta, a khihpi chhao tlokhuh ama parao khai haw. Chavâta khihpi moh chhao Hômâ tahpa a châ.

¹⁸ Zudâh pathlazy ta Kâza, Askelaw nata Ekarôna khihpizy cha ama râhzy chhaota la ei ta.

¹⁹ Abeipa cha Zudâh pathlazy hnohta y ta, chatanachata tlâh râh liata pahrâpazy papua khai ei ta, by liata pahrâpazy deikua, thua talailihzy ama hneipa vâta papua thei veih ei.

²⁰ Mawsi ta a vaw rei hapa hawhta, Hebraw khih cha Kâlebâ pie ei ta, cha liata a ypa Anâki sawchapaw pathôhzy cha Kâlebâ ta a papua ha ei.

²¹ Benzami pathlazy deikua, Zerusale khih liata a pahrâpa Zebu mo papua veih ei. Chavâta Zebu mo cha tanoh taihta Zerusale liata Benzami pathlazy nata hmaohkha ta ama pahrâ lymâ.

Zawsi pathlazy ta Bethel ama pahnie

²² Zawsi pathlazy chhao Bethel a dyuh awpa ta pua ei ta, ama hnohta Abeipa y ta.

²³ Zawsi pathlazy ta Bethel lâ mohparutuhpazy tuah ei ta. Cha hlâta khihpi moh cha Luzi tahpa a châ.

²⁴ Mohparutuhpazy ta chyhsa pakha khih chhôh tawhta a vaw puapa hmô ei ta, a hnohta, “Ngiachhiepa ta khih chhôh lâ angiana miah chho teh, na chô liata ngiachhiena eima palâsa aw,” tah ei ta.

²⁵ Khihpi chhôh lâ angiana cha âmo chho ta. Chatanachata zaozi ta khihpi cha a dyuh ei ta, cha chyhsa nata a chhôhkha zydua deikua pahlôh ei ta.

²⁶ Cha chyhsa cha Hiti râh lâ sie ta, khihpi padua ta, a moh Luzi bi ta, tanoh taihta cha khih moh cha a phaoh haw.

Râh tawhta papua leipazy

²⁷ Manase pathlazy ta Besia nata a khichapeih liata pahrâpazy, Tânâ nata a khichapeih liata pahrâpazy, Dôrâ nata a khichapeih liata pahrâpazy, Ibalia nata a khichapeih liata pahrâpazy, Mekidô nata a khichapeih liata pahrâpazy papua leipa ei ta. Kâna mo ta cha râh liata pahrâ awpa khâchâ amâ chhuah hapa vâta ama papua leipa a châ.

²⁸ Izarei sawzy ama tha a vaw tlô via nahta, Kâna mo cha raihriatuhpa ta tao ei ta, chavâta papua khai khao veih ei.

²⁹ Epharai pathlazy chhao, Keze khih liata a ypa Kâna mo papua veih ei. Chavâta Kâna mo cha ama hry liata Keze khih liata ama pahrâ lymâ hra.

³⁰ Zebulawna pathlazy chhao, Kitaraw nata Nâhalaw khihpizy liata pahrâpazy papua veih ei. Chavâta Kâna mo cha ama hry liata pahrâ lymâ hra ei ta, raihriatuhpazy ta hmâpa ama châ.

³¹ Asera pathlazy ta Akô, Sidaw, Ahilâ, Akazi, Helbâ, Aphi nata Rehô khihpizy liata pahrâpazy papua veih ei.

³² Cha râh liata a pahrâpa Kâna mo cha Asera pathlazy ta ama papua leipa vâta, Asera pathlazy cha Kâna mo nata ama pahrâ khoh lymâ.

³³ Nâthalai pathlazy ta Beseme nata Bethanâ khihpizy liata pahrâpazy papua veih ei. Chavâta cha râh liata a pahrâpa Kâna mo hry liata pahrâ ei ta, Beseme nata Bethanâ liata pahrâpazy cha ama raihriatuhpazy châta hmâpa ama châ.

³⁴ Dânâ pathlazy cha saikao by lâ ama zu awpa Amawri mo ta ama pasai leipa vâta, tlâh râh lâ ama pakuasa haw.

³⁵ Amawri mo cha Here Tlâh liata nata Aizalô nata Sâbi khihpizy liata pahrâ lymâ awpa khâchâ a chhuah ei ta, châhrasala Zawsi pathlazy cha âmo hlâta ama thatlô via ta, chavâta Amawri mo cha raihriatuhpazy ta hmâpa ama châ.

³⁶ Amawri mo râhri cha Akarâbi lâ kiana, Selâ tawhta machha lâ a châ.