HMOTAOPAZY 6 - Mara Bible RV (BSI)

Machâ pasari raopazy

¹ Cha nohzy liata, pachupazy ama pôh via lymâ nahta, noh chareih ama hmo raipa liata ama nôhmeizy ama pachâ tyh leipa vâta, Krikâh Zuzy cha Hebraizy chô liata paphôh ei ta.

² Pahrawh hleinozy ta pachupa zydua awpakhy ei ta, “Tlâhkhai liata chakaona peimawhpazy vâta, Khazohpa bie chho bâhsaipa pha aw vei.

³ Chavâta unawh saih u, nama hry liata Thlahpa nata sona ta a biepa, chyhsa moh phapa pasari a tlyh teh u, cha hmozy a pachâtuhpa châta âmo cha eima rao aw.

⁴ Keimo deikua cha thlahchhâna nata bie chho chakaona liata eima daihti eima hmâh aw,” tah ei ta.

⁵ Cha bie chata zawpi zydua palysa ta, ngiapâna nata Thlahpa Pathaihpa ta a biepa Stiphana nata Phili, Prôkôrâ, Nikanaw, Timô, Pâmenâ nata Zuzy phohlypa Antiôkâ khihpa Nikôla zy a tlyh ei ta.

⁶ Cha chyhsazy cha lyuhchâpazy hmiakô liata paduasa ei ta, ama chô liata ku pahniehpa ta, thlahchhâpa ei ta.

⁷ Chatawhcha Khazohpa bie cha pôh lymâ ta, pachupazy maluh cha Zerusale liata thata pôh ta, theihthaipa hluhpi chhao ta zo ei ta, amâ ngiapâ haw.

Stiphana patuna

⁸ Stiphana cha ngiachhiena nata hmotaotheina ta bie ta, chyhsazy hry liata ngiana nata hmonoâhpa rônah ngaitapazy tao lymâ ta.

⁹ Sei Puapa sahlao pakhyna o ama tahpa tawhta chyhsa thokha, Kurini, Alezandria, Silisia nata Asia râhzy tawhta Zu chyhsazy vaw thyu ei ta, Stiphana bie cha vaw chakhia ei ta.

¹⁰ Châhrasala sona nata Thlahpa ta bie a reipazy cha ei thei leipa ei ta.

¹¹ Arulâta chyhsazy pasyu ei ta, cha chyhsazy chata, “Mawsi nata Khazohpa a reipachhiena biezy eima thei,” tah ei ta.

¹² Zawpizy, machâzy nata ryhpa pachutuhpazy pasyu ei ta, Stiphana cha tei ei ta, patupa ta, ryureina hmiakô liata a vaw chhi ei ta.

¹³ Pahnokheituh pakheipazy rao ei ta, âmo chata, “He chyhsa heta, bâh leipa ta he su pathaihpa nata ryhpa a reipachhie lymâ.

¹⁴ ‘Nâzari Zisu ta, he su he parao aw ta, Mawsi ta ryhpa miah a piepazy a panano aw,’ tahpa a reipa eima thei,” tah ei ta.

¹⁵ Ryureina liata a tyuhpa zydua ta Stiphana cha moh ei ta, a hmia cha vâlyuhchâpa hmia hawhta hmô ei ta.