HMOTAOPAZY 25 - Mara Bible RV (BSI)

Pawla Kaisarâ kô tlô â chhuah

¹ Festâ cha a bia a vaw tlô tawhta noh thô a châ nahta, Kaisaria tawhta Zerusale lâ khy ta.

² Theihthai beizy nata Zu nôpawpazy ta Pawla ama leihna cha a hnohta tlôkhei ei ta.

³ Pawla cha Zerusale lâ a vaw chhi awpa ta a khokheina a haw ei ta. Lâpi liata a byh ta, thie amâ chhuahpa vâta cha hawhta ama hiapa a châ.

⁴ Châhrasala Festâ ta Pawla cha Kaisaria liata patâhpa châ ta, ano chhao Kaisaria lâ thlai a lie awpa a châzie âmo chho ta.

⁵ Festâ ta, “Nama hry liata biehneituhpazy ei hnohta a zu ei sala, cha chyhsa cha adoleina a hnei khiahta cha, ama leihna cha za tlôkhei mawh ei sy” tah ta.

⁶ Ama hry liata noh charie tlyma, noh hrawh tlyma a châh tawhta, Festâ cha Kaisaria lâ zu ha ta. A mylâ ta ryureina dyuchhai liata a tyuh ta, Pawla cha a vaw chhi awpa ta biepie ta.

⁷ A vaw tlô nahta, Zerusale tawhta Zu chyhsa a zupazy cha Pawla kiapâh liata a vaw duah ei ta, biepeipa hluhpi ta leih ei ta, châhrasala â do tlai na tahpa reih pasia thei leipa ei ta.

⁸ Pawla ta a thaichâna bie reih ta, “Zuzy ryhpa chakhiapa ta tlyma, Achhyna o ryhpa chakhiapa ta tlyma, Kaisarâ chakhiapa ta tlyma, khâpa hmo hmah parao va na,” tah ta.

⁹ Châhrasala Festâ ta Zuzy hry liata moh pha khohpa ta, Pawla hnohta, “Zerusale lâ khy ta, na thâtih he ei hmiakô liata pachia awpa na khoh ma?” tah ta.

¹⁰ Pawla ta, “Kaisarâ ryureina dyuchhai hmiakô liata ei duah hih. He he ei thâtih pachia nawpa su tlai a châ. Zuzy chô liata khâpa hmo hmah parao va na, cha cha nâ chhao ta a siapa ta na pahno.

¹¹ Hmoparaotuhpa châ ha sah la, thina tlâh a châpa hmo a paraopa ei châ khiahta cha, thina khôkhâh awpa a chhuah va na. He Zu chyhsazy ta eina leihna ei he khâpa hmah a y leipa a châ khiahta deikua cha, ahy hmahta âmo lâ na hlâ thei aw veih ei. Kaisarâ kô ei tlô aw,” tah ta.

¹² Festâ ta a ryureilâhpazy â chhohia khai nahta, Pawla cha a chhy ta, “Kaisarâ kô tlô awpa na khoh ha tawhta cha, Kaisarâ lâ na sie aw,” tah ta.

Pawla Akripâ nata Benisi hmiakô liata

¹³ Noh khazie tlyma a khô tawhta, Bei Akripâ nata Benisi cha Festâ a naoh awpa ta Kaisaria lâ za tlô ei ta.

¹⁴ Cha liata noh hluhpi ama châhpa vâta, Festâ ta Pawla kyh cha abei chho ta, “Felika khata atâhpa pakha siesai ta.

¹⁵ Zerusale liata ei y chhôh kha, theihthai beizy nata Zu machâzy ta ano leihna bie vaw reih ei ta, thailei pachâsa awpa ta amâ haw.

¹⁶ Kei ta ama hnohta, ‘Ama leihpa chyhsa ta a leihtuhpazy hmiakô liata a thaichâna bie hmiadaisâ ta a rei ha tua leipa ta thailei pachâsapa cha, Rawma taozie châ vei,’ tahpa ta ei chhy ei.

¹⁷ Chatanachata he lâ amâ zu nahta, pahawhpasâh leipa ta, a mylâ ta ryureina dyuchhai liata thlai a tyuh na ta, cha chyhsa cha a vaw chhi awpa ta bie ei pie.

¹⁸ A leihtuhpazy a vaw duah ei ta, ei pangiasapa hawhta moleina biepeipa a hneipa khâpa hmah reih tlôh leipa ei ta.

¹⁹ Ama zyhna kyh nata Zisu ama tahpa, a thi hapa, Pawla ta a hrohpa hawhta a reipa kyh liata amâ eina tlao vaw châ ta.

²⁰ Cha kyh cha a pachâna rai ei pahno leipa vâta, Zerusale lâ khy ta, cha biezy cha, cha liata pachia awpa a khoh nata khoh lei hiahri na ta.

²¹ Châhrasala Pawla ta beichaipa ta biepathluna tao awpa ta ano lâ tlôkhei awpa ta â hawpa vâta, Kaisarâ lâ ei paphao thei hlâlei cha patâh chy awpa ta bie ei pie haw,” tah ta.

²² Akripâ ta Festâ hnohta, “Kei chhao, cha chyhsa bie reipazy nathlie awpa ei khoh kaw,” tah ta. Festâ ta, “A biereipa cha mylâ na nathlie aw,” tah ta.

²³ A mylâ ta Akripâ nata Benisi cha pheisaih hyutuhpazy nata khihpi nôpawzy chhaota rônah ngaitapa ta a vy ei ta, zawpi ahmaohna o liata a ngia ei ta. Festâ bie ta Pawla cha a vaw ngiakhei ei ta.

²⁴ Festâ ta, “Bei Akripâ nata eima hnohta a ypa zydua saih u, he chyhsa nama hmôpa he, ano kyh liana heta Zerusale nata he liata Zu chyhsa a ypa zydua ta a hroh tlâh châ khao vei tahpa ta thata awh ei ta.

²⁵ Châhrasala thina tlâh a châpa hmo khâpa hmah a taopa hmô va na. Ano ta beichaipa kô tlô awpa â haw hapa vâta, beichaipa lâ cha paphao awpa ei chhuah.

²⁶ Châhrasala ano kyh liata ei zibeipa lâ ro hmeiseih awpa chhao hnei va na. Chavâta nama zydua hmiakô liata ei vaw chhi hih, a eih pachaipa ta, Bei Akaripâ, nâma hmiakô liata ei vaw chhi, bie na hiahri khai tawhta khâpa chhâ ma ro awpa ei hnei thei nawpa ta.

²⁷ Atâhpa paphao tlôh ta, biepeipa a hneipa palâsa leipa cha, yzie a hneipa ta pahno leipa na ta,” tah ta.