HMOTAOPAZY 23 - Mara Bible RV (BSI)

Pawla ryureina hmiakô liata

¹ Pawla ta ryureituhpazy cha a mo tawpâ ta, ama hnohta, “Unawh saih u, chhie nata pha pahnona hmâpa ta, tanoh taihta Khazohpa mohmô ta a phapa ta ei hroh lymâ,” tah ta.

² Theihthai beichaipa Anania ta Pawla kiapâh liata a duahpazy hnohta a pakah liata chabaih awpa ta biepie ta.

³ Pawla ta a hnohta, “Nâ, pâhchhô hlyu ngyuh hniapa, Khazohpa ta a cha chabaih aw. Ryhpa hawhta na pachia awpa ta a tyuh chi ta, khazia ryhpa chakhiapa ta na chabaih awpa ta bie na pie?” tah ta.

⁴ A kiapâh liata a duahpazy ta, “Khazohpa theihthai beichaipa khazia na reipachhie?” tah ei ta.

⁵ Pawla ta, “Unawh saih u, theihthai beichaipa a châ tahpa na ei pahno vei, ‘Na phopi ryureituhpa chô liata bie pha leipa rei kha,’ tahpa ropa a châ,” tah ta.

⁶ Pawla ta thokha Saduasizy châ ei ta, thokha Phârisaihzy ama châpa a pahno nahta, ryureituhpazy hnohta, “Unawh saih u, kei he Phârisaih châ na ta, Phârisaih sawchapawpa ei châ. Athihpa thyuheihna hnabeiseihna kyh vâta ryureina hmiakô liata a duahpa ei châ hih?” tah ta.

⁷ Cha bie cha a rei khai nahta, Phârisaihzy nata Saduasizy likah liata aeichhiana vaw pua ta, ryureituhpazy cha a pachhaih ha ei ta.

⁸ Saduasizy cha athihpa thyuheihna nata vâlyuhchâpa nata thlahpa y vei a tahpa châ ei ta, Phârisaihzy deikua cha, athihpa thyuheihna nata vâlyuhchâpa nata thlahpa a y tahpa a ngiapâpa ama châ.

⁹ Ryureina cha thata a vaw tyhreih ta, Phârisaihzy lâta ryhpa pachutuhpa thokha a duah ei ta, ama leihna bie cha chakhia ei ta, “He chyhsa he khâpa hmah a moleina hmô ma pi. Thlahpa ta tlyma, vâlyuhchâpa tlyma ta bie a chhopa a châ khiah cha, khâpa eima reih thei aw?” tah ei ta.

¹⁰ Thachahra hmâna taihta amâ eichhia via rilipa vâta, pheisaih hyutuhpa cha Pawla ama hriechheih awpa chi ta. Pheisaihzy tuah ta, pheisaih thatlôna hmâpa ta, ama hry tawhta pheisaih su lâ a kaw chhi awpa ta biepie ta.

¹¹ A vaw pazipa zâ liata, Abeipa cha Pawla kiapâh liata a vaw duah ta, a hnohta, “Thlalôhpa ta y mah y, Zerusale liata ei thâtih nâ châhkheipa hawhna heta, Rawma liata chhao nâ châhkhei hra awpa a châ,” tah ta.

Pawla thie amâ chhuah

¹² Khih a dei nahta, Zuzy a paraoh ei ta, Pawla ama thie hlâlei cha khâpa hmah nie leipa nata doh lei awpa ta bie a taih ei ta.

¹³ Cha hawhta arulâta Pawla tei a chhuahpazy cha sypalih hlâta ama hluh via.

¹⁴ Theihthai beizy nata machâzy lâ vawh ei ta, “Pawla eima thie hlâlei cha khâpa hmah nie lei awpa ta â i ngaitapa ta bie eimâ taih haw.

¹⁵ Chavâta a thâtih a sia viapa ta pachâ a chhuahpa hawhta nâmo nata ryureituhpazy ta reih u la, Pawla cha nâmo lâ a zâ chhi awpa ta, pheisaih hyutuhpa kaw chho teh u. A su a za tlôh hlâta thie awpa ta eimâ mâ thlâh haw,” tah ei ta.

¹⁶ Pawla sietanô sawchapawpa ta amâ byhpa kyh cha thei ha ta, pheisaih su lâ vawh ta, Pawla kei chho ta.

¹⁷ Pawla ta pheisaih za kha hyutuhpa aw ta, a hnohta, “He satlia he pheisaih hyutuhpa lâ a chhi teh, a hnohta bie rei awpa a hnei,” tah ta.

¹⁸ Satlia cha pheisaih hyutuhpa lâ a chhi ta, a hnohta, “Pawla atâhpa khata na aw ta, he satlia he nâ lâ a chhi awpa ta eina vaw tuah, na hnohta bie rei awpa a hnei ei aw,” tah ta.

¹⁹ Pheisaih hyutuhpa ta a ku ta patu ta, ânano ta a chhi ta, “Khâpa bie na chho awpa ma na hnei?” tah ta, arulâta hiahri ta.

²⁰ Ano ta, “Pawla thâtih a sia viapa ta pachâ khopa hawhta bie tao ta, mylâ ryureina liata ano cha a zâ chhi awpa ta, Zuzy ta cha hiah awpa amâ paraoh.

²¹ Châhrasala ama bie vaw zo khah y. Ama chyhsa sypalih hlâta hluh via ta amâ byh thlâh haw. Cha chyhsazy chata Pawla ama thie hlâlei cha khâpa hmah nie leipa nata doh lei awpa ta bie a taih ei ta, tahmâ he na paryhsana hâpa ta amâ chiehpa ta ama y thlâh haw,” tah ta.

²² Pheisaih hyutuhpa ta satlia cha pasiesa ta, a hnohta, “Cha biezy cha eina pahnosa chi tahpa ahy hmah chho khah y,” tahpa ta biepie ta.

Pawla Felika lâ hlâpa a châ

²³ Pheisaih hyutuhpa ta pheisaih za kha hyutuhpa pano aw ta, ama hnohta, “Tazâ dawh chakipa liata Kaisaria lâ sie awpa ta, pheisaih za no, arâ pheisaih sysari nata asei a chabapa za no a chhuanoh teh u.

²⁴ Pawla kia awpa arâ pachhuahpanoh u la, râhvaotuhpa Felika lâ â bohpa ta tlôkhei mawh ei sy,” tah ta.

²⁵ Hetana heta châ roh ta.

²⁶ “Klaudia Lysia ta râhvaotuhpa zachhihpa Felika a châ naoh.

²⁷ He chyhsa he Zuzy ta patu ei ta, ama thie chy ta âmo lâta pheisaihzy a chhipa ta sie na ta, Rawma chyhsa a châpa pahno na ta, ei pachhapa a châ.

²⁸ Ama leihna chhâpa pahno khohpa ta, ama ryureina lâ a chhi na ta.

²⁹ Ama ryhpa bie kyh liata ama leihpa a châpa pahno na ta, ama leihna cha thina tlyma, patâhna tlyma, â phuhpa ta pahno leipa na ta.

³⁰ Thie awpa ta amâ byhpa kyh ei pahno nahta, nâ lâ thlai ei cha vaw hlâ. A leihtuhpazy chhao, ama leihna cha na hmiakô liata rei awpa ta bie ei pie ei,” tah ta.

³¹ Biepiepa hawhta, pheisaihzy ta Pawla cha azo ta siekhei ei ta, Antipati khih tlôkhei ei ta.

³² A mylâ ta pheisaih su lâ a vaw lie ei ta, arâ pheisaihzy ta Pawla cha siekhei ei ta.

³³ Kaisaria ama tlô nahta, râhvaotuhpa hnohta châ pie ei ta, Pawla cha a hmiakô liata paduasa ei ta.

³⁴ Râhvaotuhpa ta châ cha reih ta, Pawla yna râh hiahri ta. Silisia chyhsa a châpa a pahno nahta,

³⁵ a hnohta, “Châ leihtuhpazy ama vaw tlô tita na thâtih ei pachia aw,” tah ta. Chatanachata Pawla cha Herawda bei o liata vaih awpa ta biepie ta.