HMOTAOPAZY 21 - Mara Bible RV (BSI)

Pawla Zerusale lâ a sie

¹ Ephesi machâzy nata eimâ pathlie tawhta, balyh ta pua pi ta, Kôsi liahpahlô lâ palâh pi ta, a mylâ ta Rôde liahpahlô tlô pi ta, cha tawhna chata Pâtarâ khih tlô pi ta.

² Cha liata Phônisia lâ a sie awpa balyh miakha hmô pi ta, kiah pi ta, sie heih pi ta.

³ Kuparâ liahpahlô â vaw lâ nahta, chavei lâta khô pi ta, Suria râh lâ sie lymâ pi ta, Tyre khih liata a pahâ pi ta. Cha liata balyh hmozy pachhi awpa châ ta.

⁴ Cha liata pachupazy hmô pi ta, noh sari châh pi ta. Pachupazy chata Thlahpa pahnosana ta, Pawla cha Zerusale lâ sie lei awpa ta chho ei ta.

⁵ Cha liata y nawpa daihti a chhâ nahta, pua pi ta, sie heih pi ta. Unawhzy cha ama zydua ta, ama lapi sawzy chhaota, khih eima khô hlâlei miah vaw pathlie ei ta. Raphyu liata eima pakhu paneihpa ta thlah eima chhâ khai tawhta,

⁶ atlâhna bie reih pi ta, keimo balyh lâ kiah pi ta, âmo o lâ a di ei ta.

⁷ Tyre tawhta balyh ta sie lymâ pi ta, Patôlemai khih tlô pi ta, cha liata unawhzy a naoh pi ta, ama hnohta noh kha châh pi ta.

⁸ A mylâ ta pua pi ta, Kaisaria tlô pi ta, biechhotuhpa Phili o liata tlô pi ta. Ano cha pasaripazy hry liata a hlao hrapa a châ.

⁹ Sawchanô papalih hnei ta, âmo cha dyhchâ leipa ta hrohsona bie a phuah tyhpa ama châ.

¹⁰ Noh hluhpi châh pi ta, eima châh chhôh ta Zudia râh tawhta hrohsopa pakha, Akabâ ama tahpa a zu ta.

¹¹ Keimo lâ a vy ta, Pawla chaisaihna la ta, a ku nata a pheizy anosasyh ta a chahry ta, “Thlahpa Pathaihpa ta, ‘He chaisaihna a hneituhpa he Zerusale liata Zuzy ta he hawhta chahry aw ei ta, Zenitaizy ku liata ama hlâ aw,’ a tah,” tah ta.

¹² Cha biezy cha eima thei nahta, keimo nata cha khih liata chyhsazy ta Pawla cha Zerusale lâ sie lei awpa ta a haw pi ta.

¹³ Châhrasala Pawla ta, “Khazia cha ei chi ta, ei ngia eina pachhie ei chi? Abeipa Zisu moh vâta Zerusale liata patâhpa ta ei y awpa a mâ chiehpa ta ei ypa dei châ leipa ta, thi chhao ei mâ thlâh haw,” tah ta.

¹⁴ Pahnawhsa thei awpa a châ leipa vâta, “Abeipa rei sai châ mawh sy,” tah pi ta, eimâ chalihsai haw.

¹⁵ Cha nohzy hnôhlâ ta, eima hmozy la pi ta, Zerusale lâ khy pi ta.

¹⁶ Kaisaria khih liata pachupa thokhazy eima hnohta vaw sie hra ei ta, Kuparâ chyhsa Manâsô o lâ miah a chhi ei ta. Manâsô he ngiapâ tuapazy hry liata a hlao hrapa châ ta, a o liata a tlô awpa eima châ.

Pawla ta Zâmie â hmô

¹⁷ Zerusale eima tlô nahta, unawhzy ta thapha ngaitapa ta miah a vaw ly ei ta.

¹⁸ A mylâ ta Pawla chhaota Zâmie o lâ charei pi ta, Awnanopa machâ zydua vaw y khai ei ta.

¹⁹ Pawla ta âmo cha â naoh khai nah ei ta, a chakaona hmâpa ta Khazohpa ta Zenitaizy hry liata hmo a taopazy miakha miakha ta reih ta.

²⁰ Cha bie cha unawhzy ta ama thei nahta, Khazohpa palyupalih ei ta. Pawla hnohta, “Unawh, Zuzy hry liata ngiapâtuhpa ama hluhzie na hmô. Ama zydua ta ryhpa châta phahnai a ngiah ngaitapazy ama châ.

²¹ Zenitaizy hry liata Zu a ypa zydua hnohta, ama sawzy chopawtai awpa a byuh leizie pachu chi ta, Mawsi ryhpa a heihsaipa ta, eima phoryhpazy chhao zyh awpa a byuh leizie na pachu ei tahpa ama thei.

²² Kheihta eima tao aw? Na vaw tlôpa thâtih thei thlyu aw ei ta.

²³ Chavâta eima cha chhopa hawhta tao mah y. Bietai ry liata a y haipa chyhsa papalih hnei pi ta,

²⁴ âmo cha a chhi la, ama hnohta a pathai hra la, ama sâ angyuna mâ chhao piepa mah y. Chatanachata chyhsa zydua ta chyhsa pakah tawhta na thâtih ama theipa zydua cha hmeiseihpa châ vei tahpa pahno aw ei ta, nâma tlai chhao ryhpa a chhihpa ta na y hra tahpa a siapa ta ama cha pahno aw.

²⁵ Zenitai ngiapâtuhpazy kyh lia deikua cha, nothlahpa lâ atheihna hlâpa niepa, sa thisaih niepa, sa paaosaopa niepa nata apheina zy ama bâhsai awpa a byuhzie eima biepathlupa cha, châ ropa ta eima paphao haw,” tah ei ta.

²⁶ A mylâ ta Pawla ta bietai ry liata a ypa chyhsazy cha a chhi ta, ama hnohta a pathai hra ta, Achhyna o liata a ngia ta, amâ pathaina noh â ki nawpa daihti nata ama zydua châta atheihna hlâ nawpa kyhzy kei pahnosa ta.

Achhyna o liata Pawla patuna

²⁷ Noh sari a tloh chy ta, Asia râh liata Zuzy ta Pawla cha Achhyna o liata hmô ei ta, zawpi zydua pasyupa ta Pawla cha patu ei ta.

²⁸ “Izarei sawzy saih u, miah bao teh u! He chyhsa he râh to liata chyhsa zydua hnohta, Zu chyhsa nata ryhpa nata he Achhyna o chhao he a reipachhietuhpa kha a châ. Cha dei châ vei, Achhyna o liata Krikâh mo a ngiakhei ta, he su pathaihpa he a papuapalei,” tahpa ta awh ei ta.

²⁹ Cha hlâta khihpi liata Ephesi khihpa Tarôphimâ cha a hnohta hmô ei ta, Pawla ta cha chyhsa cha Achhyna o lâ â ngiakhei na ta ama pangiasa.

³⁰ A khihpi duata a tymâ ei ta, zawpi a râ pakhy ei ta. Pawla cha patupa ta Achhyna o tawhta a daophi ei ta, ochhizy thlai khaw ei ta.

³¹ Pawla thie amâ chhuah hai nota, Zerusale khih chhôh zydua â tyhreih khai hapa kyh pheisaih hyutuhpa kô vaw tlô ta.

³² Pheisaihzy nata pheisaih zakha hyutuhpazy a chhipa ta zawpi lâ thlai a râ ta. Zawpizy ta pheisaih hyutuhpa nata pheisaihzy ama hmô nahta, Pawla ama chheipa cha a chalih ei ta.

³³ Pheisaih hyutuhpa cha a vaw hnia ta, Pawla patu ta, bâlia miano paky awpa ta biepie ta. Ahy ma a châ, khâpa ma a tao, tahpa patluah ta.

³⁴ Zawpi hry liata thokha ta bie miakha awh ei ta, thokha ta bie hropa awh ei ta. A palopasah tupa vâta bie siapa pahno thei leipa ta, pheisaih su lâ a chhi awpa ta biepie ta.

³⁵ Zawpizy ta thata ama teipa vâta, kahmi a tlô nahta, pheisaihzy ta Pawla cha chalo ei ta.

³⁶ Zawpi a pazipazy ta, “Pahleipadia teh” tahpa ta awh ei ta.

³⁷ Pheisaih su ama tlô chy ta, Pawla ta pheisaih hyutuhpa hnohta, “Na hnohta bie kawh kha ei reih thei aw ma?” tah ta. Ano ta, “Krikâh reih na thai ma?

³⁸ Atlia ta chyhsazy pasyupali ta, chyhsa thie a hmâhpa sâh palih râhchawhpa lâ a chhituhpa, Izi chyhsa kha châ va chi mâ?” tah ta.

³⁹ Pawla ta a chhy ta, “Kei he Zu chyhsa, Silisia râh liata Tarsâ khihpa châ na ta, khitaw chyhsa châ va na. Zawpi hnohta bie rei eina pasai awpa chi ta ei châ haw,” tah ta.

⁴⁰ A paryhsa nahta, Pawla cha kahmi liata a duah ta, zawpi a chalih awpa ta a ku ta thliethlâ ta, amâ chalihpa nahta, Hebrai reih ta ama hnohta bie reih ta.