HMOTAOPAZY 16 - Mara Bible RV (BSI)

Pawla nata Sila hnohta Timawthy a sie

¹ Pawla cha Derbe nata Lystâ lâzy chhao sie ta. Cha liata Timawthy ama tahpa pachupa pakha y ta. Timawthy cha Zu chanô ngiapâtuhpa sawchapaw châ ta, a paw deikua cha Krikâh chyhsa a châ.

² Lystâ nata Ikônia liata unawhzy ta ano cha reithai kaw ei ta.

³ Pawla ta Timawthy cha a hnohta sie hra awpa khoh ta. Cha suzy liata a ypa Zuzy ta Timawthy paw cha Krikâh chyhsa a châpa ama pahno khaipa vâta, Zuzy vâna chata Pawla ta Timawthy cha a chhi ta, a chopaw pataisa ta.

⁴ Khihpizy chahryh ei ta, Zerusale liata lyuhchâpazy nata machâzy biepathlupa kha zyh awpa ta unawhzy ama chho lymâ.

⁵ Chatanachata Awnanopazy cha ngiapâna liata thapatlôpa ta y ei ta, noh charei ta pôh via lymâ ei ta.

Mâsidônia awna

⁶ Thlahpa Pathaihpa ta Asia râh liata bie chho awpa a pakhâ hapa vâta, Pharuzia nata Kalatia râhzy chahry ei ta.

⁷ Mysia râh ama tlô nahta, Bithunia râh liata a ngia a chhuah ei ta, châhrasala Zisu Thlahpa ta pasai leipa ta.

⁸ Mysia râh cha siepahlie ei ta, Tarôsa khih lâ zu ei ta.

⁹ Zâ ta Pawla ta aluahna hmô ta. Mâsidônia chyhsa pakha a vaw duah thlâh ha ta, ano chata, “Masidônia râh lâ a vy la, miah vaw bao teh,” tahpa ta a haw ta.

¹⁰ Cha aluahna cha Pawla ta a hmô nahta, ama hnohta Thâtihpha chho awpa ta Khazohpa ta miah a aw tahpa pahno pi ta, chatanachata Mâsidônia râh lâ cha thlai sie a chhuah pi ta.

Lydia pipathina

¹¹ Tarôsa tawhta balyh ta pua pi ta, Samôthe khihpi lâ palâh pi ta, a mylâ ta Nipôli khihpi lâ sie pi ta.

¹² Cha tawhna chata Philipi lâ sie pi ta. Philipi cha Mâsidônia râh liata khihpi peimawhpa châ ta, Rawma a vaopa khihpi a châ. Cha khihpi liata noh khazie tlyma châh pi ta.

¹³ Pahânoh ta thokhy chhikao khôtho lâ pua pi ta, chavah kiah liata thlahchhâna su a châ awpa ta eima pangiasapa lâ zu pi ta, a tyuh pi ta, chanô a vy pakhypa sahlaozy hnohta bie reih pi ta.

¹⁴ Eima bie a theipazy hry liata pakha cha, Thiatirâ zuah Lydia ama tahpa a châ. Ano cha poh nohsaihpa a zuahpa châ ta, Khazohpa a chhytuhpa chanô a châ. Pawla bie reipa a phapa ta pachâ awpa ta Abeipa ta a palôh pahy ta.

¹⁵ Ano nata a chhôhkhazy bâti ama châ khai nahta, eima hnohta, “Abeipa châta ngâchhihpa ta eina rao khiah ei chi ta la, ei o lâ a vy u la, vaw tlô teh u,” tahpa ta miah a haw ta. Chatanachata miah thlyu ha ta.

Pawla nata Sila patâhna o liata

¹⁶ Thlahchhâna su lâ eima sie nota, sei laihsa pakha ta miah a vaw tyh ta. Ano cha pachaothaina thlahpa a hneipa châ ta, pachaona bie a reipazy tawhta a zibeipa châta sôh hluhpi a hmô tyhpa a châ.

¹⁷ Cha chanô chata Pawla nata keimo miah zi ta, “He chyhsazy he Chônôchai Khazohpa chakaotuhpazy ama châ, pachhana lâpi ama cha vaw chho hih,” tahpa ta awh ta.

¹⁸ Cha hawhna chata noh hluhpi tao ta. Pawla cha a palôh châ khao leipa ta, a heih ta, thlahpa hnohna chata, “A chhôh tawhta pua awpa ta, Zisu Krista moh ta bie ei cha pie,” tah ta. Cha dawh lia tlai chata pua ha ta.

¹⁹ A zibeipazy ta ama sôh hmôna a lei haw tahpa ama pahno nahta, Pawla nata Sila cha patu ei ta, sôhdao su liata ryureituhpazy hmiakô lâ a daophi ei ta.

²⁰ Bie pachiatuhpazy lâ a chhi ei ta, “He chyhsazy he Zuzy châ ei ta, eima khihpi he ama patypamâ ngaita.

²¹ Keimo Rawma chyhsazy châta ânapa nata tao pasai leipa ryhpazy ama pachu lymâ,” tah ei ta.

²² Zawpizy chhao vaw pua ei ta, lyuhchâpazy cha a vaw dyuh hra ei ta. Bie pachiapatuhpazy ta lyuhchâpazy cha ama pohzy hrie ta, sôsi ta tu awpa ta biepie ei ta.

²³ Ei hluhpi ama chhei khai tawhta, patâhna o liata khô ei ta, patâhna o vaituhpa hnohta â bohpa ta vaih awpa ta biepie ei ta.

²⁴ Cha tlatlu ta ama biepiepa â ipa vâna chata, âmo cha patâhna chhôh chaipa liata khô ta, ama pheizy liata keihrai dai ta.

Patâhna o hyutuhpa pipathina

²⁵ Zâcho ta Pawla nata Sila cha Khazohpa lâ thlahchhâpa ta hlazy sa ei ta, atâhpazy ta nathlie ei ta.

²⁶ Eikhapi ta alo thata a vaw sih ta, patâhna o abônazy taihta a vaw chalyu ta. Ochhi zydua thlai a vaw pahy ta, atâhpazy keihrai cha a vaw pathlâ khai ha ta.

²⁷ Patâhna o vaituhpa cha â môpa a vaw hra ta, patâhna o ochhi a pahypazy cha hmô ta, atâhpazy cha amâ râ ha khiah ma tah ta, a zaozi phia ta a thie a chhuah ta.

²⁸ Pawla cha ao paro ngaitapa ta awh ta, “Kheihta hmah a pasasa khah y, eima zydua ta eima y khai thlâh haw!” tah ta.

²⁹ Patâhna o vaituhpa cha meiôh pado ta, thlai a ngia ta, chipa ta a chalyuna chôta Pawla nata Sila hmiakô liata â khu lâta pao ta.

³⁰ Âmo cha puakhei ta, “Pâpuh saih u, pachha ei châ thei nawpa ta khâpa ei tao aw?” tah ta.

³¹ Âmo ta, “Abeipa Zisu a ngiapâ la, pachhapa ta na y aw, nâ nata na chhôhkhazy chhaota,” tah ei ta.

³² Chatawhcha ano hnohta nata a o liata a ypa zydua hnohta Abeipa bie chho ei ta.

³³ Zâcho ta âmo cha a chhi ta, ama chheina hmahzy cha pasi ta, ano nata a chhôhkhazy cha bâti châ ha ei ta.

³⁴ Lyuhchâpazy cha a o lâ a chhi ta, âmo châta pati taopa ta, Khazohpa amâ ngiapâ hapa vâta ano nata a chhôhkha zydua ta a ly ngaita ei ta.

³⁵ Noh a vaw chhi nahta, bie pachiatuhpazy ta, “Kha chyhsazy kha papua teh,” tahpa ta pheisaihzy tuah ei ta.

³⁶ Cha bie cha patâhna o vaituhpa ta, Pawla chho ta, “Cha papua awpa ta, bie pachiatuhpazy ta chyhsa ama vaw tuah. Chavâta tahmâ vaw pua u la, thlalôhpa ta sie teh u,” tah ta.

³⁷ Châhrasala Pawla ta pheisaihzy hnohta, “Rawma chyhsa châ pi ta, thailei a châpa chhao châ leipa pi ta, vâtlâh mohmô ta miah chhei ei ta, patâhna o liata miah khô ei ta, tahmâ arulâta papua awpa zua miah amâ chhuah mâ? Châ bao va! Âmo tlai ta a vy ei sala, miah vaw papua mawh ei sy,” tah ta.

³⁸ Cha biezy cha pheisaihzy ta bie pachiatuhpazy hnohta tlôkhei ei ta, Rawma chyhsa ama châpa ama pahno nahta, chi kaw ei ta.

³⁹ Vawh ei ta, reihpha cheih ei ta, papua ei ta, khihpi puasai awpa ta a haw ei ta.

⁴⁰ Pawla nata Sila cha patâhna o tawhta pua ei ta, Lydia kei tly ei ta. Cha liata unawhzy hmô ei ta, thlah ama palôh khai nahta, sie ha ei ta.