HMOTAOPAZY 15 - Mara Bible RV (BSI)

Zerusale pakhypi

¹ Chyhsa thokha Zudia râh tawhta a zu ei ta, “Mawsi ryhpa hawhta chopaw namâ tai leipa khiahta la, pachhapa châ thei aw veih ei chi,” tahpa ta unawhzy pachu ei ta.

² Pawla nata Bânabâ cha âmo nata a hryupâpa ta thata a ei ei ta. Pawla nata Bânabâ cha unawh thokhazy chhaota, cha bie kyh vâna chata Zerusale liata lyuhchâpazy nata machâzy lâta khy awpa ta rao ei ta.

³ Awnanopa ta pathlie ei ta, Zenitaizy ama pipathina kyh chho lymâpa ta, Phônisia râh nata Samâri râh chahryh khai ei ta, cha thâtih chata unawh zydua palysa ngaita ta.

⁴ Zerusale ama tlô nahta, Awnanopa sahlaozy, lyuhchâpazy nata machâzy ta a vaw ly ei ta, Khazohpa ta âmo hmâpa ta hmo a taopa zydua cha chho ei ta.

⁵ Châhrasala Phârisaihzy py liata a ypa ngiapâtuhpa thokha ta a duah ei ta, “Zenitaizy cha ama chopaw tai thlyu awpa châ ta, Mawsi ryhpa zyh awpa ta biepie awpa a châ,” tah ei ta.

⁶ Cha bie cha pachâ awpa ta, lyuhchâpazy nata machâzy a hmaohpakhy ei ta.

⁷ Thata amâ ei tawhta, Pity a duah ta ama hnohta, “Unawh saih u, Zenitaizy ta keima pakah tawhta thâtihpha bie theipa ta a ngiapâ awpa ta, daihti hmiatuapa liana khata Khazohpa ta nâmo hry liata kei he eina raozie kha nama pahno.

⁸ Palôh pahnotuhpa Khazohpa ta Zenitaizy â pyh ei tahpa cha, keimo chô liata a taopa hawhta, âmo chhao Thlahpa Pathaihpa a pie hrapa liana heta a palâsa haw.

⁹ Keimo nata âmo likah panano leipa ta, ngiapâna ta ama pathipalôh a pathaisa ha ei.

¹⁰ Chavâta khazia ma, miah pathlatuhpazy nata keimo chhao ta eima pahnie leipa raopakypa cha, tahmâ pachupazy rao liata pahniepa ta Khazohpa chakhia namâ chhuah tly?

¹¹ Keimo chhao, âmo chhao, Abeipa Zisu ngiachhiena vâta pachhapa ta eima y aw tahpa a ngiapâpa eima châ khai,” tah ta.

¹² Chatanachata zawpi zydua cha a chalih ha ei ta, Bânabâ nata Pawla ta âmo hmâpa ta Khazohpa ta Zenitaizy hry liata ngiana nata hmonoâhpa a taopa kyh ama reipazy cha nathlie ei ta.

¹³ Âmo ama rei khai nahta, Zâmie ta reih ta, “Unawh saih u, ei bie nathlie teh u.

¹⁴ Khazohpa ta Zenitaizy hry tawhta ano moh a phaohpa phopi padua awpa ta, âmo lâ a tly tua nota thâtih kha Simeôna ta miah a chho haw.

¹⁵ Cha kyh cha hrohsopazy bie nata chhao a ryh ta, hrohsopazy ta,

¹⁶ “‘Cha khai tawhta kua aw na ta, Dâvi poh o a cho hapa kha Ei sa pathi heih aw; A raonazy sa pathi aw na ta, Ei paduapathi aw.

¹⁷ Chatanachata chyhsapa laibâhpazy ta Abeipa tlua aw ei ta, Ei moh a phaohpa Zenitai zydua ta Abeipa cha ama tlua aw, Abeipa ta a tah; Cha zydua taotuhpa,

¹⁸ Hlâno tawhta pahnopa Abeipa ta a tah,’ tahpa ta ama vaw chho haw.

¹⁹ Chavâta kei ta pha ei tahzie ta la, Khazohpa lâ a heihpa Zenitaizy he ama rie pathei lei awpa ei khoh.

²⁰ Âmo lâ châ paphao sih la, nothlahpa achhyna hmo pathaih leipa niepa, apatlapa, paaosaopa nata thisaih niepa zy tao khao leipa ta bâhsai awpa ta chho ei sih la, â daihpa ta ei pahno.

²¹ Mawsi ryhpa he, hlâno tawhta khi to liata phuah tyhpa châ ta, Pahânoh maihta pakhyna ozy liata rei tyhpa a châpa kha,” tah ta.

Pakhypi biepathlupa

²² Chatawhcha lyuhchâpazy, machâzy nata Awnanopa zydua ta ama hry tawhta chyhsa pano a tlyh ta, Pawla nata Bânabâ hnohta Antiôkâ lâ pasiesa awpa cha pha tah ei ta. Unawhzy hry liata hyutuh viapa Bâsabâ ama tahpa Zudâh nata Sila zy a tlyh ei ta.

²³ Hetana heta châ roh ei ta, ama tuapazy ku liata ama paphao. “Nama unawhpa lyuhchâpazy nata machâzy ta, Antiôkâ khih nata Suria râh nata Silisia râhzy liata a ypa eima unawhpa Zenitai ngiapâtuhpazy eima châ naoh.

²⁴ “Eima hry liata chyhsa thokha ta keimo biepie leipa ta nâmo lâ a zu ei ta, ama bie reipa ta cha patypamâ ei ta, noraihpa ta ama cha paysapa thâtih eima vaw thei.

²⁵ Chavâta reihkha tlapa ta a hmaoh pi ta, chyhsazy a tlyh sih la, eima kho ngaitapa Bânabâ nata Pawla hnohta nâmo lâ za tua awpa a phapa ta eima pahno.

²⁶ Bânabâ nata Pawla cha eima Beipa Zisu Krista moh vâta ama hrona a sokhâhpazy ama châ.

²⁷ Chavâta Zudâh nata Sila za tuah pi ta, âmo ta hmo yzie pakah ta ama cha chho aw.

²⁸ He hmo peimawhpazy dei leipa ta cha, phaohri hropa cha pavi lei awpa ta, Thlahpa Pathaihpa nata keimo ta a pha eima tah:

²⁹ Nothlahpa lâ atheihna sa niepa, sa thisaih niepa, paaosaopa niepa nata apheina zy nama bâhsai awpa a phapa ta eima pahno. Chazy cha nama bâhsai khiahta cha, nama châta a pha aw. Atlâhpa ta.”

³⁰ Chatanachata pasiesa ei ta. Antiôkâ ama tlô nahta, zawpi awpakhy ei ta, châ cha pie ei ta.

³¹ Châ cha reih ei ta, thlapalôhna bie vâta a ly ngaita ei ta.

³² Hrohsopa Zudâh nata hrohsopa Sila ta bie hluhpi ta unawhzy cha thlah palôhpa ta, thapatlô ei ta.

³³ Cha liata khachâ rakha ma ama y tawhta, âmo a zâ tuahtuhpa lâta a lie awpa ta unawhzy ta thlalôhpa ta pasiesa ha ei ta.

³⁴ Sila deikua cha, cha liata y chy awpa a phapa ta pahno ta.

³⁵ Pawla nata Bânabâ chhao Antiôkâ liata y via chy ei ta, mohropa hluhpi chhaota Abeipa bie pachu ei ta, ama chho lymâ.

Pawla nata Bânabâ achhaihna

³⁶ Noh khazie tlyma a khô tawhta, Pawla ta Bânabâ hnohta, “Sie heih sih la, Abeipa bie eima chhona khi to liata unawhzy kei tly laih sih la, khâpa ma ama lyu tahpa kei moh laih ei suh u,” tah ta.

³⁷ Bânabâ ta Zawhâna Mâka a chhi khoh ta.

³⁸ Pawla deikua ta Zawhâna Mâka cha Pamphulia râh tawhta âmo kuasai ta, ama hnohta raihriana lâ a sie khao leipa vâna khata, ano a chhi heih awpa cha pha tah khao leipa ta.

³⁹ Thata a ei ei ta, amâ chhaih pâ haw. Bânabâ ta Mâka a chhipa ta Kuparâ liahpahlô lâ balyh ta sie ta.

⁴⁰ Pawla deikua cha Sila a tlyh ta, unawhzy ta Abeipa ngiachhiena liata ama pavaosa khai nahta sie ei ta.

⁴¹ Suria nata Silisia râhzy chahryh ta, Awnanopazy thapatlô lymâ ta.