HMOTAOPAZY 14 - Mara Bible RV (BSI)

Pawla nata Bânabâ Ikônia liata

¹ Ikônia khih liata Zuzy pakhyna o liata ama pano ta a ngia ei ta, bie reih ei ta, Zu nata Krikâh chyhsa hluhpi ta a ngiapâ ei ta.

² Ngiapâ khoh leipa Zuzy ta Zenitaizy pasyu ei ta, unawhzy cha pahaosa ei ta.

³ Abeipa liata riahpha ngaitapa ta bie reipa ta, cha liata bohpi y ei ta, Abeipa ta ngiana nata hmonoâhpazy ama ku ta pataosapa ta, a ngiachhiena bie ama reipa cha pahnokhei lymâ ta.

⁴ Khihpi zawpizy cha py no ta a pachhaih ei ta, py kha ta Zuzy cha a châh ei ta, py kha ta lyuhchâpazy a châh ei ta.

⁵ Zenitaizy, Zuzy nata ama ryureituhpazy ta lyuhchâpazy cha taochhiepa ta alô ta vaw a chhuah ei ta.

⁶ Cha kyh cha ama pahno nahta, lyuhchâpazy cha Lykônia râh liata Lystâ nata Derbe khihpizy nata a chheipâh khitawzy lâta a râ ei ta,

⁷ cha suzy liata thâtihpha chho lymâ ei ta.

Lystâ liata Pawla alô ta ama vawh

⁸ Lystâ khih liata pheisypa pakha y ta. Pheisypa ta a pihpa châ ta, phei ta a sie beih leipa a châ.

⁹ Cha chyhsa chata Pawla bie reipa cha nathlie ta. Pawla ta ano cha a phapa ta moh ta, tlâh nawpa ta ngiapâna a hneipa pahno ta.

¹⁰ Ao paro ngaitapa ta a hnohta, “Na phei ta a duah teh,” tah ta. Ano cha kaw thyu ta, phei ta sie ha ta.

¹¹ Zawpizy ta Pawla hmotaopa cha ama hmô nahta, Lykônia reih ta, ao paro ngaitapa ta, “Khazohzy ta chyhsapa hawhta keimo lâ amâ zu hih!” tah ei ta.

¹² Bânabâ cha Zupitâ tah ei ta, Pawla cha bie a reihtuh chaipa a châpa vâta Merkuri tah ei ta.

¹³ Zupitâ achhyna o cha khihpi hawka liata y ta, Zupitâ theihthaipa ta viahchao tôhpazy nata pawpi pachhihzy thokhy chhikaozy lâ vaw cheih ta, ano nata zawpizy ta lyuhchâpazy lâ atheihna hlâ a chhuah ei ta.

¹⁴ Cha thâtih cha lyuhchâpa Bânabâ nata Pawla ta ama thei nahta, ama chysiazy hrie ei ta, zawpi lâ a râpa ta, awh ei ta,

¹⁵ “Pupa saih u, he hmozy he khazia nama tao? Keimo he nâmo nôchâ hawhpa a phaohpa chyhsapa eima châ hra. He hmo khâpa hraoleipazy he a heihsaipa ta, avâ nata alei nata tilaipi nata a chhôh liata a ypa zydua a taotuhpa Khazoh hrohpa lâ a heih awpa ta, nama hnohta thâtihpha eima vaw tlôkhei.

¹⁶ Hlâno daihtizy liata cha, phopi to âmo lâpi chyu a chhih awpa ta Khazohpa ta pasaih ta.

¹⁷ Chatahrasala a pahnokheituhpa y leipa ta y beih vei. Hmo phapa tao lymâpa ta, avâ tawhta vâsuazy nata kô pha kôzy cha pie ei ta, niepa nata alyna ta nama palôh a cha pabie tyh ei,” tah ei ta.

¹⁸ Cha biezy chata zawpizy cha âmo lâ atheihna hlâ lei awpa ta pakhâ thei lylia ei ta.

¹⁹ Antiôkâ nata Ikônia tawhta Zuzy vaw tlô ei ta, zawpizy cha pasyu ei ta, Pawla cha alô ta vawh ei ta, a thi hapa ta ama pangiasa vâta khihpi khôtho lâ a daophi ei ta.

²⁰ Châhrasala pachupazy a kiapâh liata amâ vaw hmaoh nahta, vaw thyu ta, khihpi lâ a ngia heih ta, a mylâ ta Bânabâ nata Derbe khih lâ sie ei ta.

²¹ Derbe khihpi liata thâtihpha chho ei ta, pachupa hluhpi ama tao tawhta, Lystâ, Ikônia nata Antiôkâ lâ a lie ei ta.

²² Riethei hluhpi taopa ta Khazohpa khinarâh eimâ ngia awpa a châ, tahpa ta pachupazy palôh pa-ipa ta, ngiapâna liata y thlâh ha awpa ta thapatlô ei ta.

²³ Awnanopa hlao to liata machâzy raopa ei ta, kâhvileipa ta thlahchhâpa ta, amâ ngiapâpa Abeipa liata ama pavaosa lymâ.

Suria râh Antiôkâ lâ amâ lie

²⁴ Pisidia râh ama chahryh khai tawhta, Pamphulia râh tlô ei ta.

²⁵ Perkâ liata bie ama chho khai nahta, Atalia khih lâ zu ei ta.

²⁶ Atalia tawhta balyh ta Antiôkâ lâ sie ei ta. Antiôkâ khih cha, ama rai hria awpa ta Khazohpa ngiachhiena liata pavaosapa ta ama yna khih kha châ ta, raihria ama patlô tawhta, cha khih lâ cha amâ lie heihpa a châ.

²⁷ Ama tlô nahta, Awnanopa sahlaozy awpakhy ei ta, Khazohpa ta âmo hmâpa ta hmo a taopa zydua nata Zenitaizy châta ngiapâna ochhi a pahyzie zy chho ei ta.

²⁸ Pachupazy hnohta bohpi y ei ta.