HMOTAOPAZY 13 - Mara Bible RV (BSI)

Bânabâ nata Sawla tuapapuana

¹ Antiôkâ Awnanopa sahlaozy hry liata hrohsopazy nata pachutuhpazy y ei ta. Chazy cha Bânabâ zy, Nikâ ama tahpa Simeôna zy, Kurini khihpa Lukia zy, Bei Herawda unawh heihpa Manaina nata Sawla zy ama châ.

² Abeipa a chhypa ta kâhvileipa ta ama y hai nota, Thlahpa Pathaihpa ta, “Bânabâ nata Sawla kha âmo ei awna chhâpa rai hria awpa ta na pananopa teh u,” tah ta.

³ Kâhvileipa ta thlah ama chhâ khai nahta, Bânabâ nata Sawla chô liata ama ku pahnieh ei ta, pasiesa ha ei ta.

Bânabâ nata Sawla Kuparâ lâ ama sie

⁴ Bânabâ nata Sawla cha Thlahpa Pathaihpa tuapa ta sie ei ta, Selukia khih lâ zu ei ta, cha tawhna chata Kuparâ liahpahlô lâ balyh ta sie ei ta.

⁵ Salâmi khih ama tlô nahta, Zuzy pakhyna ozy liata Khazohpa bie chho ei ta. Zawhâna chhao âmo bao awpa ta a chhi ei ta.

⁶ Liahpahlô zydua chahryh ei ta, Pafawsâ khih tlôna taihta sie ei ta. Cha liata dyuthaipa pakha a tyh ei ta, ano cha Zu chyhsa hrohso pakheipa, a moh Barzisu ama tahpa châ ta,

⁷ cha chyhsa cha râhvaotuhpa so kawpa Sâzia Pawla hnohta a ypa a châ. Khazohpa bie a thei khohpa vâta, Sâzia Pawla ta Bânabâ nata Sawla cha aw ta.

⁸ Châhrasala dyuthaipa Elaimâ ta râhvaotuhpa cha ngiapâna patleisa a chhuahpa ta, Bânabâ nata Sawla cha pakhâpadie ta. Elaimâ cha dyuthaipa tahna a châ.

⁹ Sawla, Pawla ama tah hrapa cha, Thlahpa Pathaihpa ta biepa ta, dyuthaipa cha moh pahroh ta,

¹⁰ a hnohta, “Nâ, ahripa sawchapawpa, nâ, siana khakhaipa, dôveina nata nôchhiena ta a biepa, Abeipa lâpi palâpa na pakosapa he bâh aw va chi mâ?

¹¹ Chavâta tahmâ moh teh, Abeipa ku na chô liata tla ha ta, na mo chao aw ta, daihti khasâ chhôh ma cha noh khaihpa hmô aw va chi,” tah ta. Ameih nata zohna ta thlai vaw khu ta, chaaotuhpa tluapa ta pathâpazi ta.

¹² Abeipa pachuna bie thei ta, hmo tlôpa a hmô nahta, râhvaotuhpa cha noâh tah kaw ta, â ngiapâ ha ta.

Pawla nata Bânabâ Pisidia râh Antiôkâ liata

¹³ Pawla nata a sielâhpazy cha Pafawsâ tawhta balyh ta sie ei ta, Pamphulia râh liata Perkâ khih tlô ei ta. Zawhâna cha âmo siesaipa ta Zerusale lâ kua ha ta.

¹⁴ Pawla nata Bânabâ deikua cha Perkâ tawhta sie lymâ ei ta, Pisidia râh liata Antiôkâ khih tlô ei ta. Pahânoh ta pakhyna ozy liata a ngia ei ta, a tyuh ei ta.

¹⁵ Ryhpa châbu nata hrohsopazy châbu tawhta ama rei khai nahta, pakhyna o hyutuhpazy ta âmo lâ chyhsa tuah ei ta, “Unawh saih u, zawpi châta pasyuna bie nama hnei khiahta cha, reih teh u,” tah ei ta.

¹⁶ Pawla a kaw duah ta, a ku ta zie ta, bie reih ta, “Izarei chyhsazy nata Khazohpa a chipazy saih u, nathlie teh u.

¹⁷ He Izarei phopi Khazohpa heta miah pathlatuhpazy a tlyh ta, Izi râh liata ama y nona khata phopi rônahpa ta padua ta, cha tawhna chata bâh pazawhpa ta âmo cha chhi papua ta.

¹⁸ Kô sypalih chhôh tlai râhchawhpa liata âmo mohôh ta.

¹⁹ Kâna râh liata phopi mia sari a panawh khai tawhta, Kâna mo râh cha ama ryuto râh châta a pie ei.

²⁰ Cha taih chata kô 450 a ryu. Cha khai tawhta Khazohpa ta Izarei sawzy cha ryureituhpazy pie tyh ta, Samuela kha ryureituhpa chhâna a châ.

²¹ Cha khai tawhta abei hiah ei ta, Khazohpa ta Benzami chi, Kisâ sawchapawpa Sawla cha ama bei ta pie ta, Sawla cha kô sypalih chhôh a bei ta.

²² Sawla a thy tawhta, Khazohpa ta Dâvi cha ama bei châta padua ta, Khazohpa ta, ‘Zese sawchapawpa Dâvi liata, ei palôh a phaohpa, ei khopa zydua a tao awpa ei hmô haw,’ tah ta.

²³ Khazohpa ta a bietai hawhta, Dâvi chipathla Zisu cha Izarei pachhatuhpa châta padua ta.

²⁴ Ano â vy hlâta, Zawhâna ta rona bâtina kyh Izarei phopi zydua hnohta vaw chho ha tua ta.

²⁵ A raihria a patlô chy ta, Zawhâna ta, ‘Ahy châ aw sah la eina pangiasa ei chi? Ano cha châ va na. Moh teh u, ei hnôhlâ ta chyhsa pakha â vy hai, kei la a pheiky ri a pathlâ tlâh chhao châ va na,’” tah ta.

²⁶ “Unawh saih u, Abarahâ pathla sawzy saih u, nama hry liata Khazohpa a chipa zydua saih u, he pachhana bie he keimo hnohta paphaopa eima châ.

²⁷ Zerusale liata a ypazy nata ama ryureituhpazy ta ano cha pahno leipa ei ta, Pahânoh maihta rei tyhpa hrohsopazy bie chhao ama pahno leipa vâta, ano cha thailei pachâsapa ta, hrohsopazy bie ama patlôsapa a châ.

²⁸ Thina tlâh a châpa thaileichâna ano liata ama hmô leipa chhao ta, thie awpa ta Pilâ liata a haw ei ta.

²⁹ A thâtih ro chhieliepa zydua ama patlôsa khai nahta, tho tawhta la ei ta, thlâ liata pazia ei ta.

³⁰ Châhrasala Khazohpa ta athihpa hry tawhta a pathyu haw.

³¹ Kâlili râh tawhta Zerusale lâ a hnohta a khy hrapazy hnohta noh hluhpi chhôh a luah ta, tahmâ âmo cha Izare phopi lâta a bie a pahnokheituhpazy ama châ.

³² Pathlatuhpazy hnohta Khazohpa ta bie â taihpa thâtihpha kha eima cha vaw chho hih.

³³ Cha bietai cha Khazohpa ta Zisu a pathyuna liata, keimo ama pathlazy liata a vaw tlôpa a châ. Hlazy nuby mianona lia chhao ta, “‘Ei Sawchapawpa châ chi ta, Tanoh he na paw ei châ,’ tahpa ropa a châ.

³⁴ Athihpa hry tawhta pathyupa ta, thu theipa lâta â lie heih khao lei awpa kyh liata chhao, Khazohpa ta, “‘Dâvi pathaihna nata byhnâzy Ei cha pie aw,’ tah ta.

³⁵ Hla hropa liata chhao, “‘Na Mo Pathaihpa cha, A thuzao awpa pasaih aw va chi,’ tahpa ta a reih hra.

³⁶ “Dâvi cha Khazohpa hmochhuahpazy ano chhâ liata a chakao khai tawhta, a mô ta, a pathlatuhpazy hnohta paziapa châ ta, a thuzao khai haw.

³⁷ Khazohpa pathyupa deikua cha thuzao vei.

³⁸ Chavâta unawh saih u, he hmo he pahno teh u, cha chyhsa vâta moleinazy ngiahthaina kyh nama hnohta phuahpa a châ hih.

³⁹ Ahy rai a ngiapâpa maih cha ato liata thai pachâsapa ta ama y. Mawsi ryhpa ta la, chazy liata thai pachâsapa ta y thei veih ei chi.

⁴⁰ Chavâta a hrohrua teh u, chataleipatala, hrohsopazy châbu ta,

⁴¹ “‘Nâmo, mohnaotuhpazy saih u, moh teh u, Nama noâh sala, leidia teh u; Nama hro chhôh ta hmo miakha tao na ta, Cha chho hra ei sala, Zo aw veih ei chi,’ tahpa ta a reipa biezy nama chô liata a vaw tlô pathlei aw na,” tah ta.

⁴² Ama pua nahta, cha biezy cha Pahânoh heihpa liata reih heih awpa ta zawpizy ta a haw ei ta.

⁴³ Pakhyna a pai nahta, Zuzy nata Khazohpa a pachâpa Zu phohlypa hluhpi ta Pawla nata Bânabâ cha zi ei ta, âmo cha bie a chho ei ta, Khazohpa ngiachhiena liata y thlâh ha awpa ta pasyu ei ta.

⁴⁴ Pahânoh heihpa liata, a khihpi rô ta Khazohpa bie nathlie awpa ta a vaw pakhy ei ta.

⁴⁵ Zuzy ta zawpizy cha ama hmô nahta, hiatliana ta bie ei ta, Pawla bie reipa cha chakhiapa ta, reipachhie ei ta.

⁴⁶ Pawla nata Bânabâ ta riahpha ngaitapa ta, “Khazohpa bie he nâmo liata rei tua chai awpa tlai châ ta, châhrasala dytha ei chi ta, chhâzaw hrona to tlâh châ lei awpa ta, nâmosasyh ta namâ tao ha hnohkua cha, pachâ teh u, Zenitaizy lâ eimâ heih ha aw.

⁴⁷ Cha hawhta tao awpa ta Abeipa ta, “‘Khizaw kaokih chhâna taihta Pachhana tlôkhei awpa ta, Zenitaizy châta khaihna ta ei cha tao aw,’ tahpa ta bie miah a pie,” tah ei ta.

⁴⁸ Cha biezy cha Zenitaizy ta ama thei nahta, a ly ngaita ei ta, Khazohpa bie cha parônahsa ei ta; chhâzaw hrona hnei awpa ta raopa hluhpizy cha a ngiapâ ha ei ta.

⁴⁹ Abeipa bie cha cha râh zydua liata pathâh lymâ ta.

⁵⁰ Zuzy ta chanô zachhihpa Khazohpa pachâpazy nata khih machâzy pasyu ei ta, Pawla nata Bânabâ cha pataolasa ei ta, ama râh tawhta papua ei ta.

⁵¹ Pawla nata Bânabâ ta âmo cha ama phei buchadoh chatho thlu ei ta, Ikônia khih lâ ama sie haw.

⁵² Chatanachata pachupazy cha alyna nata Thlahpa Pathaihpa ta bie ei ta.