HMOTAOPAZY 12 - Mara Bible RV (BSI)

Zâmie thina nata Pity patâhna

¹ Cha daihti rachhôh liata, Bei Herawda ta Awnanopa sahlao thokha chô liata a ku hypa ta taola ta.

² Zawhâna unawhpa Zâmie cha zaozi ta thie ta.

³ Cha chata Zuzy a palysa tahpa a pahno nahta, Pity chhao patu a chhuah heih ta. Cha cha viahchhâ thinô pahlao leipa kyhchhi nohzy liata a châ.

⁴ Herawdâ ta Pity cha patu ta, patâhna o liata khô ta, pheisaih papalih lymâ ta pavaisa ta. Zawpakhô khai tawhta zawpi hmiakô liata a thâtih pachia awpa a chhuah ta.

⁵ Chavâta Pity cha patâhna o liata paysa chypa châ ta, Awnanopa ta ano châta phahnai khoh ngaitapa ta Khazohpa lâ thlahchhâ ei ta.

Patâhna o tawhta Pity a pua

⁶ Herawda ta a papua chy ta, cha zâ liana tlai chata, Pity cha pheisaih pano likawh ta, bâlia miano pakypa ta a mô ta. Vaituhpazy cha ochhi thaby liata ypa ta, patâhna o cha vaih ei ta.

⁷ Abeipa vâlyuhchâpa a kiapâh liata a vaw duah ta, patâhna o chhôh cha vaw khaih ta. Pity kâ liata kei chabaih ta, pahra ta, a hnohta, “Thyu para teh,” tah ta. Bâliazy cha a ku tawhta tla ha ta.

⁸ Vâlyuhchâpa ta a hnohta, “Na poh a bu la, na pheiky a ky teh,” tah ta. Pity ta cha hawhta tao ta. Vâlyuhchâpa ta a hnohta, “Na poh kha pakhâta ta a bu la, na zi teh,” tah ta.

⁹ Pity cha pua ta, zi ha ta. Vâlyuhchâpa hmotaopa cha a hmeiseihpa a châ tahpa pahno leipa ta, aluahna a hmôpa hawhta pachâ ta.

¹⁰ Vaituhpa tytuapa nata a pazipa ama khô tawhta, khihpi lâ puana thua ochhi kei tlô ei ta. Ochhi cha ama châta ano khota a vaw pahy ta, pua ei ta, khiliah liata ama sie hai nota, vâlyuhchâpa chata siesai ha ta.

¹¹ Pity cha â vaw thei nahta, “Abeipa ta a vâlyuhchâpa za tuah ta, Herawda ku tawhta nata Zu chyhsazy achhuahna tawhta eina pachha haw, tahpa tahmâ a siapa ta ei pahno haw,” tah ta.

¹² Hmo yzie a pahno pasia tawhta, Mâri o lâ vawh ta. Mâri cha Zawhâna Mâka ama tahpa nô châ ta, cha liata thlahchhâpa ta chyhsa hluhpi vaw ypakhy ei ta.

¹³ Aikah chhikao kei chakhyh ta, laihsa pakha, Rôdâ ama tahpa cha ochhi pahy awpa ta vawh ta.

¹⁴ Pity ao a châpa a pahnopa nahta, â ly tupa ta chhikao chhao pahy khao leipa ta, o chhôh lâ a râ ta, chhikao thaby liata Pity â duah thlâh ha tahpa kei reih ta.

¹⁵ Âmo ta a hnohta, “Na hru ha he,” vaw tah ei ta. Laihsa ta a hmeiseihpa a châzie khâchâ a pachyu ta, âmo ta, “A vâlyuhchâpa a châ chuh,” tah heih ei ta.

¹⁶ Châhrasala Pity ta chhikao cha chakhyh ngâ thlâh ha ta, ama pahy nahta, Pity cha hmô ei ta, ama noâh ngaita ta.

¹⁷ A chalih awpa ta a ku ta thliethlâ ta, Khazohpa ta patâhna o tawhta a papuanazie âmo cha chho ta. “Cha biezy cha Zâmie nata unawhzy kei chho teh u,” tah ta. Pity cha pua ta, su hro lâ sie ha ta.

¹⁸ Khih a vaw deipa nahta, pheisaihzy cha Pity khataih liata a y haw, tahpa ta thata a tyhreih ei ta.

¹⁹ Herawda ta Pity cha tlua ta, a hmô thei khao lei nahta, vaituhpazy kyh cha a chu pasiapa ta, âmo cha thie awpa ta biepie ta. Herawda cha Zudia tawhta Kaisaria lâ zu ta, cha liata y thlâh ha ta.

Herawda thina

²⁰ Herawda cha Tyre nata Sidaw mo chô liata a hiehâh kaw ta. Tyre mo nata Sidaw mo ta bei chakaotuhpa Blâstâ cha âmo chhâh a châ awpa ta ama viasa ta tao ei ta, reihkha tlapa ta, abei lâ a vy ei ta, aryhna tao awpa ta a haw ei ta. Ama râh cha niedo kyh liata abei râh chô liata a pahniehpa ama châpa vâta, aryhna cha amâ hawpa a châ.

²¹ Noh taipa noh ta, Herawda cha abei poh a bu ta, a beidyuchhai liata a tyuh ta, ama hnohta bie reih ta.

²² Zawpizy ta, “Khazoh ao a châ, chyhsapa ao châ vei!” tahpa ta awh ei ta.

²³ Herawda cha Khazohpa hnohta palyupalihna a pie leipa vâta, eikhapi ta Abeipa vâlyuhchâpa ta vaw tu ta, alôpa ta nie ta, thi ha ta.

²⁴ Khazohpa bie cha laiseih via rilipa ta, pôh lymâ ta.

²⁵ Bânabâ nata Sawla cha chakaona rai ama hria khai tawhta, Zawhâna Mâka ama tahpa a chhi ei ta, Zerusale tawhta a lie ha ei ta.