HMOTAOPAZY 1 - Mara Bible RV (BSI)

Thlahpa Pathaihpa bietai

¹ Hy Theôphilâ y, châbu hmiatuapa liana khata, Zisu hmotaopa nata a pachu pathaona tawhta roh na ta,

² lyuhchâpa â tlyhpazy hnohta Thlahpa Pathaihpa hmâpa ta bie a pie khai nahta, vârâh lâ chhihthapa ta a yna noh taihta ei roh.

³ Riethei a tao khai tawhna khata, noh sypalih tlai a pachupazy hnohta a luah ta, Khazohpa khinarâh thâtih reih lymâ ta, a hroh ha heih tahpa pasia nawpa ta kyh hluhpi ta â pahnosa.

⁴ Ama hnohta a y nota, a pachupazy cha Zerusale puasai leipa ta Paw bietaipa vaw tlô awpa hâ awpa ta biepie ta, ama hnohta, “Ei bie reipa nama theipa hawhna khata,

⁵ Zawhâna kha ti ta bâti pachâsa ta, bohpi leipa ta Thlahpa Pathaihpa ta bâti pachâsapa nama châ aw,” tah ta.

Vârâh lâ kiana

⁶ Amâ vaw pakhy nahta, âmo ta a hnohta, “Abeipa, tahmâ he ma Izarei châta khinarâh na padua heih aw?” tahpa ta hiahri ei ta.

⁷ Zisu ta ama hnohta, “Paw ta a daihti nata a noh kyh cha ano biehneina liata soh ta, nâmo pahno awpa châ vei.

⁸ Châhrasala Thlahpa Pathaihpa nama chô liata a vaw tlô tita, hmotaotheina nama hnei aw. Chatanachata Zerusale liata zy, Zudia râh nata Samâri râh khi to liata zy, kaokih taih chhao ta ei bie pahnotuhpazy nama châ aw,” tah ta.

⁹ Cha biezy cha a rei khai nahta, ama hmô thlâh ha nota, avâ lâ a chhipa ta y ta, meihdo ta ama hmô khao leina taihta siekhei ha ta.

¹⁰ Vârâh lâ a kiapa ama mo thlâh ha nota, chyhsa pano poh diehpa a bupa ta ama kiapâh liata a vaw duah ei ta.

¹¹ Cha chyhsazy chata, “Kâlili mo saih u, khazia vârâh lâ mopa ta namâ duah thlâh haw? Zisu, nâmo tawhta vârâh lâ a chhipa ta a ypa kha, vârâh lâ a kiapa nama hmôpa hawhna heta â vy heih aw,” tah ei ta.

Zudâh a thlatuhpa atlyhna

¹² Chatawhcha Ôli tlâh ama tahpa tawhta Zerusale lâ kua ei ta. Cha tlâh cha Zerusale kiapâh, Zerusale tawhta Pahânoh lâsie rakhapa liata a ypa a châ.

¹³ O amâ ngia nahta, Pity, Zawhâna, Zâmie, Adaru, Phili nata Thawma, Bâthawlawmu nata Mathai, Alphu sawchapawpa Zâmie nata Saimaw, Zilô py liatapa nata Zâmie sawchapawpa Zudâh zy cha ama yna chhôhpadâhpa chô chaipa lâ khy ei ta.

¹⁴ Cha sahlao zydua cha chanôzy nata Zisu nô Mâri nata Zisu unawhzy chhaota, palôh a raohpa ta, phahnai khoh ngaitapa ta thlahchhâ tyh ei ta.

¹⁵ Cha nohzy liata, Pity cha unawhzy hry liata a kaw duah ta, ama zydua ta 120 rachhôh ama châ.

¹⁶ Pity ta, “Unawh saih u, Thlahpa Pathaihpa ta Dâvi pakah ta Zisu patutuhpazy lâpi a chhotuhpa Zudâh kyh a vaw rei chhieliepa Biehrai bie kha, a vaw tlô awpa rai a châ.

¹⁷ Ano cha eima hry liata rei pâpa châ ta, he chakaona liata tovyuh chhao piepa a châ.

¹⁸ Cha chyhsa chata a moleina lymâ a daopa hmâpa ta râh chalei ta, cha liata â khu lâta pao ta, a py kaichheih ta, a rih zydua pua khai ha ta.

¹⁹ Cha kyh cha Zerusale mo zydua ta vaw pahno ei ta, cha râh cha âmo reih ta Akeldamâ tah ei ta, ‘Thisaih Râh’ tahna a châ.

²⁰ Hlazy Châbu liata chhao, “‘A pahrâna roryhrapa ta y sala, A chhôh liata a pahrâpa y leipa ei sala, Hyutuhpa a châna cha mohropa ta to mawh sy,’ tahpa ta ropa a châ.

²¹ Chavâta Abeipa Zisu eima hry liata a ngia tyh, pua tyh tahpa ta a y chhôh zydua ta eima hry liata a y hrapa,

²² Zawhâna ta bâti a pachâsana daihti tawhta Abeipa Zisu vârâh lâ a chhipa ta a y noh taihta eima hry liata a y lymâpa, chazy hry liata chyhsa pakha cha, a thyuheihna miah pahnokheituhpa châta a y awpa a châ,” tah ta.

²³ Chyhsa pano, Bâsabâ ama tahpa Zawsi, a moh hropa ta Zustâ ama tahpa nata Mâthia chaluah ei ta.

²⁴ Thlahchhâ ei ta, “Hy Abeipa, nâ cha chyhsa zydua palôh pahnotuhpa na châ. He panozy liana heta, ahy he ma nâ tlyhpa a châ tahpa miah pahnosa mah y.

²⁵ Ano cha Zudâh ta tleisaipa ta ano khopa lâ a siesai hapa, he chakaona rai nata lyuhchâpa su a thla awpa a châ,” tah ei ta.

²⁶ Chatawhcha nuby a dao ei ta, nuby cha Mâthia chô liata tlu ta. Chatanachata ano cha lyuhchâpa pahrawh hleikhazy hry liata pahlaopa a châ.