HLAZY 99 - Mara Bible RV (BSI)

Zehôvâh Khazohpa pathaihna

¹ Abeipa ta ryureih ta, Phopizy a chalyu mawh ei sy! Cherubizy chô liata a tyuhpa Bei châ ta, Alei he a sih mawh sy!

² Abeipa cha Zaio liata rônahpa châ ta, Phopi zydua chô lâta cheihchalopa a châ.

³ Na moh rônahpa nata zachhihpa cha reithai mawh ei sy! Abeipa cha a pathaih na!

⁴ Hy Bei thatlôpa, adona pasô chi ta, Thlua hlei hnei leina ryureina na padua haw; Adona ta ryureih chi ta, Siana ta Zakaw chô liata ryu na reih.

⁵ Abeipa eima Khazohpa cha pachônôsa u la, A phei thaby liata a bôh teh u! Abeipa cha a pathaih na!

⁶ A theihthaipa hry liata Mawsi nata Arawna a hlao ei ta, Samuela chhao a moh a padopazy hry liata â hlao. Abeipa pado ei ta, Ano ta â chhy ei.

⁷ Meih tôh liata ama hnohta bie reih ta, A ryhpa biezy zyh ei ta, Bieraopa a piepazy ama zyh.

⁸ Hy Abeipa eima Khazohpa, Ama paraona vâta na hrie tyhpa chhao ei ta, Âmo cha a chhy heih tyh chi ta, Âmo a ngiahthaituhpa Khazohpa na châ.

⁹ Abeipa eima Khazohpa cha pachônôsa u la, A tlâh pathaihpa liata a chhy teh u; Abeipa eima Khazohpa cha pathaihpa a châ.