HLAZY 95 - Mara Bible RV (BSI)

Reithaina nata achhyna hla

¹ A vy u la, Abeipa lâ hla sa ei sih la, Eima pachhana lôpanô lâ thaphapa ta awh ei suh u!

² Alyna bie reipa ta a hmiakô lâ vawh ei sih la, Reithaina hla sapa ta thaphapa ta ano lâ ao papua ei suh u!

³ Abeipa cha Khazohpa rônahpa châ ta, Khazoh zydua chô lâta Bei rônahpa a châ.

⁴ A ku liata alei athupazy y ta, Tlâhpi lakizy ano eih a châ.

⁵ Ano taopa a châpa vâta, Tilaipi chhao ano eih châ ta; Alei hipa chhao, A ku ta a taopa a châ.

⁶ A vy u la, a chhypa ta a bôh sih la, Abeipa miah Taotuhpa hmiakô liata pakhu paneih ei suh u!

⁷ Ano cha eima Khazohpa châ ta, A sibiepa su liata a chyhsazy châ pi ta, A ku liata mietakuzy eima châ. Tanoh a ao nama thei khiahta cha,

⁸ Meribâ liata ama taopa hawhna khata, Nama palôh kuh pachha leipa u la, Kha noh ta Mâsâ râhchawhpa liata ama taopa hawhna khata, Tao hra khuh vy.

⁹ Ei hmotaopa ama hmôpa chhao ta, Châ pathlatuhpazy khata na pasia ei ta, Eina mohpathli ei.

¹⁰ Kha chhâ kha kô sypalih chhôh zydua ai kaw ei na ta, “Ama palôh sie chhei hapa phopi châ ei ta, Ei lâpizy a pahno leipa ama châ,” tah na ta.

¹¹ Chavâta pathi iapa ta bie a taih na ta, “Ei pahâna liata a ngia aw veih ei,” Ei vaw tah hapazy ama châ.