HLAZY 94 - Mara Bible RV (BSI)

A phopi a heihsai leipa Abeipa

¹ Hy Abeipa, phuh latuh Khazohpa, Hy phuh latuh Khazohpa y, Khaih lymâ mah y!

² Hy khizaw pachiatuhpa y, thyu la, Apalaipazy amâ phuhpa hawhta viarithô mah y!

³ Hy Abeipa, khachâ ma a châ aw, Hmoparaopazy khati taih ma amâ ly aw?

⁴ Akhotlâh kawpa ta bie reih ei ta, Hmoparaopazy amâ palai ngaita.

⁵ Hy Abeipa, na phopi chanaoh ei ta, Na ryuto ama tlybai.

⁶ Nôhmei nata khichhai zy thie ei ta, Paw hnei leipazy ama nyh.

⁷ “Abeipa ta hmô leipa ta, Zakaw Khazohpa ta pahno vei,” ama tah.

⁸ Hy phopi nomaoh chaipa, na novâh bâ mawh sy! Hy ahrupazy saih u, khatita ma nama so aw?

⁹ Nakhaoh a bôtuhpa ta thei aw vei ma? Mo a taotuhpa ta hmô aw vei ma?

¹⁰ Râhzy a chhoreituhpa ta hrie aw vei ma? Chyhsa a pachutuhpa ta pahnona â phahla aw ma?

¹¹ Abeipa ta chyhsapa pachânazy pahno ta, Hraoleipa dei ama châ tahpa a pahno.

¹² Hy Abeipa, na chhoreipa chyhsa cha nohlao ta, Na ryhpa na pachupa chyhsa chhao a nohlao na.

¹³ Moleipa châta khaohtlô chaopa a châ hlâlei cha, Nôpona nohzy tawhta apahâna eina pie.

¹⁴ Abeipa ta a phopi siesai leipa aw ta, A ryuto cha thy aw vei.

¹⁵ Mosiapa hnohta adona vaw kua heih aw ta, Palôh dopa zydua ta ama zi aw.

¹⁶ Ahy ma moleipa cha nâ thyuhnaopa aw? Ahy ma hmoparaopazy a dyuhpa ta ei châta a duah aw?

¹⁷ Abeipa ta na bao vei mawh sala, Ei hro he râh sidiapa liata a pahrâ ha bâ aw.

¹⁸ Ei phei a hluah ha khiah ma ei tah nota, Hy Abeipa, na kyhpachâna tleih beih leipa ta eina pathyu heih tyh.

¹⁹ Palôh tymâna hluhpi ei hnei nota, Na thlapalôhna ta ei hro tha a patlô heih tyh.

²⁰ Ryureihtuh moleipazy ta ama cha hrialâh thei aw ma? Hmo doleipa bieraopa ta a taopazy ta ama cha hrialâh thei aw ma?

²¹ Mosiapa hrona pahlei a chhuahpa ta a paraoh ei ta, Moleina a hnei leipa thisaih cha thailei ama pachâsa tyh.

²² Châhrasala Abeipa cha ei thokhy châ ta, Ei Khazohpa cha ei chhaina lôpanô a châ.

²³ Ama paraonazy viarithô aw ta, Ama moleinazy vâta âmo cha a pamua khai aw; A châ na, Abeipa eima Khazohpa ta a pamua khai ha aw ei.