HLAZY 92 - Mara Bible RV (BSI)

Abeipa phana reithaina

Pahânoh châta reithaina hla

¹ Abeipa lâta alyna bie reipa cha pha ta, Hy Chônôchaipa, na moh reithaipa ta sapa cha a pha na.

² My ta na kyhpachâna tleih beih leipa phuah na ta, Zâ ta na ngâchhihna ei phuah tyh.

³ Totâ ri hrawhpa ta cha reithai na ta, Tlaipih nata ao ngiapa ta ei cha reithai tyh.

⁴ Hy Abeipa, na raihria vâta ei thapha ta, Na ku raihriazy vâta alyna hla ei sa.

⁵ Hy Abeipa, na hmotaopazy cha rônah ta, Na pachânazy â thu kaw dia!

⁶ Ahrupa ta pahno thai leipa ta, Angâpa ta he kyh he a novâh vei:

⁷ Moleipazy cha sibiepa hawhta pyuhpa ta, Hmoparaopazy a sosâh kaw hra ei sala, Chhâzaw ta pahleipadia awpa ama châ.

⁸ Nâ deikua cha, Hy Abeipa, Tlyzaw ta cheihchalopa na châ.

⁹ Hy Abeipa, na chariahpazy moh tua, Na chariahpazy cha leidia aw ei ta, Hmoparaopa zydua papaipa ama châ aw.

¹⁰ Keima ki deikua cha, Chaoliah tôhpa ki hawhta cheihchalo chi ta, Sathaw thiehpa eina thu chi.

¹¹ Ei chariahpazy paopa ei mo ta hmô ta, Nâ thyuhnaopa moleipazy paopa chhao, Ei nah ta a thei haw.

¹² Mosiapa cha thiahrâ kô hawhta locho aw ta, Lebanaw sidy tho hawhta a laiseih aw.

¹³ Âmo cha Abeipa o liata lopazy châ ei ta, Eima Khazohpa o dôhpachhôh tlyhmia liata lochopa ta ama y.

¹⁴ Ama machâ tawh chhao ta khâ pathei ei ta, Ti ta bie ei ta khâ ama hroh sili.

¹⁵ Cha chata Abeipa adona phuah ta, Ano cha ei lôpanô châ ta, Ano liata sialeina rai y vei.