HLAZY 9 - Mara Bible RV (BSI)

Khazoh hmotao noâhpazy

Hla chhituhpa châta: Mulâbe ao ta sa awpa. Dâvi Hla

¹ Hy Abeipa, ei pathipalôh tlokhuh ta cha reithai aw na ta, Na hmotao noâhpa zydua ei phuah aw.

² Nâma liata thaphapa ta a ly aw na ta, Hy Chônôchaipa, na moh reithaina hla ei sa aw.

³ Ei chariahpazy ama kua nahta, Na mohmô liata a chapia ei ta ama leidia tyh.

⁴ Ei dona nata ei bie nâ duakheipa ta, Beidyuchhai liata a tyuh chi ta, Pachiana dopa ta na pachia tyh.

⁵ Phopizy ra chi ta, Hmoparaopazy pahleipadiapa ta, Ama moh chhâzaw nata tlyzaw ta na phie ha ei.

⁶ Chariahpa cha a mua ta, Tlyzaw ta a rao haw; Ama khihpizy phia chi ta, Âmo atheithlâhna a lei khai haw.

⁷ Abeipa deikua cha tlyzaw ta ryureih ta, A beidyuchhai cha ryureina dopa châta a padua;

⁸ Siana ta khizaw chô liata ryureih ta, Adona ta phopizy a pachia ei.

⁹ Abeipa cha tlybaipazy châta thokhy châ ta, Nôpona noh liata thokhy a châ.

¹⁰ Na moh a pahnopazy ta châ ngâchhâ ei ta, Hy Abeipa, nâ cha châ tluatuhpazy a heihsai beih va chi.

¹¹ Zaio beidyuchhai liata a tyuhpa, Abeipa lâ reithaina hla sa u la; Phopizy hnohta a hmotaopazy chho teh u!

¹² Ano cha thisaih phuh a lapa châ ta, Âmo a thei thlâh ha ta; Pasataopazy awna ao my beih vei.

¹³ Hy Abeipa, na ngiachhie la, Thina chhikao tawhta nâ chalotuhpa y, Nâ haotuhpazy vâta pasa ei taona he hmô mah y.

¹⁴ Chatanachata nâma reithaina phuah aw na ta, Zaio sawchanô chhikaozy liata, Na pachhana ei ly aw.

¹⁵ Phopizy âmo khaohtlô chaopa liata tla ei ta, Â nyupa ta sao ama paraipa liata Ama phei â ao tyh.

¹⁶ Abeipa cha anosasyh ta a pahnosa ta, Adona ta ryu a reihpa a châ; Moleipazy deikua cha, Âmo khoheih chôpa liata amâ ao tyh. Hikaiô. Selah

¹⁷ Moleipa cha Athihkhih lâ kua aw ta, Khazohpa a mypa phopi zydua chhao Athihkhih lâ ama kua hra aw.

¹⁸ Phahlapazy cha my ngâ thlâh hapa châ lei paw ei ta, Dyhchhiepazy hnabeiseihna chhao chhâzaw ta lei aw vei.

¹⁹ Hy Abeipa, thyu la, Chyhsapa ta tiah khah ei sy; Phopizy na hmiakô liata pachiapa châ mawh ei sy!

²⁰ Hy Abeipa, âmo cha pachisa la, Chyhsapa dei ama châpa phopizy ta pahno mawh ei sy! Selah