HLAZY 88 - Mara Bible RV (BSI)

Thina tawhta abohna châta thlahchhâna

Kôrâ Sawchapawzy Hla. Hla chhituhpa châta: “Mâhalâ Lianô” ao ta sa awpa. Ezrâ pathla Hemâ Maskili

¹ Hy Abeipa, ei pachhana Khazohpa y, Na hmiakô liata chhô nah zâ ta ei awh hih.

² Ei thlahchhâna na kô vaw tlô sala, Ei awhna lâ na nah vaw pachôh mah y!

³ Ei hro he nôpona ta bie ta, Ei hrona chhao Athihkhih â hnia ha bâ.

⁴ Khaohtlô lâ a zu awpazy hry liata rei pâpa châ na ta, Tha a hnei khao leipa chyhsa ei châ.

⁵ Athihpazy hry liata pathliepa hawhta châ na ta, Ama thiepa thlâ liata a ziapa hawhta ei châ; Na ku tawhta chhawh pathlah hapa ama châpa vâta, Nâ thei khao leipazy hawhta ei châ.

⁶ Khaohtlô athupa liata na pathla chi ta, Su zohpa nata athupa liata eina soh chi.

⁷ Na pathiiana ta thata na vi ta, Na tichatlaopa ta eina vao. Selah

⁸ Ei viasa phapazy ta ama pathlua awpa ta na tao chi ta, Âmo châta pasichhihpa ta eina tao ha chi. Khawhlôhpa ta y na ta, Pua thei va na.

⁹ Pachâchhiena vâta ei mo zoh khai ha ta, Hy Abeipa, noh chareih ta cha pado na ta, Nâ lâta ei kuzy ei vaw pazawh.

¹⁰ Athihpazy châta hmonoâhpazy na tao tyh ma? Athihpazy thyu ei ta ama cha reithai tyh ma? Selah

¹¹ Na kyhpachâna tleih leipa thlâ liata phuah ei ta, Na ngâchhihna Chhokhih liata ama phuah tyh ma?

¹² Na hmonoâhpazy zohna su liata ama pahno ma? Na siana cha myna râh liata ama pahno ma?

¹³ Hy Abeipa, kei deikua cha, cha awsao na ta, Mydi ta ei thlahchhâna na hmiakô liata a vaw tlô tyh.

¹⁴ Hy Abeipa, khazia ei hro he na dytha? Khazia na hmia eina nyusai chi?

¹⁵ Ei hawti no tawhta pasataopa ta, Thi daihmâpa ta y tyh na ta; Nâma chipa ta thlazohpa ta y na ta, Ngiarohpa ta ei y tyh.

¹⁶ Na pathiiana ta na vao ta, Na thyuhnaona rarôh ypa ta eina pahleipadia haw.

¹⁷ Noh y ta tisaih hawhta na chadô ei ta, Su to tawhta eina dôh ei.

¹⁸ Ei kyhpachâpa nata ei viasa ta pathlua awpa ta na tao chi ta, Zohna deita ei hmiapahnopa a châ bâ.