HLAZY 85 - Mara Bible RV (BSI)

Ahrana châta thlahchhâna

Hla chhituhpa châta: Kôrâ Sawchapawzy Hla

¹ Hy Abeipa, na râh khokhei chi ta, Zakaw cha vânoh na patosa heih.

² Na phopi paraona a ngiahthai chi ta, Ama moleina zydua na khu khai. Selah

³ Na pathiiana zydua pachhâsa chi ta, Na hiehâhna ru ngaitapa nâ heihsai haw.

⁴ Hy eima pachhana Khazohpa, Miah paduapathi heih la, Eima chô liata na ruchhôna papai mah y!

⁵ Chhâzaw ta ma eima chô liata na hie a hâh aw? Chhâ zydua taihta ma na hie a hâh ngâ thlâh ha aw?

⁶ Na phopi he nâma liata â ly thei nawpa ta, Miah pahra heih aw va chi ma?

⁷ Hy Abeipa, na ngâchhihna miah pahmôsa la, Na pachhana miah pie mah y.

⁸ Zehôvâh Khazohpa ta bie a rei awpa cha ei nathlie aw; A phopi hnohta thlalôhna bie reih aw ta, A mopathaihpazy hnohta a reih aw; Âmo deikua cha hruna lâ a heih khao khah ei sy.

⁹ Eima râh liata rônahna a pahrâ thei nawpa ta, A pachhana ta ano a chituhpazy â vaw hnia.

¹⁰ Ngâchhihna nata biehmeiseihpa a tyh ei ta, Siana nata thlalôhna ta amâ pahnâ.

¹¹ Biehmeiseihpa alei tawhta kaw pyuh ta, Siana ta avâ tawhta a za sai tyh.

¹² Abeipa ta hmo phapa pie aw ta, Eima râh liata kôvei a pha aw.

¹³ Abeipa hmia lâta siana sie aw ta, A hniezy cha lâpi ta a tao aw.