HLAZY 81 - Mara Bible RV (BSI)

Izarei kuhchhana vâta chaphôhtuna

Hla chhituhpa châta: Kiti ao ta sa awpa. Asâpha Hla

¹ Eima thatlôna Khazohpa lâ ao paropa ta hla sa u la, Zakaw Khazohpa lâ a lypa ta awh teh u!

² Reithaina hla sapa ta khoh tô u la, Totâ nata tlaipih pyu ngiapazy tô teh u.

³ Thla thiehpa liata chiahmie tô u la, Thlâpâ pôlô no nata eima kyhchhi noh liata chhao tô teh u.

⁴ Cha cha Izarei châta bieraopa châ ta, Zakaw Khazohpa biepiepa a châ.

⁵ Zawsi châta bieraopa ta tao ta, Izi râh lâ a sie nota a bieraopa châ ta, Reih thei leipazy hry liata a y nota a bieraopa a châ.

⁶ Abeipa ta hetana heta a tah: “Na ngiatlâh tawhta phaohri cha pachhôpa na ta, Na kuzy hrâbyh tawhta ei pahua.

⁷ Nôpopa ta na aw chi ta, Ei cha pachha; Tôkalôhpa su nyupa liata châ chhy na ta, Meribâ tizy liata ei cha pasia. Selah

⁸ Hy ei phopi, nathlie teh, Biesakâ ei cha vaw hih! Hy Izarei, ei bie vaw nathlie ha mawh la cha,

⁹ Nâma liata khazoh hropa y leipa aw ta, Chihropa khazoh hmia liata nâ bôh lei awpa tlai!

¹⁰ Kei he Abeipa na Khazohpa châ na ta, Izi râh tawhta châ kaw chhi papuatuhpa kha ei châ. Na pakah a kawhpa ta â la, Ei pabie aw.

¹¹ “Châhrasala ei phopi ta ei ao nathlie leipa ta, Izarei ta nâ ngiarih khoh vei.

¹² Chavâta ama palôh kuhchha awpa ta pasaih na ta, Âmo ryhraona liata sie awpa ei pasai ha ei.

¹³ Aw, ei phopi ta ei bie nathliepa ta, Izarei ta ei lâpizy a vaw chhih ha mawh sala cha,

¹⁴ Ama chariahpazy thlai panawh aw ei na ta, Ama khakhaipazy chô liata ei ku ei hy ha awpa tlai!

¹⁵ Abeipa a haotuhpazy ta ano ry a vaw daoh aw ei ta, Châhrasala ama tovyuh awpa cha chhâzaw hriena a châ aw.

¹⁶ Nâ deikua cha sâh pahâh chaipa ta cha pasa aw na ta, Lôpanô tawhta kheihti ta lôhrâ ei cha patlô aw.”