HLAZY 80 - Mara Bible RV (BSI)

Paduapathina châta thlahchhâna

Hla chhituhpa châta: Lilipaw ao ta sa awpa. Asâpha Hla

¹ Hy Izarei vaituhpa, Na nah vaw pachôh la; Mietaku zaw hawhta Zawsi a chhihthatuhpa y, Na nah vaw pachôh mah y! Cherubizy chô liata bei ta patyupa y, Vaw khaih mah y!

² Epharai nata Benzami nata Manase hmiakô liata, Na thatlôna pathyu la, Miah pachha awpa ta a vy mah y!

³ Hy Khazohpa, miah paduapathi heih la, Pachhapa ta eima y thei nawpa ta, Na hmia vaw pakhaihsa mah y!

⁴ Hy Zehôvâh Khazohpa Atotaotheipa, Khachâ ma na phopi thlahchhânazy vâta, Na hie a hâh aw tly?

⁵ Âmo cha mothlih viahchhâ ta pasa chi ta, Mothlih nyu biepa na padosa ei.

⁶ Eima chheipâh râhzy ta amâ chhu awpa ta miah tao chi ta, Eima chariahpazy ta miah ama pahneisao hih.

⁷ Hy Khazohpa Atotaotheipa, Miah paduapathi heih la; Pachhapa ta eima y thei nawpa ta, Na hmia vaw pakhaihsa mah y!

⁸ Izi tawhta kre zôh vaw phaoh chi ta, Phopizy papuapa ta, Ama râh liata na kre zôh na loh.

⁹ Chhaohlei pathaipa chi ta, Â thupi taih a thari thla ta, Lyurâh a bie khai haw.

¹⁰ A nohdi ta tlâhpizy khu ta, A chiahzy ta sidy kô laipazy a pahli.

¹¹ Tilaipi lâta a chiahzy pazawh laih ta, Chavah taihta a chhyh a paka laih.

¹² Khazia ma a diahpaizy na parao ha tly? A chapiapa maihta a theizy ama lyu bâ he zaw!

¹³ Râhmâhpa liata ngiahraih ta a theizy hrao ta, Râhsa zydua ta ama nie.

¹⁴ Hy Khazohpa Atotaotheipa, Vaw kua heih mah y! Avâ tawhta za sai la, Kre zôh he za moh la, Saihei mah y.

¹⁵ Na ku chachâh lâta na lopa kre zôh he vaih la, Nâma châta na palaiseihpa chiah he mohôh mah y.

¹⁶ Na kre zôh mei ta raopa ta thlu ei ta, Na rana vâta na phopi a leidia ha hih.

¹⁷ Na ku chachâh ta na hmâpa chyhsa chô liata na ku pahnieh la, Nâma châta na mohôhpa chyhsa sawchapawpa chô liata na ku pahnieh mah y!

¹⁸ Cha kuasai khao aw ma pi; Eima hrona he pahlôh la, Na moh eima pado aw!

¹⁹ Hy Zehôvâh Khazohpa Atotaotheipa, Miah paduapathi heih mah y! Pachhapa ta eima y thei nawpa ta, Na hmia vaw pakhaihsa mah y!