HLAZY 79 - Mara Bible RV (BSI)

Phopi abohna châta thlahchhâna

Asâpha Hla

¹ Hy Khazohpa, phopi hropazy ta na ryuto râh lâ a vaw ngia ei ta, Nâma Achhyna o pathaihpa papuapaleipa ta, Zerusale khihpi ama parao haw.

² Châ chakaotuhpazy ri cha, Avâ pavawzy nie awpa ta pie ei ta; Na chyhsa ngâchhihpazy sapa chhao, Alei liata sahrâhpazy nie awpa ta ama pie.

³ Zerusale khihpi zydua liata, Ti hawhta ama thisaih patlai ei ta, Âmo a pabu awpa chhao y veih ei.

⁴ Eima chheipâh râhzy pasipasawh awpa lâta pua ha pi ta, Eima kiapâh liata a ypazy ta miah pahneisao ei ta, Miah ama reipachhie.

⁵ Hy Abeipa, khati taih ma a châ aw tly? Chhâzaw ta ma na hie a hâh thlâh ha aw? Na hiatliana cha mei hawhta ma a kâ aw?

⁶ Châ pahno leipa râhzy chô liata na hiehâhna lei thlu la, Na moh a pado leipa abeinarâhzy chô liata chhao lei thlu mah y!

⁷ Zakaw palâ ha ei ta, A pahrâna roryhrapa ta ama tao haw.

⁸ Miah pathlatuhpazy moleina vâta miah hrie leipa la, Na zawngiahna ta miah a tyh patoh mawh sy, Thata panawhpa ta eima y ha hih.

⁹ Hy eima pachhana Khazohpa y, Na moh rônahna châta miah bao mah y; Na moh vâta miah pachha la, Eima moleinazy miah chatlaipa mah y!

¹⁰ Khazia ma phopizy ta, “Ama Khazohpa cha khataih liata a y?” ama tah aw? Châ chakaotuhpazy thisaih phuh miah lapa la, Eima hmiakô lia tlai ta, Phopizy hry liata pahnopa ta y mawh sy!

¹¹ Atâhpazy ahrôna na hmiakô liata vaw tlô sala, Na hmotaotheina rônahzie lymâ hawhta, Thi awpa ta raopazy cha pahlôh mah y!

¹² Hy Abeipa, eima chheipâh râhzy ta ama cha pasipasawhnazy kha, A lie sari ta ama chô liata viari thô mah y!

¹³ Keimo na phopi, na sibiepa su liata mietakuzy deikua ta cha, Chhâzaw ta alyna bie cha hlâ aw pi ta; Chhâ zydua ta na reithaina hla eima chanei lymâ aw.