HLAZY 78 - Mara Bible RV (BSI)

Chhâ vaw y awpazy hnohta chho pachhuah awpa

Asâpha Maskili

¹ Hy ei phopi, ei pachuna nathlie la, Ei pakah biezy lâta na nah pachôh mah y!

² Pakhona bie hmâpa ta ei pakah â aw na ta, Hlâno tawhta bienyupazy ei reih aw.

³ Miah pathlatuhpazy ta miah chho ei ta, Thei pi ta eima pahnopa biezy ei reih aw.

⁴ Ama pathlazy phih leipa aw pi ta, Chhâ a vaw y awpa hnohta tlao eima chho aw; Abeipa hmotao rônahpa nata a thatlônazy chho aw pi ta, Hmonoâhpa a taopazy eima chho aw.

⁵ Zakaw châta bieraopa padua ta, Izarei châta ryhpa a tao; Ama pathlazy pachu awpa ta, Miah pathlatuhpazy hnohta bie a pie ei.

⁶ Chatanachata chhâ a vaw y awpazy ta pahno aw ei ta, Hawti a pih mâh leipazy chhao ta vaw pahno aw ei ta, Thyu aw ei ta ama pathlazy ama chho pachhuah lymâ aw.

⁷ Ama hnabeiseihna Khazohpa liata pahnieh aw ei ta, Khazohpa hmotaopazy my leipa ta, A biepiepazy ama zyh lymâ aw.

⁸ Âmo pathlatuhpazy hawhta, Chhorupa nata dyuhtuhpa châ leipa aw ei ta, Palôh a i leipa chhâ lyu leipa aw ei ta, Khazohpa châta thlahpa ngâchhih leipa hawhpazy châ aw veih ei.

⁹ Epharai mo cha libaw a chaba ei ta, Châhrasala adyuhna noh liata hnôh amâ sy haw.

¹⁰ Khazohpa biehrai zyh leipa ei ta, A ryhpa lâpi a chhih veih ei.

¹¹ A hmotaopazy my ei ta, Hmonoâhpa a pahmôsapazy chhao ama my haw.

¹² Ama pathlatuhpazy mohmô ta hmonoâhpazy tao ta, Izi râh Zônâ lyuzy liata hmonoâhpazy a taopa ei.

¹³ Tilaipi pachhaihpa ta âmo cha pasiesa ta, Tizy toh ta a chalihsa.

¹⁴ Nohchhô ta meihdo ta âmo chhihtha ta, Zâ ta mei khaihpa ta a chhihtha ei.

¹⁵ Râhchawhpa liata lôpanôzy patlaw ta, Tilih athupa ti hawhta, Doh awpa hluhpi a pie ei.

¹⁶ Lôpanô tawhta vahtiezy papua ta, Vahpi tizy hawhta a palosa.

¹⁷ Chatanachôta a chô liata molei via rili ei ta, Chônôchaipa cha râhchawhpa liata amâ dyuh.

¹⁸ Ama palôh ta Khazohpa pasia ei ta, Ama aohkhopa pati amâ hnaw.

¹⁹ Khazohpa reipachhie ei ta, “Khazohpa ta râhchawhpa liana heta, Tlâhkhai â chhuahdy thei tlai aw ma?

²⁰ Lôpanô tu ta tizy vaw puapa ta, Vahtiepazy kao a khô pathlah. Viahchhâ chhao miah piepa ta, A phopi nie awpa sa miah a pie thei tlai aw ma?” ama tah.

²¹ Chavâta, cha biezy cha Abeipa ta a thei nahta, A pathi ia ngaita ta; Zakaw cha mei ta vaw pua thlu ta, Abeipa hiehâhna ta Izarei cha a thyuhnao.

²² Khazohpa a ngiapâ leipa ei ta, A pachhana ama ngâ leipa vâta, Cha hmo cha ama chô liata a tlôpa a châ.

²³ Chatahrasala chô lâ avâzy khi biepiepa ta, Vârâh ochhizy pahy ta;

²⁴ Ama nie awpa mânâ ama chô liata za pasuasa ta, Vârâh sâh a pie ei.

²⁵ Vâlyuhchâpazy viahchhâ cha chyhsazy ta nie ei ta, Khazohpa ta nie awpa hluhpi a za pathlapa ei.

²⁶ Avâzy liata nochhi thlih pathlisa ta, A hmotaotheina ta chho thlih a pathlisa.

²⁷ Dohlei hawhta ama chô liata sa pasuasa ta, Tilaipa sadi hawhta mathlaw hneipa pavawzy a pasuasa.

²⁸ Ama riehmo liah liata patlasa ta, Ama pahrâna zydua liata a patlasa.

²⁹ Ama aohkhopa a piepa vâ ei ta, Nie ei ta rihbiepa ta ama y.

³⁰ Châhrasala ama aoh lôhrâ tlô hlâta, Ama pakahzy liata pati a y thlâh chy nota,

³¹ Khazohpa hiehâhna ama chô liata vaw tlô ta, Ama chyhsa thatlô chaipazy thie ta, Izarei satliazy a tusao ha ei.

³² Cha zydua cha amâ tyhpa chhao ta, Molei ngâ thlâh chy ei ta; Hmonoâhpazy a taopa chhao ta, Zo hlei veih ei.

³³ Chavâta ama nohzy cha, Hu ei kha sopa hawhta a lei awpa ta tao ta; Ama kôzy chhao, China ta kô châh a padisa ei.

³⁴ A thie nah ei ta ano cha pado ei ta, Ropa ta Khazohpa ama tlua heih tyh.

³⁵ Khazohpa cha ama lôpanô a châ tahpa a thei ei ta, Chônôchai Khazohpa cha, Âmo chatlaituhpa a châ tahpa amâ thei heih tyh.

³⁶ Châhrasala ama pakah ta papyupahly pakhei ei ta, Ama paleih ta haipa bie ama rei thlu tyh.

³⁷ Ano liata ama palôh a i leipa ta, A biehrai liata ngâ a chhih veih ei.

³⁸ Chatahrasala ano cha thapasana ta a biepa a châpa vâta, Ama paraona cha a ngiahthai ta, Âmo cha pahleipadia vei. A hiehâhna ei hluhpi padia ta, A pathiiana zydua pathyu khoh vei.

³⁹ Chyhsapa deita ama châ tahpa a thei thlâh ha ta, Thlih khô ta a vaw kua khao leipa hawhta ama châpa â thei thlâh haw.

⁴⁰ Râhchawhpa liata ei hluhpi chakhia ei ta, Râraohpa liata ei hluhpi a pachâ ama parôh.

⁴¹ Khazohpa pasia chanei ngâ thlâh ha ei ta, Izarei Mo Pathaihpa ru ama pachhô chanei heih tyh.

⁴² A hmotaotheina a thei khao leipa ei ta, Khakhaipa tawhta âmo a pachha noh a thei khao veih ei.

⁴³ Izi liata ngiana a taopazy a thei khao leipa ei ta, Zônâ lyuzy liata a hmonoâh taopazy a thei khao hra veih ei.

⁴⁴ Ama vahpi tizy thisaih lâta palie ta, Chavâta ama vahtie tizy doh thei khao veih ei.

⁴⁵ Ama hry liata mathyupa hri hluhpi tuah ta, Chazy chata âmo cha nie khai ei ta; Cha-uzy chhao tuah ta, Chazy chata âmo cha a pahleipadia khai ha ei.

⁴⁶ Ama chicheipazy chângyu pie ta, Ama hriapasana thei khawsu a pie haw.

⁴⁷ Ama kre zôhzy cha pareih hmâpa ta parao ta, Ama theiku kôzy chhao dâhaw hmâpa ta a parao haw.

⁴⁸ Ama viahchaozy pareih lâ hlâ ta, Ama mietakuzy pachie lâ a hlâ haw.

⁴⁹ A hiehâhna ru ngaitapa ama chô liata pathla thlu ta, Vâlyuhchâpa sahlaozy ta, Pathiiana, ruchhôna nata nôpona zy ama vaw tlôkhei.

⁵⁰ A hiehâhna châta lâpi taopa ta, Thina tawhta ama thlahpa pahlôh leipa ta, Potlana lâta ama hrona a hlâ ha ei.

⁵¹ Izi râh liata sawchapaw uhtheipa zydua thie ta, Hamâ poh ozy liata ama thatlôna thei hmiatuapazy a thie ha ei.

⁵² A phopi deikua cha mietaku hawhta puakhei ta, Mietaku zaw hawhta râhchawhpa liata a chhihtha ei.

⁵³ Â bohpa ta âmo cha chhihtha ta, Khâpa hmah chi veih ei; Ama chariahpazy deikua cha, Tilaipi ta a vao khai ha ei.

⁵⁴ Âmo cha a râh pathaihpa lâ a chhi ta, A ku chachâh lâta a pahniepa tlâhpi lâ â chhi ei.

⁵⁵ Ama hmiakô liata phopizy papua ta, Ama râhzy cha Izarei chizy ryuto châta pachhaih ta, Izarei chizy cha phopizy poh ozy liata a pahrâsa ei.

⁵⁶ Chatanachôta Chônôchai Khazohpa cha pasiapa ta chakhia ei ta, A bieraopazy zyh veih ei.

⁵⁷ Kua ei ta âmo pathlatuhpazy hawhta, Piehpie ngaitapa ta hmotao ei ta; Libaw doleipa hawhta, A pahnieh tlâh châ veih ei.

⁵⁸ Ama su sâhpazy vâta a hie pahâh ei ta, Ama khazoh nothlahpazy vâta hiatliapa ta ama paysa.

⁵⁹ Cha kyh cha Khazohpa ta a thei nahta, A hiehâh ngaita ta; Izarei cha a dytha pathlah haw.

⁶⁰ Silô liata a byureih siesai ta, Chyhsapa hry liata a pahrâna poh o a siesai haw.

⁶¹ A thatlôna cha sei châ awpa ta hlâ ta, A rônahna chhao a khakhaipa ku liata a hlâ haw.

⁶² A phopi cha zaozi liata hlâ ta, A ryuto chô liata a hiehâhna a papua thlu.

⁶³ Mei ta ama satliazy kâ khai ha ta, Ama laihsazy ahneina hla sa thei khao veih ei.

⁶⁴ Ama theihthaipazy zaozi ta pao ei ta, Ama nôhmeizy chaphôhtu khao veih ei.

⁶⁵ Abeipa cha â môpa tawhta a kaw hra ta, Chyhsa thatlôpa ta kresawhti vâta a awhpa hawhta awh ta.

⁶⁶ A khakhaipazy hnôh pasysa ta, Chhâzaw ta nozapa ta a tao ha ei.

⁶⁷ Zawsi poh o dytha ta, Epharai chi a tlyh vei.

⁶⁸ Zudâh chi tlao a tlyh ta, A kyhpachâpa Zaio Tlâh tlao â tlyh haw.

⁶⁹ A supathaihpa cha avâzy hawhta sa ta, Tlyzaw châta a paduapa alei hawhta a sa.

⁷⁰ A chakaotuhpa Dâvi cha a tlyh ta, Mietaku sadôzy tawhta a aw papua.

⁷¹ A phopi Zakaw vaih ta, A ryuto Izarei vaih awpa ta, Mietakuzy vaina tawhta a aw papua.

⁷² Chatanachata Dâvi cha palôh dopa ta Izarei sawzy vaih ta, Ku zôthaina ta âmo a chhihtha ei.