HLAZY 76 - Mara Bible RV (BSI)

Tiahtuh Khazohpa

Hla chhituhpa châta: Pyungiapa ri chhaopa ta sa awpa. Asâpha Hla

¹ Zudâh liata Khazohpa pahno ei ta, Izarei liata a moh parônahsapa ta a y.

² Salem liata a byureih y ta, Zaio liata a pahrâna su a y.

³ Cha liata châtai patliepazy thlie pachhô ta, Vyhphao, zaozi nata chariah chhaichhizy a thlie pachhô khai haw. Selah

⁴ Râhsazy ta a biepa tlâhpizy hlâta, Khaih via chi ta, na rônah via.

⁵ Riahphapazy hraopa ta y ei ta, Amâ môna liata a môsao ei ta, Pasaiphazy ama ku hmâh thei khao veih ei.

⁶ Hy Zakaw Khazohpa, na rana vâta, Arâ nata a kiahtuhpa zy pao ei ta, Nokhih pahno leipa ta ama y.

⁷ Nâ, nâma tlai cha chi awpa châ chi ta, Na pathi a ia ha khiahta cha, Ahy ma na hmiakô liata a duah thei aw?

⁸ Avâ tawhta pachiana bie phuah chi ta, Alei ta chi ta, sidiapa ta a y.

⁹ Lei liata reisipazy pachha awpa ta Khazohpa thyu ta, Pachiana dopa a phuah nota, Alei ta chi ta, sidiapa ta a y. Selah

¹⁰ Hmeiseihta ta, chyhsapa chô liata na pathiiana cha, Nâma reithaina châ aw ta; Na pathiiana tawhta a bohpazy cha, Chaisaih ta nâ saih aw ei.

¹¹ Abeipa nama Khazohpa liata biezy a taih u la, Nama bietaizy cha patlô muh vy; Chi awpa lâna chata a chheipâh râhzy ta, Hmosaipiepazy vaw cheih mawh ei sy.

¹² Ano cha ryureituhpazy thlahpa a chhawh pathlah theipa châ ta, Lei beizy ta ama chi awpa a châ.