HLAZY 7 - Mara Bible RV (BSI)

Abohna châta thlahchhâna

Dâvi ta Sikaiô ao ta a sapa hla: Benzami chyhsa Kusi biereipazy kyh liata Abeipa lâta hla a sapa

¹ Hy Abeipa ei Khazohpa, nâma ei châ chhai hih, Nâ chadaituhpa zydua tawhta na pachha mah y.

² Chataleipatala chakeibarôhneipa hawhta ei hro chaphie aw ei ta, Pachhatuhpa hnei leipa ta ama hriechheih khai pathlei aw.

³ Hy Abeipa ei Khazohpa, He hawhpa hmo he vaw tao ha aw sah la, Ei kuzy liata adoleina y sala,

⁴ Moleina ta ei viasa viarithôpa ta, A chhâpa y leipa ta ei chariahpa a hraopa ei châ khiahta cha,

⁵ Ei chariahpa ta ei hro a chadai sala, Pha ha mawh sy; Ei hrona he alei liata tlypâ sala, Ei rônahna he dohlei liata soh mawh sy. Selah

⁶ Hy Abeipa, na hiehâhpa ta thyu la, Ei chariahpazy ruchhôna thyuhnao mah y; Keima châta a hra la, Adona bie pathlu mah y.

⁷ Phopi a hmaohpakhypazy ta cha chadô ei sala, Chô lâ tawhta ama chô liata ryureih mah y.

⁸ Abeipa ta phopizy pachia ta, Hy Abeipa, ei sianazie hawhta na pachia la, Hy Chônôchaipa, ei dona hawhta na pachia mah y.

⁹ Hy Khazoh siapa, Hmoparaopazy moleina pachhâsa la, Mosiapazy padua mah y; Nâ cha pachâna nata palôhzy pasiatuhpa châ tlôh chi ta.

¹⁰ Ei vyhphao cha Khazohpa hnohta y ta, Ano cha palôh dopazy pachhatuhpa a châ.

¹¹ Khazohpa cha pachiatuh dopa châ ta, Moleina kyh vâta noh chareih ta a hie a hâhpa Khazoh a châ.

¹² Chyhsa ta a moleina a ro vei khiahta cha, Khazohpa ta a zaozi chata aw ta, A libaw a keipa ta â pachyh thlâh ha aw.

¹³ Thina chaihraizy a chhuahdy ha ta, Châtai ia theipazy a tao haw.

¹⁴ Moh teh u, moleipa ta paraona saw a zeih ta, Chhoruna saw phaoh ta, Haipa saw a sa tyh.

¹⁵ Khaohtlô chaopa ta leizaih pachha ta, Ano chaopa khaohtlô liata a tla tyh.

¹⁶ A hrochhiena ta ano luh chô liata a vaw lie thlu ta, A nôchhiena ta ano luh ru liata a tla thlu.

¹⁷ Abeipa cha a siana vâta a chô liata alyna bie reih aw na ta, Abeipa Chônôchaipa moh reithaina hla ei sa aw.