HLAZY 69 - Mara Bible RV (BSI)

Pasataona tawhta bao awpa ta thlahchhâna

Hla chhituhpa châta: Lilipaw ao ta sa awpa. Dâvi Hla

¹ Hy Khazohpa, na pachha mah y! Tizy ta ei rao taih eina vao ha hih.

² Chiatlao athupa liata a pamôh na ta, Tly nawpa rai y vei; Ti athupa tlô na ta, Tisaih ta eina vao.

³ Ei awna ta ei thachhâ ta, Ei rao chhao hi khai ha ta, Ei Khazohpa ei hâna ta ei mo a zoh khai haw.

⁴ A chhâpa y leipa ta nâ haotuhpazy cha, Ei luh liata ei sâzy hlâta hluh via ei ta, Parao awpa ta haipa ta nâ teituhpazy chhao, Ama thatlô ngaita. Khâpa hmo ma ei paru tly, Tahmâ ei thô heih awpa cha?

⁵ Hy Khazohpa, ei hruzie pahno chi ta, Ei moleinazy nâ tawhta nyupa châ vei.

⁶ Hy Pheisaihzy Abeipa Zehôvâh, Nâma châ hâtuhpazy cha, Keima vâta nozapa ta y leipa ei sala; Hy Izarei Khazohpa, Nâma châ tluatuhpazy chhao, Keima vâta hmiachhiepa ta y khah ei sy.

⁷ Nâma vâta reipachhiena tao na ta, Nohzaona ta ei hmia a khu.

⁸ Ei unawhzy liata khichhaipa hawhta châ na ta, Ei nô sawzy liata chihropa hawhta ei châ haw.

⁹ Na o châta phahnai ei ngiahna ta na nie khai ha ta, Châ reipachhietuhpazy reipachhiena ei chô liata a tla.

¹⁰ Chana nata kâhvileipa ta ei hro ei panawh châh ta, Reipachhiena tlao ei hlao.

¹¹ Ei chysia châta latho poh ei hmâ nahta, Ama reih khoh kawpa tlao ei châ ha tyh.

¹² Thokhy chhikao liata a tyuhpazy ta ei kyh reih ei ta, Sahma paripazy ta hla eina phi ei.

¹³ Kei deikua la, Hy Abeipa y, Nâ lâta thlah ei chhâ. Hy Khazohpa, na kyhpachâna tleih beih leipa vâta, Daihti rypaohpa liata nâ chhy la, Na pachhana ngâchhihna ta nâ chhy mah y.

¹⁴ Chiatlao lia tla awpa tawhta na pachha la, Ei chariahpazy tawhta na pachhapa ta, Ti athupa tawhta na pachha mah y.

¹⁵ Tisaih ta na phaoh leipa sala, Ti athupa ta na palâ hra leipa sala, Khaohtlô ta a pakah na pabieh khâh khah sy.

¹⁶ Hy Abeipa, nâma kyhpachâna cha pha tlôh ta, Nâ chhy mah y; Na zawngiahna a chhâ thai leipa vâta, Kei lâ a vaw heih mah y.

¹⁷ Châ chakaotuhpa he na hmia nyusai leipa la, Ei nôpo ngaita ta, Thlai nâ chhy mah y.

¹⁸ Nâ vaw hniapa ta ei thlahpa chatlai la, Ei chariahpazy vâta na pachha mah y!

¹⁹ Reipachhiena ei tyhpazy pahno chi ta, Ei nozana nata ei nohzaona zy na pahno; Ei khakhaipazy chhao na pahno khai.

²⁰ Reipachhienazy ta ei palôh pasasa ei ta, Pachârôhpa ta ei y. Nâ ngiachhie awpa tlua na ta, Châhrasala ahy hmah y veih ei; Thlah nâ palôh awpa tlua na ta, Châhrasala pakha hmah hmô veih ei na.

²¹ Pati vyuhpa ta châmaih na pie ei ta, Ei dâhphi nota kresawhti thaopa eina padosa ei.

²² Ama hmiakô liata ama tlâhkhai cha, Khoheih vaw châ sala; Thlalôhpa ta ama y hai nota, Âmo châta aphyh châ mawh sy.

²³ Ama hmô thei lei nawpa ta ama mozy zoh sala, Ama chaizy khâ a chalyu mawh sy.

²⁴ Na ruchhôna ama chô liata lei thlu la, Na pathiiana ta âmo cha patu mawh sy.

²⁵ Ama riehmo roryhrapa ta y sala, Ama poh ozy liata ahy hmahta pahrâ khah ei sy.

²⁶ Na tupa chyhsa chô liata taolana baichha ei ta, Hmah na paphaopazy pasana ama reih chanei tyh.

²⁷ Ama chô liata hriena baichha lymâ la, Âmo cha na siana liata pangiasa khah y.

²⁸ Ahrohpazy châbu tawhta ama moh phiepa châ sala, Mosiapazy hry liata ama moh roh khah y.

²⁹ Kei deikua cha pasataopa nata pachârôhpa ta y na ta, Hy Khazohpa, na pachhana ta chô lâ na soh mawh sy.

³⁰ Khazohpa moh cha hla ta reithai aw na ta, Alyna bie reipa ta ano cha ei palyupalih aw.

³¹ Cha chata viahchao tôhpa hlâpa hlâta, Abeipa palysa via aw ta; Ki nata chakiezy a hneipa viahchao tôhpa hlâpa hlâta, Abeipa a palysa via aw.

³² Areisipazy ta cha cha hmô aw ei ta, Amâ ly aw; Nâmo, Khazohpa a tluatuhpazy saih u, Nama palôh a hra mawh sy.

³³ Abeipa ta phahlapazy ao thei ta, A phopi atâhpazy mohnao vei.

³⁴ Avâ nata alei ta ano cha reithai sala, Tilaipizy nata a chhôh liata a pie theipa zydua ta, Ano cha reithai mawh ei sy.

³⁵ Khazohpa ta Zaio cha pachha aw ta, Zudâh khihpizy a padua aw; Cha liata a chyhsazy pahrâ aw ei ta, Râh cha ama hnei aw.

³⁶ A chakaotuhpa chipathlazy ta râh ryu to aw ei ta, A moh a pasôtuhpazy cha liata ama pahrâ aw.