HLAZY 62 - Mara Bible RV (BSI)

Khazohpa deita abohna

Hla chhituhpa châta: Zeduthu ao ta sa awpa. Dâvi Hla

¹ Ei hro he Khazohpa lia dei ta apahâna hmô ta, Ano tawhta ei pachhana a vaw tlô.

² Ano deita cha ei lôpanô nata ei pachhana châ ta, Ei thokhy châ ta, A chalyu beih aw va na.

³ Thokhy a sia haipa nata diahpai a pao haipa hawhpa chyhsa tlai he, Khati taih ma tei aw ei chi ta, Nama zydua ta namâ dyuh aw?

⁴ A duahmo sâhpa tawhta chati pathlah awpa ta tei ei ta, Haipa bie reipa liata amâ ly kaw tyh. Ama pakah ta byhnâ aw ei ta, Ama palôh ta chhie ama sa tyh. Selah

⁵ Ei hro ta Khazohpa deita hâ ta, Ano tawhta ei hnabeiseihna a vaw tlô.

⁶ Ano deita cha ei lôpanô nata ei pachhana châ ta, Ei thokhy châ ta, a chalyu beih aw va na.

⁷ Khazohpa liata ei pachhana nata ei rônahna a pahnie ta, Khazohpa cha ei thatlôna lôpanô nata ei bohna a châ.

⁸ Hy chyhsazy saih u, ano cha khâ ngâ u la, A hmiakô liata nama palôh pakeichheih muh vy; Khazohpa cha eimâ chhaina a châ. Selah

⁹ Mochyhpazy cha ei kha husopa hawh dei châ ei ta, Molaipazy chhao dôveina deita a châ; Khopathliahna liata a hua syulyu ha ei ta, Ama pano ta ei kha husopa hlâta amâ hua via.

¹⁰ Chyhsa hmo chhupa liata ngâna pahnieh leipa u la, Hraona sôh liata hnabeiseihna doleipa hnei hra khuh vy; Hneirôna a vaw pôh tita, Cha liata nama palôh soh khuh vy.

¹¹ Khazohpa ta ei kha reih ha ta, He he ei no ei theina a châ: Hmotaotheina cha Khazohpa eih châ ta,

¹² Hy Abeipa, ngâchhihna cha nâma eih a châ. Chyhsa to ama hmotaopa lymâ hawhta na thô tyh.