HLAZY 58 - Mara Bible RV (BSI)

Moleipazy hrie awpa ta thlahchhâna

Hla chhituhpa châta: “Pahleipadia Khah Y” tahpa ao ta sa awpa. Dâvi Mikatâ

¹ Hy ryureituhpazy saih u, biedopa nama reih tlai ma? Chyhsa sawzy châta â dopa ta ryu nama reih tlai ma?

² Châ bao va, nama palôh ta hmo doleipa tao ei chi ta, Nama ku ta alei chô liata thachahra a hmâh tyh.

³ Moleipazy cha chhi tawhta nomâpa châ ei ta, Ama pipa nahta lâpi paviapa ta, Haipa biezy ama reih lymâ.

⁴ Parih châmaih hawhpa châmaih hnei ei ta, Vâzi nahpâpa, nah a chahu tyhpa hawhta ama châ.

⁵ Parih pangâhthaipazy ao nathlie leipa ei ta, Pachaothaipa piehpiepa ao chhao nathlie veih ei.

⁶ Hy Khazohpa, ama pakah liata hâhzy thlie la, Hy Abeipa, chakeibarôhneipa lochopa naohzy thlie pachhô mah y.

⁷ Ti a loh pathlahpa hawhta lei ei sala, Ama châtaizy ta ama mopâ tita a hmao a bih ha mawh sy.

⁸ Chaikarupa a zaopa hawhta zao ei sala, Thiruapa ta hawsaih a pihpa, Noh a hmô beih leipa hawhta châ mawh ei sy.

⁹ Nama beihzy ahloh tho mei ta a palalôh hlâta, Tho hrohpa ta tlyma, tho raohpa ta tlyma, Moleipa cha phi pathlahpa a châ aw.

¹⁰ A phuh lapa a châpa a hmô tita, Mosiapa cha a ly aw ta; Moleipazy thisaih liata a phei â si aw.

¹¹ Chatanachata chyhsapa ta, “Mosiapa châta lymâ y tlai ta, Khizaw ryureihtuh Khazohpa a y tlai na,” a tah awh.