HLAZY 57 - Mara Bible RV (BSI)

Abohna châta thlahchhâna

Hla chhituhpa châta: “Pahleipadia Khah Y” tahpa ao ta sa awpa. Sawla tawhta Dâvi a râ ta, lôpu liata â nyu nota a phipa hla. Dâvi Mikatâ

¹ Hy Khazohpa, na ngiachhie la, Na ngiachhie tlai mah y, Ei hro ta nâ a châ chhai hih; Raona thlihpizy â pai hlâlei cha, Na mathlaw nohdi ry liata ei châ chhai aw.

² Khazohpa Chônôchaipa pado na ta, Kei liata â chhuahna a patlôpa Khazohpa tlai cha ei pado.

³ Khazohpa ta a zawngiahna nata a ngâchhihna tuah aw ta, Avâ tawhta vaw tuapa ta na pachha aw ta, Nâ taolatuhpazy maophyuhpa ta a paysa aw. Selah

⁴ Ei hrona he chakeibarôhneipazy hry liata y ta, Sahrâhpazy hry liata a zia na ta; Asei nata châtai hâh hnei ta, Zaozi tiahpa paleih a hneipa chyhsa sawzy hry liata ei y.

⁵ Hy Khazohpa, avâzy chô lâta cheihchalopa ta y la, Na rônahna ta leilô zydua bie mawh sy!

⁶ Ei sie nawpazy liata sao na parai khâh ei ta, Ei hro ta a ngiaroh ngaita. Ei lâpi liata khaohtlô na chao khâh ei ta, Âmo ta tlao ama tla tyh. Selah

⁷ Hy Khazohpa, ei palôh a i ta, Ei palôh â i ngaita; Hla ei sa aw, Reithaina hla ei sa aw.

⁸ Hy ei thlahpa, A hra teh! Hy tlaipih nata totâ zy saih u, A hra teh u! Kei ta khihdeipa ei pahra aw!

⁹ Hy Abeipa, phopizy hry liata alyna bie cha hlâ aw na ta, Râhzy hry liata na reithaina hla ei sa aw.

¹⁰ Na kyhpachâna tleih beih leipa ta avâzy kaw daih ta, Na ngâchhihna ta meihdozy a kaw tlô.

¹¹ Hy Khazohpa, avâzy chô lâta cheihchalopa ta y la, Na rônahna ta leilô zydua bie mawh sy!