HLAZY 53 - Mara Bible RV (BSI)

Hmo pha a taopa y veih ei

Hla chhituhpa châta: Mahâlâ ao ta sa awpa. Dâvi Maskili

¹ Ahrupa ta a palôh liata, “Khazohpa y vei,” a tah tyh. Avyuhna tao ei ta, Moleina pasi chhihpa tao ei ta, Hmo pha a taopa rai y veih ei.

² Khazohpa ta vârâh tawhta chyhsa sawzy za sai ta, Novâhna hneipa ta, Khazohpa a tluapa ama y ma tahpa a za moh tyh.

³ Pao khai ha ei ta, Avyuhna liata amâ ngia khai haw; Hmo pha a taopa rai y veih ei, Pakha hmah y veih ei.

⁴ Moleina hmo a tao tyhpazy he ama novâh vei tlyma i? Viahchhâ niepa hawhta ei chyhsazy nie khai ei ta, Khazohpa padona châh pahno veih ei.

⁵ China rai y leina liata, Chi ngaitapa ta y ei ta; Adyuhna riehmo châ paryh thlupa ruzy cha, Khazohpa ta a hiepatla khai haw; Khazohpa ta âmo cha a thy hapa vâta, Maophyuhpa ta na soh ha ei.

⁶ Izarei pachhana cha, Zaio tawhta vaw pua sala ei tah kaw dia! Khazohpa ta a phopi vânoh a patosa heih tita, Zakaw cha a ly sala, Izarei cha thaphapa ta y mawh sy!