HLAZY 51 - Mara Bible RV (BSI)

Ngiahthaina châta thlahchhâna

Hla chhituhpa châta: Dâvi Hla. Bâsebâ a hnei tawhta a hnohta hrohsopa Nâthâ â vy nota a rona hla

¹ Hy Khazohpa, na kyhpachâna tleih beih leipa vâta, Na ngiachhie la; Na zawngiahna chhâ tiah leipa vâta, Ei paraonazy a ngiahthai mah y.

² Ei paraona tawhta liahsa na pasi la, Ei moleina tawhta na pathaisa mah y!

³ Ei paraonazy pahno thlâh ha na ta, Ei moleina ei hmiakô liata khâ a y.

⁴ Na chô liata, nâma chô lia tlai ta vaw molei na ta, Na mohmô liata hmo pha leipa ei vaw tao haw; Na biezy liata thaichâ chi ta, Na pachiana liata seina y vei.

⁵ Pachâ teh, paraona liata taopa châ na ta, Ei nô ta moleina liata a phaopa ei châ.

⁶ Pachâ teh, chhôh lâta hmeiseihna khoh chi ta, Palôh chhôh liata sona eina pachu chi.

⁷ Hisaw ta na pathai la, Ei pathaih aw; Na pasi la, Dâhaw hlâta ei ngyuh via aw.

⁸ Thaphana nata alyna pyuzy na patheisa heih la, Na thlie hapa ruzy he a ly heih mawh sy.

⁹ Ei moleinazy tawhta na hmia nyu la, Ei paraona zydua pahlei khai mah y.

¹⁰ Hy Khazohpa, palôh pathaihpa kei liata paysa la, Pachâna dopa ei chhôh liata pathieh heih mah y.

¹¹ Na hmiakô tawhta na thy leipa la, Na Thlahpa Pathaihpa na lapa khah y.

¹² Na pachhana alyna na pie heih la, Thlahpa khona ta na patu thlâh ha mah y.

¹³ Chatanachata paraotuhpazy na lâpi pachu aw ei na ta, Moleipazy nâ lâ ama vaw kua aw.

¹⁴ Hy Khazohpa, ei pachhana Kha­zohpa y, Thisaih maoh tawhta na pachha mah y; Chatanachata ei paleih ta a paropa ta na siana hla a sa aw.

¹⁵ Hy Abeipa, ei hmaozy pahy la, Ei pakah ta na reithaina a phuah aw.

¹⁶ Atheihna liata a ly leipa chi ta, A lypa châ la, ei cha hlâ ha awpa tlai; Raopa hlâna ta na palôh patlâh hra aw vei.

¹⁷ Khazohpa khopa atheihnazy cha palôh keichheihpa châ ta, Hy Khazohpa, palôh keichheihpa nata ropa cha dytha aw va chi.

¹⁸ Nâ lynazie hawhta Zaio chô liata hmopha tao la, Zerusale thokhyzy padua mah y.

¹⁹ Chatanachata atheihna dopazy liata a ly aw chi ta, Raopa hlânazy nata tlokhuh raopa hlânazy liata a lypa ta, Na maisâh liata viahchao tôhpazy hlâpa a châ aw.